શાપરના કારખાનેદાર સાથે વિદેશી સપ્લાયના નામે સાયબર ઠગાઈ
22 ગાડી મેનહોલ કવરનો ઓર્ડર બતાવી 5,300 પડાવ્યા, શાપર-વેરાવળ પોલીસમાં ફરિયાદ
અગ્ર ગુજરાત, રાજકોટ
રાજકોટમાં ઉદ્યોગકારોને નિશાન બનાવી સાયબર ઠગાઈનો વધુ એક બનાવ સામે આવ્યો છે. વિદેશમાં મોટા પ્રમાણમાં સપ્લાયનો લોભ આપી 22 ગાડી મેનહોલ કવરનો ઓર્ડર હોવાનું જણાવી કારખાનેદાર પાસેથી રૂ.5,300 ઓનલાઇન ટ્રાન્સફર કરાવી લેવામાં આવ્યા હતા. ઠગાઈની જાણ થતાં મામલો શાપર-વેરાવળ પોલીસ સ્ટેશન સુધી પહોંચ્યો છે.
પ્રાપ્ત વિગતો મુજબ, મવડી ચોકડી નજીક ક્રિષ્ના પાર્ક સોસાયટીમાં રહેતા અને શાપર ખાતે રોયલ સ્ટીલ ઇન્ડસ્ટ્રીઝ નામે કારખાનું ચલાવતા ગૌતમભાઈ મગનભાઈ રામાણી (ઉ.વ.38)એ ફરિયાદ નોંધાવી છે. તેઓ ટાંકાના ઢાંકણા (મેનહોલ કવર) બનાવે છે. ગત તા.29ના રોજ બપોરે તેઓ અને તેમના ભાઈ કારખાને હતા ત્યારે અજાણ્યા નંબર પરથી વોટ્સએપ કોલ આવ્યો હતો.
કોલ કરનારાએ પોતાનું નામ “વિશાલ પટેલ” જણાવી પોતે કાઠમંડુથી બોલી રહ્યો હોવાનું કહ્યું હતું. તેણે દાવો કર્યો કે તેમની કંપની વિશ્વના અનેક દેશોમાં એફઆરપી મેનહોલ કવર સપ્લાય કરે છે અને દર મહિને 20થી 22 ગાડીની જરૂરિયાત છે. આટલી મોટી સપ્લાયથી ધંધામાં વધારો થવાની આશાએ કારખાનેદારે વાતચીત આગળ વધારી હતી.
પછી આરોપીએ નેપાળ બોર્ડર પર ગવર્નમેન્ટ એપ્રૂવલ અને સર્ટિફિકેટ માટે સરકારી સાઇટ પર રૂ.5,300 ઓનલાઇન ભરવાની વાત કરી હતી. તેણે મોકલેલા ક્યુઆર કોડ મારફતે રકમ ટ્રાન્સફર કરાવી લીધી હતી. ત્યારબાદ આરોપીનો ફોન અને વોટ્સએપ સંપર્ક બંધ થઈ જતા ઠગાઈની શંકા પક્કી થઈ હતી.
પીડિત કારખાનેદારે સૌપ્રથમ સાયબર હેલ્પલાઇન 1930 પર અરજી કરી હતી અને બાદમાં શાપર-વેરાવળ પોલીસ મથકમાં લેખિત ફરિયાદ નોંધાવી છે. પોલીસે અજાણ્યા સાયબર ઠગ સામે ગુનો નોંધી તપાસ શરૂ કરી છે અને વેપારીઓને આવા લોભામણા વિદેશી ઓર્ડર સામે સાવચેત રહેવાની અપીલ કરી છે.
