ઉપલેટાના ચેસ માસ્ટર યુગ માકડીયાએ રાજયકક્ષાએ બ્રોન્ઝ મેડલ પ્રાપ્ત કરી સિધ્ધિ મેળવી

ઉપલેટાના ચેસ માસ્ટર યુગ માકડીયાએ રાજયકક્ષાએ બ્રોન્ઝ મેડલ પ્રાપ્ત કરી સિધ્ધિ મેળવી

 ખેલ મહાકુંભમાં ચેસ સ્પર્ધામાં તૃતિય ક્રમ મેળવ્યો

અગ્ર ગુજરાત, ઉપલેટા

રાજકોટ જિલ્લાના ઉપલેટા જેવા નાના શહેરના વિદ્યાર્થીએ રાજ્ય કક્ષાએ કાઠું કાઢીને સમગ્ર પંથકનું ગૌરવ વધાર્યું છે. ઉપલેટાની એકમાત્ર સીબીએસઈ સ્કૂલ ‘ધ મધર્સ ઇન્ટરનેશનલ સ્કૂલ’માં ધોરણ-8માં અભ્યાસ કરતા યુગ દીપકભાઈ માકડિયાએ અમદાવાદ ખાતે યોજાયેલ રાજ્ય કક્ષાના ખેલ મહાકુંભમાં ચેસ સ્પર્ધામાં તૃતીય ક્રમ સાથે બ્રોન્ઝ મેડલ મેળવીને ઝળહળતી સફળતા પ્રાપ્ત કરી છે.
છેલ્લા 7 વર્ષથી ચેસની રમતમાં રુચિ ધરાવતો યુગ અગાઉ જિલ્લા કક્ષાએ 7 થી 8 વખત ‘ડિસ્ટ્રિક્ટ ચેમ્પિયન’ રહી ચૂક્યો છે. યુગના પિતા દીપકભાઈ માકડિયાના જણાવ્યા મુજબ, યુગે સખત પરિશ્રમ અને શાળાના સતત માર્ગદર્શનથી આ મુકામ હાંસલ કર્યો છે. રાજ્ય કક્ષાની સ્પર્ધામાં નેશનલ લેવલના પ્રોફેશનલ ખેલાડીઓ સામે બુદ્ધિચાતુર્ય બતાવીને યુગે આ મેડલ જીત્યો છે. ઉલ્લેખનીય છે કે, રાજ્ય કક્ષાએ મેડલ જીતવાની યુગની આ બીજી મોટી સિદ્ધિ છે.
આ પ્રસંગે શાળાના મેનેજિંગ ડિરેક્ટર રાજેન્દ્રસિંહ ઝાલાએ હર્ષ વ્યક્ત કરતા જણાવ્યું હતું કે, “અમારી શાળાનું લક્ષ્ય માત્ર પુસ્તકિયું જ્ઞાન આપવાનું નથી, પરંતુ વિદ્યાર્થીનો સર્વાંગી વિકાસ કરવાનું છે.
યુગની સફળતાએ સાબિત કર્યું છે કે ઉપલેટા જેવા નાના સેન્ટરના બાળકો પણ યોગ્ય માર્ગદર્શન મળે તો નેશનલ અને ઇન્ટરનેશનલ લેવલે પહોંચી શકે છે.”