RCB 9 વર્ષ પછી IPL ફાઈનલમાં પહોંચ્યું છે. ક્વોલિફાયર 1 માં RCB એ પંજાબ કિંગ્સને 8 વિકેટથી હરાવ્યું. આ મેચમાં RCBની ખૂબ જ ખતરનાક બોલિંગ જોવા મળી. આ સિવાય મેચની શરૂઆતથી જ મેદાન પર વિરાટ કોહલીનો જૂનો અંદાજ જોવા મળ્યો.
મેચ દરમિયાન વિરાટ કોહલી બોલરોને દરેક બોલ સમજાવતો જોવા મળ્યો, કોહલી મેદાન પર એનર્જીથી ભરપૂર જોવા મળ્યો. મેચ જીત્યા પછી વિરાટ કોહલી સ્ટેન્ડમાં બેઠેલી તેની પત્ની અનુષ્કા શર્મા તરફ એક ખાસ ઈશારો કરતો જોવા મળ્યો, જેનો વીડિયો સોશિયલ મીડિયા પર વાયરલ થઈ રહ્યો છે.
પત્ની અનુષ્કા પ્રત્યે વિરાટનો ખાસ ઈશારો
આ મેચ જીતવા માટે RCB પાસે ફક્ત 102 રનનો ટાર્ગેટ હતો. જે RCB એ માત્ર 10 ઓવરમાં 2 વિકેટ ગુમાવીને હાંસલ કર્યું. આ મેચમાં વિરાટ શરૂઆતમાં જ આઉટ થઈ ગયો હતો, પંજાબ કિંગ્સ સામે તેના બેટમાંથી ફક્ત 12 રન જ નીકળ્યા હતા.
મેચ જીત્યા પછી, વિરાટ કોહલી તેની પત્ની અનુષ્કાને કહે છે કે હજુ એક ડગલું બાકી છે. વિરાટ કોહલીએ પોતાના હાથની એક આંગળી બતાવીને આ ઈશારો કર્યો, આ ઘટના કેમેરામાં કેદ થઈ ગઈ, જેનો વીડિયો હવે સોશિયલ મીડિયા પર ફેન્સ દ્વારા ખૂબ પસંદ કરવામાં આવી રહ્યો છે.
RCB ટ્રોફી જીતવાથી એક ડગલું દૂર
આ મેચમાં, RCB ની ઘાતક બોલિંગ સામે પંજાબ કિંગ્સની ટીમ 101 રનમાં ઓલઆઉટ થઈ ગઈ હતી. RCB તરફથી બોલિંગ કરતા જોશ હેઝલવુડ અને સુયશ શર્માએ 3-3 વિકેટ લીધી. આ જીત સાથે, RCB 9 વર્ષ પછી ફાઈનલમાં પહોંચ્યું.
છેલ્લી વખત વિરાટ કોહલીની કેપ્ટનશીપ હેઠળ RCB 2016 માં IPL માં ફાઈનલમાં પહોંચ્યું હતું પરંતુ ટાઈટલ જીતી શક્યું ન હતું. ત્યારબાદ સનરાઈઝર્સ હૈદરાબાદે RCB ને હરાવીને ટ્રોફી પર કબજો કર્યો. હવે RCB પાસે પહેલીવાર ટ્રોફી જીતવાની સુવર્ણ તક છે.
