ધ્રોલ નજીક રાજકોટ હાઇ-વે પર ઇકોએ બાઇકને હડફેટે લેતા દિયર-ભાભીનાં મોત
દાહોદથી રોજી રોટી રળવા આવેલા પરિવારમાં કાળો કલ્પાંત સર્જાયો
અગ્ર ગુજરાત, ધ્રોલ
ધ્રોલ-રાજકોટ હાઈવે પર રાધે રેસીડેન્સી પાસે ગત મોડી રાત્રે એક કાળજું કંપાવનારો અકસ્માત સર્જાયો હતો. પુરપાટ ઝડપે અને ગફલતભરી રીતે આવતી એક ઈક્કો કારના ચાલકે આગળ જઈ રહેલા મોટરસાયકલને પાછળથી જોરદાર ટક્કર મારતા ગમખ્વાર અકસ્માત સર્જાયો હતો. આ અકસ્માતમાં બાઈક પર સવાર એક મહિલાનું ઘટનાસ્થળે જ કમકમાટીભર્યું મોત નીપજ્યું હતું, જ્યારે ગંભીર રીતે ઘવાયેલા પુરુષે સારવાર દરમિયાન દમ તોડતા એક જ પરિવારના બે સભ્યોના મોતથી અરેરાટી વ્યાપી ગઈ છે.
બનાવની વિગતો મુજબ, મૂળ દાહોદ જિલ્લાના લીમખેડા તાલુકાના કુણધા ગામના અને હાલ જામનગરના નાઘેડી ગામે મજૂરી કામ કરતા પ્રવીણભાઇ સોમાભાઇ ડામોર (ઉ.વ. ૨૭) એ ધ્રોલ પોલીસ મથકમાં ફરિયાદ નોંધાવી છે. ફરિયાદમાં જણાવ્યા અનુસાર, ગત તારીખ ૨૪/૦૩/૨૦૨૬ના રોજ રાત્રિના સમયે તેમના પિતા સોમાભાઇ અને તેમના કૌટુંબિક કાકી પોતાના મોટરસાયકલ (નંબર: GJ-10-R-1762) પર ધ્રોલ-રાજકોટ હાઈવે પરથી પસાર થઈ રહ્યા હતા. આ દરમિયાન રાધે રેસીડેન્સી પાસે પાછળથી આવતી ઈક્કો કાર (નંબર: GJ-03-LR-8976) ના ચાલકે પોતાના કબ્જાનું વાહન પૂરઝડપે અને બેફીકરાઈથી ચલાવી બાઈકને પાછળથી ઠોકર મારી હતી.
આ અકસ્માત એટલો ભયાનક હતો કે બાઈક પર પાછળ બેસેલા ફરિયાદીના કૌટુંબિક કાકીને માથાના ભાગે ગંભીર ઈજાઓ પહોંચતા તેમનું સ્થળ પર જ કરુણ મોત નીપજ્યું હતું. જ્યારે ફરિયાદીના પિતા સોમાભાઇને માથામાં અને શરીરે ગંભીર ઈજાઓ થતા તાત્કાલિક જામનગરની જી.જી. હોસ્પિટલ ખાતે ખસેડવામાં આવ્યાહતા, જ્યાં ટૂંકી સારવાર બાદ તેમનું પણ અવસાન થયું હતું. અકસ્માત સર્જ્યા બાદ માનવતા નેવે મૂકી ઈક્કો કારનો ચાલક પોતાની ગાડી લઈને ઘટનાસ્થળેથી નાસી છૂટ્યો હતો.
આ મામલે ધ્રોલ પોલીસે ઈક્કો કાર (GJ-03-LR-8976) ના ચાલક ગુનો દાખલ કર્યો છે. હાલ આ કેસની વધુ તપાસ એ.એસ.આઈ. ડી.જે. ગાગીયા ચલાવી રહ્યા છે
