અમદાવાદ શહેરમાં ગુનાની ઘટનાઓ સતત વધી રહી છે. આ વચ્ચે ચાંદલોડિયામાં શો-રૂમમાં ચોરીની ઘટનાને કારણે ચકચાર મચી જવા પામી છે. વધતી જતી ચોરીની ઘટનાને કારણે દુકાનદારોમાં ભયનો માહોલ જોવા મળી રહ્યો છે.
ડ્રેસનું ટ્રાયલ લેવા માટે ટ્રાયલ રૂમમાં ગઈ
ઘટનાની મળતી માહિતી અનુસાર, અમદાવાદ શહેરના ચાંદલોડિયામાં આવેલા એક કપડાના શો-રૂમમાં ત્રણ મહિલાઓ દ્વારા ચોરીની ઘટનાને અંજામ આપતા અરેરાટી વ્યાપી ગઈ છે. આ ત્રણ મહિલાઓએ ડ્રેસનું ટ્રાયલ લેવા માટે ટ્રાયલ રૂમમાં ગઈ હતી. જ્યાં તેણે એક જોડી ડ્રેસના બદલે બે ડ્રેસ લઈને ફરાર થઈ ગઈ હતી. આ સમગ્ર ઘટનાની જાણ શો-રૂમ માલિક દ્વારા સ્ટોક ચેક કરવામાં આવતા થઈ હતી. આ મહિલાઓએ 15000થી વધુની કિંમતના કપડાની ચોરી કરી હતી.
મહિલાઓ વારાફરતી ડ્રેસના ટ્રાયલ માટે ટ્રાયલ રૂમમાં ગઈ
ચાંદલોડિયામાં એક રેડીમેડ ગારમેન્ટના શો-રૂમમાં ખરીદીના બહાને હાથફેરાની ઘટના સામે આવી છે. ત્રણ અજાણી મહિલાઓએ દુકાનના માલિક અને સ્ટાફની નજર ચૂકવી ચોરી કરી હતી. મહિલાઓ વારાફરતી ડ્રેસના ટ્રાયલ માટે ટ્રાયલ રૂમમાં ગઈ હતી. ટ્રાયલ રૂમમાં જતી વખતે સ્ટાફની નજર ચૂકવીને એક જોડી ડ્રેસના બદલે બે જોડી ડ્રેસ લઈને જતી હતી.
રૂપિયા 15,000ની કિંમતના લેડીઝ પંજાબી ડ્રેસની પાંચ જોડીની કરી ચોરી
કોઈપણ પ્રકારની ખરીદી કર્યા વગર આ મહિલાઓ દુકાનમાંથી નીકળી ગઈ હતી. બીજા દિવસે જ્યારે દુકાનનો સ્ટોક ચેક કરવામાં આવ્યો ત્યારે લેડીઝ પંજાબી ડ્રેસની પાંચ જોડી ઓછી જણાતા માલિકને શંકા ગઈ હતી. શંકાના આધારે દુકાન માલિકે દુકાનના સીસીટીવી ફૂટેજ તપાસતા સમગ્ર હકીકત સામે આવી હતી. મહિલાઓએ આશરે રૂપિયા 15,000ની કિંમતના લેડીઝ પંજાબી ડ્રેસની પાંચ જોડીની કરી ચોરી છે.
અજાણી મહિલાઓ વિરુદ્ધ ચોરીની ફરિયાદ નોંધાઈ
સમગ્ર મામલે દુકાન માલિક કૃણાલભાઈએ સોલા હાઇકોર્ટ પોલીસ સ્ટેશનમાં ત્રણેય અજાણી મહિલાઓ વિરુદ્ધ ચોરીની ફરિયાદ નોંધાવી છે. સમગ્ર મામલે પોલીસે CCTV ફૂટેજના આધારે તપાસ શરૂ કરી છે. આ મામલે શો-રૂમ માલિકે પોલીસ મથક ખાતે ફરિયાદ નોંધાવી છે. હાલ પોલીસ આ મામલે વધુ તપાસ હાથ ધરી છે.
