કોઠારિયામાં વહેલી સવારે હિટ એન્ડ રન : અજાણ્યા વાહનની ટક્કરે યુવાનનું મોત
રોલેક્ષ કંપનીમાં નોકરીએ જતાં સમયે નડ્યો અકસ્માત
અગ્ર ગુજરાત, રાજકોટ
રાજકોટ શહેરમાં વહેલી સવારે હિટ એન્ડ રનની ગંભીર ઘટના સામે આવી છે. કોઠારીયા વિસ્તારમાં આવેલ ન્યુ સોમનાથ ઇન્ડસ્ટ્રીઝ નજીક અજાણ્યા વાહનની ટક્કરે બાઈકચાલક યુવાનનું મોત થતાં પરિવારમાં શોકનો માહોલ છવાઈ ગયો હતો. બનાવ અંગે પોલીસે તપાસ શરૂ કરી છે.
પ્રાપ્ત માહિતી મુજબ, મૂળ બિહારના વતની અને હાલ રાજકોટના કોઠારીયા સોલવંટ વિસ્તારમાં રહેતા 26 વર્ષીય નીતીશકુમાર કપિલદેવ પાસવાન આજે સવારે અંદાજે 6 વાગ્યાના આસપાસ પોતાનું બાઈક લઈને નોકરી માટે નીકળ્યો હતો. તે કોઠારીયા ઇન્ડસ્ટ્રીઝ વિસ્તારમાં આવેલ રોલેક્સ રીંગ કારખાનામાં કામ કરતો હતો. ન્યુ સોમનાથ ઇન્ડસ્ટ્રીઝ વિસ્તારમાં પહોંચતા જ કોઈ અજાણ્યા વાહનચાલકે તેને જોરદાર ટક્કર મારી હતી.
અકસ્માતની જાણ થતાં તાત્કાલિક 108 એમ્બ્યુલન્સને બોલાવવામાં આવી હતી, પરંતુ તપાસ બાદ તબીબોએ નીતીશકુમારને મૃત જાહેર કર્યો હતો. ઘટનાની માહિતી મળતા આજીડેમ પોલીસ સ્ટેશનના કર્મચારીઓ સ્થળ પર પહોંચ્યા હતા અને જરૂરી કાગળિયાત કાર્યવાહી હાથ ધરી હતી. બાદમાં મૃતદેહને પોસ્ટમોર્ટમ માટે રાજકોટ સિવિલ હોસ્પિટલ ખસેડવામાં આવ્યો હતો.
પરિવારજનોને જાણ થતાં તેઓ ઘટના સ્થળે દોડી આવ્યા હતા. પરિવારજનોના જણાવ્યા મુજબ, નીતીશકુમાર ત્રણ ભાઈ અને એક બહેનમાં વચેટ હતો. તેના લગ્ન ત્રણ વર્ષ અગાઉ થયા હતા અને પત્ની વતનમાં રહે છે. આકસ્મિક મોતની ખબર મળતા બિહારમાં રહેતા પરિવારજનોમાં પણ ભારે કલ્પાંત સર્જાયો હતો. પોલીસે હિટ એન્ડ રનની શંકા સાથે અજાણ્યા વાહનચાલકની શોધખોળ શરૂ કરી છે અને આસપાસના સીસીટીવી ફૂટેજની તપાસ હાથ ધરવામાં આવી છે.
