અમદાવાદ ખાતે શહેરી વિકાસ યોજના અંતર્ગત ગુજરાતમાં મહાનગર પાલિકા અને નગર પાલિકાઓને વિસ્તારના વિકાસ માટે આજે નાણાં ભંડોળની ફાળવણીનો કાર્યક્રમ યોજવામા આવ્યો હતો. આ પ્રસંગે મુખ્યમંત્રી ભૂપેન્દ્ર પટેલે કહ્યું હતું કે, ગુજરાત સરકારે વર્ષ 2025ને શહેરી વિકાસ વર્ષ જાહેર કર્યું છે. મુખ્યમંત્રીના હસ્તે રાજ્યના શહેરોના વિકાસ માટે ચેક અર્પણ કરવામાં આવ્યા હતાં.
શહેરી વિકાસના બજેટમાં 40 ટકાનો વધારો
ગુજરાત સરકારે શહેરી વિકાસ માટે રૂપિયા 2800 કરોડની રકમના ચેક અર્પણ કરવામાં આવ્યા છે. અમદાવાદ મનપાને 780, સુરત મનપાને 657, વડોદરા મનપાને 235, રાજકોટ મનપાને 195 કરોડની સહાય અર્પણ કરવામાં આવ્યા છે. ગુજરાત સરકારે વર્ષ 2025-26ના શહેરી વિકાસના બજેટમાં 40 ટકાનો વધારો કર્યો છે. સ્વર્ણિમ જ્યંતી મુખ્યમંત્રી શહેરી વિકાસ યોજના હેઠળ 12 હજાર કરોડથી વધુનું રોકાણ કરવામાં આવ્યું છે. અમૃત મિશનના અસરકારક અમલમાં ગુજરાત દેશના ટોચના ત્રણ રાજ્યોમા સ્થાન પામ્યું છે.
આટલા રૂપિયા આવતા હોય તો કામ તો કરવું જ પડે
આ પ્રસંગે મુખ્યમંત્રીએ કહ્યું હતું કે, આટલા રૂપિયા આવતા હોય તો કામ તો કરવું જ પડે. ઓછામાં ઓછો 40 કરોડ રૂપિયાનો ચેક મળવાનો છે. ગુજરાતમાં કોમનવેલ્થ યોજવાની તક મળી છે. 2025માં પહેલી વખત શહેરી વિકાસ વર્ષ યોજાયું છે. 2005માં જે મોટા કોર્પોરેશન હતા તેમાં પણ 10 હજાર કે 15 હજારનું કામ કરવા માટે કમિશનર ની પાછળ ૧૫ દિવસ ફરવું પડે એમ અમારે ત્યાં બધા કહેતા. હું સ્ટેન્ડીંગ કમિટી ચેરમેન હતો ત્યારે જનરલ બોર્ડમાં કહ્યું હતું કે નરેન્દ્ર મોદી હશે ત્યાં સુધી વિકાસના કામ અટકશે નહિ.
આયોજન નહિ કરો તો તમે પાછળ પડતા જશો
મુખ્યમંત્રીએ કહ્યું હતું કે, એક વખત એસીમાં બેસવાની ટેવ પડે એટલે એસી વગર રહેવું મુશ્કેલ બને.જો કે આપણે સારી ટેવ પાડી છે.પહેલા વિકાસના કામ વિચારી શકતા નહોતા અને આજે નાનામાં નાની પાલિકા નાનામાં નાની સુવિધા પૂરી કરવા માટે કામ કરે છે. મુળ સુવિધાના કામ પૂરા થયા છે એટલે આ કામ કરી રહ્યા છે.નગરપાલિકામાં નાણાં વપરાતા નથી અને પડ્યા રહે છે.જો આયોજન નહિ કરો તો તમે પાછળ પડતા જશો.હવે પૈસાનો વધારો થવાનો છે ઘટવાના નથી. એટલે પૈસા વાપરવાની કેપેસિટી તમારે વધારવી પડશે.
રીવરફ્રન્ટનો વિકાસ જોયો હશે આજે ક્રુઝ ફરે છે
મુખ્યમંત્રીએ કહ્યું હતું કે, વિકાસ કરવા માટે રાજકીય ઇચ્છા શક્તિ હોવી જોઈએ.રીવરફ્રન્ટનો વિકાસ જોયો હશે આજે ક્રુઝ ફરે છે. સ્માર્ટ સિટી મિશન અન્વયે આજે ગુજરાત આગળ છે.પર્યાવરણના પડકારોને પહોંચી વળવા ગ્રીન સ્પેસ, ગ્રીન કોરિડોરમાં કામગિરી હાથ ધરી છે.પાલિકાના વિજ બીલ બચે એ માટે સોલર પેનલનો ઉપયોગ થાય એ જરૂરી છે.૧૪.૯ મેગાવોટ ક્ષમતાના ૧૨૦ પ્રોજેક્ટ થકી આજે શહેરોમાં પાવર જનરેશન શરૂ થયું છે.
રાજ્યના અનેક શહેરો સ્વચ્છતામાં આગળ વધ્યા
નાયબ મુખ્યમંત્રી હર્ષ સંઘવીએ કહ્યું હતુંકે, મુખ્યમંત્રીના કાર્યકાળમાં રાજ્યના અનેક શહેરો સ્વચ્છતામાં આગળ વધ્યા છે. કોંગ્રેસના રાજમાં કચેરીઓમાં પાણીના ટેન્કર માટે પણ બધા ધક્કા ખાતા હતાં. રસ્તા, સ્ટ્રીટ લાઈટ બનાવવાનો વિચાર કોંગ્રેસે કર્યો જ નથી. રે રહેતા હોય અને દૂર ચાલીને જઈએ ત્યારે રસ્તો આવતો હતો. મારી ઉંમરના લોકોએ સુવર્ણકાળ જોયો છે એટલે જુની વાત અમને યાદ ન હોય.આજે કોઈ શહેર સ્વચ્છતા તો કોઈ શહેર પાણી ચોખ્ખું કરવામાં તો કોઈ શહેર ગ્રીન કવર કરવામાં આગળ છે. નવી બનેલી ૯ મનપામાં એક બાદ એક રસ્તા, સ્વચ્છતા, વ્યવસ્થામાં અનેકગણો વધારો આવ્યો છે.
