ભારતનાં શેરબજારોમાં મંગળવારે સેન્સેક્સમાં ચાર દિવસની તેજીનું ધોવાણ થયું હતું. પ્રોફિટ બૂકિંગને કારણે માર્કેટનું સેન્ટીમેન્ટ ખરડાતા સેન્સેક્સ 53 પોઈન્ટનાંઘટાડા સાથે 82,391.72 પોઈન્ટનાં સ્તરે બંધ રહ્યો હતો જ્યારે નિફ્ટી 1 પોઈન્ટ વધીને 25,104.25ની સપાટીએ બંધ રહ્યો હતો. આમ શેરબજારમાં પાંખા કામકાજ સાથે ફ્લેટ બંધ રહ્યું હતું. આઈટી અને ફાર્મા શેરોમાં તેજીનો ચમકારો જોવા મળ્યો હતો. HDFC બેન્ક, ICICI બેન્ક અને રિલાયન્સ ઈન્ડસ્ટ્રીઝમાં ઘટાડો થયો હતો જ્યારે ઈન્ફોસિસ, ટીસીએસ અને આઈટીસીમાં નજીવો વધારો જોવા મળ્યો હતો. મીડ કેપ અને સ્મોલ કેપની કામગીરી સારી રહી હતી. BSE મીડકેપ 19 પોઈન્ટ અને સ્મોલકેપ 176 પોઈન્ટ વધ્યા હતા.
માર્કેટ શા માટે ફ્લેટ બંધ રહ્યું?
શેરબજારમાં સતત ચાર દિવસ તેજી જોવા મળી હતી પણ મંગળવારે પ્રોફિટ બૂકિંગને કારણે માર્કેટનું સેન્ટીમેન્ટ ખરડાયું હતું અને તે ફ્લેટ બંધ રહ્યું હતું. રોકાણકારોએ હવે અમેરિકા અને ચીનની વેપાર મંત્રણા પર નજર રાખીને વેપાર કર્યો હતો. ફુગાવાનાં આંકડા કેવા આવે છે તેની અસર બજારમાં જોવા મળી હતી. ઈક્વિટી માર્કેટ સાંકડી રેન્જમાં અથડાયું હતું રોકાણકારોએ સાવધાનીભર્યો અભિગમ દર્શાવ્યો હતો. મેક્રોઈકોનોમિક પરિબળો માર્કેટ માટે સાનુકુળ રહ્યા હતા. ડૉલર ઈન્ડેક્સ મજબૂત રહેવાથી આઈટી અને ફાર્મા શેરો ઉંચકાયા હતા. નિષ્ણાતોના મતે બજારમાં સાનુકુળ અભિગમ જળવાઈ રહેશે અને તેજી તરફી વલણ જોવા મળશે. નિફ્ટી ટૂંકાગાળે 25,350 અને 24,850ની રેન્જમાં અથડાશે તેવી ધારણા છે.
નિફ્ટી 50માં ટોપ ગેઈનર્સ અને ટોપ લૂઝર્સ
નિફ્ટી 50 માં 25 શેર વધ્યા હતા જ્યારે અન્ય શેરમાં ઘટાડો થયો હતો. ગ્રાસિમ 3.66 ટકા અને ટેક મહિન્દ્રા 2.14 ટકા તેમજ ડૉ, રેડ્ડી લેબ 2.10 ટકા વધ્યા હતા. સેક્ટરલ ઈન્ડેક્સમાં નિફ્ટી રિયલ્ટી 1.14 ટકા ઘટયો હતો જ્યારે નિફ્ટી બેન્ક અને PSU તેમજ પ્રાઈવેટ બેન્કમાં અનુક્રમે 0.37ટકા, 0.52 ટકા અને 0.17 ટકાનો ઘટાડો થયો હતો. વોલ્યૂમનાં સંદર્ભમાં રિલાયન્સ પાવરમાં 49.62 કરોડ શેરોમાં તેમજ વોડાફોન આઈડીયામાં 30.94 કરોડ શેરોમાં અને રતન ઈન્ડિયા પાવરમાં 30.5 કરોડ શેરોમાં કામકાજ થયા હતા.
100 શેરમાં ઉપલી સર્કિટ અને 50માં નીચલી સર્કિટ
માર્કેટમાં 100 કરતા વધુ શેરોમાં ઉપલી સર્કિટ લાગી હતી જ્યારે 50 શેરોમાં નીચલી સર્કિટ લાગી હતી. યુનિટેક, કોફી ડે અને રિલાયન્સ ઈન્ફ્રા તેમજ રતનઈન્ડિયા એન્ટરપ્રાઈઝ સહિત 116શેરોમાં ઉપલી સર્કિટ લાગી હતી જ્યારે રચના ઈન્ફ્રા, નિર્માણ એગ્રી તેમજ કોર ડિજિટલ સહિત 49શેરમાં નીચલી સર્કિટ લાગી હતી. NSE પર 1609 શેર વધ્યા હતા જ્યારે 1302 શેર ઘટયા હતા અને 80 યથાવત રહ્યા હતા.
