ગોંડલમાં ગુનો કરી એમપી ભાગી ગયેલો આરોપી ખેત મજૂરીની આડમાં છુપાયો હતો, રૂરલ એલસીબી અને પેરોલ–ફર્લો સ્કોડની સફળ કાર્યવાહી
અગ્ર ગુજરાત, રાજકોટ
ગોંડલ પંથકમાં લૂંટ અને ધાડ જેવા ગંભીર ગુનાને અંજામ આપી છેલ્લા 12 વર્ષથી પોલીસને હાથ તાળી આપતો ફરતો એક પરપ્રાંતીય આરોપી અંતે પોલીસના જાળમાં ફસાયો છે. મૂળ મધ્યપ્રદેશનો રહેવાસી અને વર્ષ 2014માં ગોંડલ તાલુકા પોલીસ મથકમાં નોંધાયેલા ગુનાનો આરોપી પપ્પુ ઉર્ફે ભરત ટોળીયા ગામોડને રાજકોટ રૂરલ એલસીબી અને પેરોલ–ફર્લો સ્કોડની ટીમે જસદણ તાલુકાના કમળાપુર ગામની સીમમાંથી ઝડપી લીધો છે.
રાજકોટ જિલ્લા પોલીસ વડા વિજયસિંહ ગુર્જર દ્વારા નાસતા ફરતા તેમજ પેરોલ જમ્પ આરોપીઓને પકડી પાડવા માટે કડક સૂચનાઓ આપવામાં આવી હતી. આ સૂચનાઓના પગલે રૂરલ એલસીબી રાજકોટના પીઆઈ વી.વી. ઓડેદરાના માર્ગદર્શન હેઠળ પેરોલ–ફર્લો સ્કોડ દ્વારા સઘન કામગીરી હાથ ધરવામાં આવી હતી.
પેરોલ–ફર્લો સ્કોડના પીએસઆઈ પી.એન. ભરવાડની આગેવાની હેઠળની ટીમ ટેકનિકલ એનાલિસિસ અને ગુપ્ત બાતમીના આધારે આરોપીઓની શોધખોળ કરી રહી હતી. દરમિયાન એએસઆઈ નૌશાજભાઈ ચૌહાણ, કોન્સ્ટેબલ મહેન્દ્રસિંહ સોલંકી, અબ્બાસભાઈ ભારમલ અને કિશોરભાઈ કુગશીયાને ખાનગી રાહે ચોક્કસ માહિતી મળી હતી કે, ગોંડલ તાલુકા પોલીસ મથકમાં વર્ષ 2014માં નોંધાયેલા લૂંટ-ધાડના ગુનાનો આરોપી પપ્પુ ઉર્ફે ભરત ગામોડ હાલ જસદણ તાલુકાના કમળાપુર ગામની સીમમાં આવેલી વાડીમાં ખેત મજૂરી કરી રહ્યો છે.
આ બાતમીને આધારે પેરોલ–ફર્લો સ્કોડની ટીમ તાત્કાલિક કમળાપુર ગામે પહોંચી હતી અને વાડી વિસ્તારમાંથી આરોપીને ઝડપી લેવામાં સફળતા મેળવી હતી. પૂછપરછમાં આરોપીએ પોતે મૂળ મધ્યપ્રદેશના જાંબુઆ જિલ્લાના માછલીયાધાર, પણદા ફળિયુંનો રહેવાસી હોવાનું જણાવ્યું હતું અને પોલીસથી બચવા માટે છેલ્લા ઘણા વર્ષોથી અલગ-અલગ જગ્યાએ મજૂરી કરતો ફરતો હોવાનું બહાર આવ્યું છે.
12 વર્ષ બાદ હાથ લાગેલા આ ફરાર આરોપીને આગળની કાર્યવાહી માટે ગોંડલ તાલુકા પોલીસ મથકના હવાલે કરવામાં આવ્યો છે. આરોપીની ધરપકડથી જૂના ગુનાના ભેદ ઉકેલાયા છે અને નાસતા ફરતા ગુનેગારો સામે રાજકોટ રૂરલ પોલીસની સક્રિયતા ફરી એકવાર સાબિત થઈ છે.
