વડોદરા શહેર પોલીસની સ્પેશિયલ ઓપરેશન્સ ગ્રુપે ગોરવા વિસ્તારમાં વિમલેશ્વર મહાદેવ મંદિર પાસે ગાંજાના 459 ગ્રામ જથ્થા સાથે એક શખ્સને ઝડપી પાડ્યો છે. કાર્યવાહી દરમ્યાન રૂ. 1,19,300નો મુદ્દામાલ જપ્ત કરવામાં આવ્યો છે. 2025ના વર્ષમાં વડોદરા શહેરમાં એનડીપીએસના NDPS એક્ટ હેઠળ કુલ 36 ગુનાઓ નોંધાયા છે
1,19,300નો મુદ્દામાલ જપ્ત
SOGને ગુપ્ત બાતમી મળી હતી કે રાજેન્દ્રકુમાર ઉર્ફે છોટુ બિન્દ દરરોજ સાંજના સમયે ગાંજાનું છૂટક વેચાણ કરે છે. બાતમીને આધારે PI એસ.ડી. રાતડાના માર્ગદર્શન હેઠળ રેડ પાડવામાં આવી અને આરોપીને રંગે હાથ ઝડપી પાડવામાં આવ્યો. તેની પાસેથી 459 ગ્રામ ગાંજો, એક્ટિવા, મોબાઇલ અને રૂ. 1,350 રોકડ મળી કુલ રૂ. 1,19,300નો મુદ્દામાલ જપ્ત થયો. આરોપી વિરુદ્ધ ગોરવા પોલીસ સ્ટેશનમાં NDPS એક્ટ હેઠળ ગુનો નોંધાયો છે. જયારે સપ્લાય કરનાર અન્ય વ્યક્તિની શોધખોળ ચાલી રહી છે.
પોલીસની કામગીરી
છેલ્લા 24 દિવસમાં શહેરમાં નશીલા પદાર્થોના ગેરકાયદેસર વેપાર સામે NDPS એક્ટ હેઠળ 17 ગુનાઓ નોંધાયા. આ દરમિયાન 20.685 કિલો ગાંજો, હાઇબ્રિડ ગાંજો, 73 ગ્રામ મેફેડ્રોન, 2 કિલો અફીણ સહિત રૂ. 41.53 લાખથી વધુનો મુદ્દામાલ જપ્ત કર્યો અને 21 આરોપીઓની ધરપકડ કરવામાં આવી.
વર્ષ 2025 માટેના આંકડા
NDPS એક્ટ હેઠળ કુલ 36 ગુનાઓ નોંધાયા. જેમાં 317 કિલો કરતા વધુ ગાંજો, મેફેડ્રોન, અફીણ, કોફ સિરપ, ટ્રામાડોલ-આલ્પ્રાઝોલમ ટેબ્લેટ્સ સહિત કુલ રૂ. 1.97 કરોડથી વધુનો મુદ્દામાલ જપ્ત કર્યો. 61 આરોપીઓ વિરુદ્ધ કાર્યવાહી અને નશીલા પદાર્થોના વેપાર સાથે સંકળાયેલા 6 લોકોને PIT એક્ટ હેઠળ પણ કાર્યવાહી કરવામાં આવી.
