પાટણ પંથકમાં પ્રખ્યાત ગાજરની સિઝનનો પ્રારંભ થઈ ગયો છે. જોકે હજુ કડકડતી ઠંડી શરૂ ન થતાં ગાજરની ગુણવત્તા પર અસર પડી છે, જેના કારણે ભાવ ગત વર્ષની સરખામણીમાં નીચા જોવા મળી રહ્યા છે. હાલ પાટણ શાકમાર્કેટમાં રોજના 250થી 350 બોરી ગાજરની આવક નોંધાઈ રહી છે.
પાટણ પંથકના સાગોડીયા, પાટણ, રાજપુર, રૂની, હાજીપુર, સબોસણ, માતરવાડી, હાંસાપુર, ગદોસણ, માંડોત્રી, ધારપુર અને સહિતના ગામોના ખેડૂતો ગાજર વેચવા માટે પાટણ શાકમાર્કેટમાં આવતા હોય છે. વેપારી સૂત્રોના જણાવ્યા અનુસાર ધીમેધીમે આવકોમાં વધારો થશે અને માર્ચ મહિના સુધી ગાજરની આવક ચાલુ રહેશે. સિઝન દરમિયાન રોજના 5,000 થી 7,000 બોરી ગાજરની આવક થતી હોય છે. પાટણના ગાજર તેની ગુણવત્તા અને સ્વાદ માટે વર્ષોથી પ્રખ્યાત છે અને તેનું મોટા પાયે ઉત્પાદન થાય છે. સિઝન દરમિયાન પાટણના ગાજર અમદાવાદ, વડોદરા, સુરત, ભરૂચ, નાસિક અને ઔરંગાબાદ જેવા શહેરો સુધી પહોંચે છે. જોકે, હાલમાં સિઝનના પ્રથમ તબક્કામાં ગાજર અમદાવાદ, મહેસાણા અને સુધીજ મોકલવામાં આવી રહ્યા છે.
હજુ શિયાળાની કડકડતી ઠંડી શરૂ ન થતાં ગાજરની ગુણવત્તા પર સીધી અસર પડી છે. હાલમાં શાકમાર્કેટમાં આવતા ગાજર સ્વાદમાં ગળચટ્ટાને બદલે ફીક્કા આવી રહ્યા છે. આના કારણે હોલસેલ બજારમાં ગાજરનો ભાવ પ્રતિ મણ (20 કિલો) રૂ. 150 થી 220 ચાલી રહ્યો છે, જ્યારે ગત વર્ષે આ જ સમયગાળામાં ભાવ રૂ.300 થી 400 પ્રતિ મણ હતા. વેપારીઓએ આશા વ્યક્ત કરી છે કે, આગામી રવિવાર બાદ ગાજરની આવકમાં વધારો થશે અને ગુણવત્તામાં પણ સુધારો જોવા મળશે.
