ઉપલેટામાં સમસ્ત મેમણ જમાતની ચૂંટણીના પરિણામો જાહેર: સલીમ બાટવાવાળા વિજેતા

ઉપલેટામાં સમસ્ત મેમણ જમાતની ચૂંટણીના પરિણામો જાહેર: સલીમ બાટવાવાળા વિજેતા

કારોબારીની ૨૧ બેઠકો માટે યોજાયેલી ચૂંટણીમાં તમામ ૨૫ ઉમેદવારોને મળેલા મતોની સત્તાવાર વિગતો જાહેર

અગ્ર ગુજરાત, ઉપલેટા

ઉપલેટા શહેરમાં સમસ્ત મેમણ જમાતની કારોબારી સમિતિના નવા હોદ્દેદારોની વરણી માટે ખૂબ જ ઉત્સાહપૂર્ણ માહોલમાં અને લોકશાહી ઢબે ચૂંટણી પ્રક્રિયા સંપન્ન થઈ છે. જમાતના બંધારણ અનુસાર દર ત્રણ વર્ષે યોજાતી આ ચૂંટણીમાં રવિવારે સવારે ૯:૦૦ વાગ્યાથી સાંજના ૫:૦૦ વાગ્યા સુધી સ્થાનિક મુસ્લિમ હાઈસ્કૂલ ખાતે મતદાન યોજાયું હતું.

ચૂંટણી કમિશનર મક્કી ઉર્ફે લાલાભાઈ હડફાની પ્રત્યક્ષ દેખરેખ હેઠળ કુલ ૨૦૮૪ નોંધાયેલા પુરુષ મતદારો માટે બે વિશેષ મતદાન બૂથ ઊભા કરવામાં આવ્યા હતા. આ પ્રક્રિયામાં તમામ મતદારોએ તેમને આપવામાં આવેલા યુનિક આઈડી કાર્ડ રજૂ કરીને અત્યંત શાંતિપૂર્ણ અને નિર્ભય વાતાવરણમાં પોતાના મતાધિકારનો ઉપયોગ કર્યો હતો. આશરે ૩૫ વ્યક્તિઓની ટીમે આ ચૂંટણીનું સફળ સંચાલન કર્યું હતું.

સાંજે મતદાન પૂર્ણ થયા બાદ હાથ ધરવામાં આવેલી મતગણતરીના સત્તાવાર આંકડા જાહેર કરાયા છે જેમાં ચૂંટણીના અંતિમ પરિણામો મુજબ ૨૫ ઉમેદવારોને મળેલા મતોની વિગત જોઈએ તો, સલીમ બાટવાવાળાએ સૌથી વધુ ૭૭૧ મતો મેળવી પ્રથમ ક્રમ પ્રાપ્ત કર્યો છે. ત્યારબાદ અલ્તાફ દોસાણી (૬૯૧), સાલેહમોહમ્મદ બગસરાવાળા (૬૭૫), અરફાત કાસમાણી (૬૬૨) અને અયુબ કટલરીવાળા (૬૩૮) અનુક્રમે ટોપ પાંચમાં રહ્યા છે. આ ઉપરાંત અન્ય ચૂંટાયેલા વિજેતા સભ્યોમાં સોયબ ચોટેરી (૬૩૪), મુનાફ ચણા (૬૩૦), અશરફ જુમાની (૬૦૫), ઝાકીર પારેખ (૬૦૪), મોહમ્મદ હુસેન કટાલિયા (૫૮૭), અબ્દુલ રહેમાન શિવાની (૫૮૪), શકીલ આલન (૫૭૮), જાવેદ ભોજાણી (૫૭૮), વાહીદ કોડી (૫૭૧), ફૈઝલ નતાણી (૫૬૫), મોહસીન બગસરાવાળા (૫૬૧), ઈરફાન પાટણવાવવાળા (૫૫૯), મક્કી શિવાની (૫૪૩), ઈમરાન બાટવાવાળા (૫૪૦), વાહીદ નથાણી (૫૨૧) અને ૨૧મા ક્રમે રફીક કજલિયાવાળા (૫૧૮) નો સમાવેશ થાય છે. જ્યારે અન્ય ઉમેદવારો પૈકી અખ્તર ચણાને ૪૫૩ મતો, ભોલા પાગલને ૪૦૮ મતો, તૌફીક બકાલીને ૩૮૧ મતો અને અનવર ઢાંકવાળા ૨૨૪ મતો મળ્યા હતા, જેઓ અન્યની સરખામણીમાં થોડા ઓછા મતો મેળવીને કારોબારીની રેસમાં પાછળ રહ્યા છે.

સમગ્ર ચૂંટણી પ્રક્રિયા કોઈપણ પ્રકારના વિવાદ વિના ખૂબ જ પારદર્શક અને સૌહાર્દપૂર્ણ વાતાવરણમાં પૂર્ણ થઈ છે. પ્રથમ ૨૧ ક્રમ સુધીના ઉમેદવારો જમાતની નવી કારોબારી સમિતિમાં સભ્ય તરીકે નિયુક્ત થયા છે. હવે આગામી સમયમાં, આ ચૂંટાયેલા ૨૧ સભ્યોની ટીમ સાથે મળીને સર્વાનુમતે જમાતના નવા પ્રમુખ, ઉપપ્રમુખ અને અન્ય મુખ્ય હોદ્દેદારોની વિધિવત પસંદગીની પ્રક્રિયા હાથ ધરશે ત્યારે આ માટે ખડે પગે રહેલ તમામ સ્ટાફ, સેવકો અને આયોજકો દ્વારા નિષ્પક્ષ કામ બદલ સૌ કોઈ ઉમેદવારોએ તેમની ખુબ પ્રશંસા કરી હતી.