અમદાવાદના ઐતિહાસિક કાંકરિયા લેકફ્રન્ટ ખાતે આજથી ગુજરાતના સૌથી મોટા ગણાતા ‘કાંકરિયા કાર્નિવલ’નો ભવ્ય પ્રારંભ થઈ રહ્યો છે. મુખ્યમંત્રી ભૂપેન્દ્ર પટેલ આ મહોત્સવનું વિધિવત ઉદ્ઘાટન કરશે, જેની સાથે જ 350 કરોડ રૂપિયાથી વધુના વિવિધ વિકાસકાર્યોનું લોકાર્પણ અને ખાતમુહૂર્ત પણ કરવામાં આવશે. વર્ષ 2008થી સતત યોજાતા આ કાર્નિવલમાં આ વર્ષે પણ મુલાકાતીઓને નિઃશુલ્ક પ્રવેશ આપવામાં આવશે. 25 થી 31 ડિસેમ્બર સુધી ચાલનારા આ ઉત્સવમાં દરરોજ અંદાજે 1 લાખથી વધુ લોકો ઉમટી પડવાની શક્યતા છે. મનોરંજન માટે ત્રણ અલગ-અલગ સ્ટેજ પર સાંસ્કૃતિક કાર્યક્રમો, ખ્યાતનામ કલાકારોનું પરફોર્મન્સ, યોગા-ઝુમ્બા સેશન્સ અને મહિલાઓ માટે મહેંદી તેમજ નેલ આર્ટ જેવી સ્પર્ધાઓનું વિશેષ આયોજન કરવામાં આવ્યું છે.
કાંકરિયામાં કલાકારોનો જમાવડો
સુરક્ષા અને વ્યવસ્થા માટે પહેલીવાર હાઇટેક ટેકનોલોજીનો ઉપયોગ આ વર્ષે કાંકરિયા કાર્નિવલમાં સુરક્ષા અને સુવિધાને પ્રાધાન્ય આપતા પ્રથમ વખત ‘ક્રાઉડ મેનેજમેન્ટ સિસ્ટમ’ અમલમાં મૂકવામાં આવી છે. લેકફ્રન્ટની આસપાસ 34 જેટલા અત્યાધુનિક હાઇટેક કેમેરા લગાવવામાં આવ્યા છે, જે ભીડની ગણતરી કરશે. જો પરિસરમાં સંખ્યા મર્યાદા કરતા વધશે, તો તાત્કાલિક અસરથી પ્રવેશદ્વારો બંધ કરી દેવામાં આવશે જેથી અફરાતફરી ન સર્જાય. આ ઉપરાંત, આ વર્ષે આયોજકો દ્વારા સતત ત્રીજી વખત ગિનીસ વર્લ્ડ રેકોર્ડ બનાવવાનો ટાર્ગેટ પણ રાખવામાં આવ્યો છે. લેઝર શો, ફૂડ કોર્ટ અને લાઈટિંગ ડેકોરેશનથી ઝગમગતા કાંકરિયામાં અમદાવાદીઓ માટે નવા વર્ષની ઉજવણી યાદગાર બની રહેશે
