ગુજરાત પોલીસ દ્વારા શરૂ કરાયેલા ‘ઓપરેશન મ્યુલ હન્ટ’ અભિયાનના ભાગરૂપે અમદાવાદ પોલીસે સાયબર ઠગાઈમાં ઉપયોગમાં લેવાતા બેંક એકાઉન્ટ્સ પર કડક કાર્યવાહી શરૂ કરી છે. પોલીસે માત્ર એક જ દિવસમાં મ્યુલ એકાઉન્ટ સંબંધિત 15 જેટલા ગુનાઓ નોંધીને સાયબર ફ્રોડના નાણાં સગેવગે કરવાના કૌભાંડનો પર્દાફાશ કર્યો છે.
ઓપરેશન મ્યુલ હન્ટ’ અભિયાન
પોલીસ સૂત્રો પાસેથી મળતી માહિતી મુજબ, સાયબર ઠગાઈ દ્વારા મેળવેલા નાણાંને સગેવગે કરવા માટે બેંક એકાઉન્ટ્સને કમિશનના બદલામાં ભાડે આપનારા લોકો સામે પોલીસે આ ડ્રાઇવ શરૂ કરી છે. આ પ્રકારના એકાઉન્ટ્સને ‘મ્યુલ એકાઉન્ટ’ તરીકે ઓળખવામાં આવે છે. અમદાવાદ પોલીસે એક જ દિવસમાં મ્યુલ એકાઉન્ટ્સની તપાસ કરીને 15 કેસ દાખલ કર્યા છે. આ ડ્રાઇવ દરમિયાન પોલીસને જાણવા મળ્યું છે કે આ એકાઉન્ટ્સ દ્વારા કરોડો રૂપિયાની ગેરકાયદેસર હેરાફેરી કરવામાં આવી છે.
એકાઉન્ટ ભાડે આપનારની ખેર નથી
સાયબર ફ્રોડના પૈસા ટ્રાન્સફર કરવા માટે પોતાનું બેંક એકાઉન્ટ ભાડે આપનાર વ્યક્તિઓ હવે પોલીસની રડાર પર છે અને તેમની સામે કાયદેસરની કાર્યવાહી કરવામાં આવી રહી છે. આગામી સમયમાં આ ઓપરેશનના ભાગરૂપે અમદાવાદ શહેરમાં વધુ ગુનાઓ નોંધાય તેવી શક્યતા છે, કારણ કે પોલીસ દ્વારા મ્યુલ એકાઉન્ટ્સની સઘન તપાસ હજી ચાલુ છે.
