અંબિકા ટાઉનશીપ અને કણકોટ રોડના વિસ્તારમાં વિતરણ થતું પાણી બેકટેરીયા મુકત
મહાપાલિકાના વોટરવર્કસ શાખાએ લીધેલ નમૂના પૈકી ત્રણ ફેલ : સુપર કલોરીન કરી ફરી લીધેલ સેમ્પલના રિપોર્ટ નોર્મલ
અગ્ર ગુજરાત, રાજકોટ
રાજકોટમાં ચોમાસા દરમિયાન ડહોળા પાણીની ફરિયાદો ઉઠતી હોય છે, પરંતુ આ વખતે વરસાદ ખેંચાતા ડેમમાં રહેલ ડેડ વોટર અને લીલના કારણે પાણી ગ્રીન કલરનું આવવાની ફરિયાદો વધી રહી છે, છતાં વોટરવર્કસ વિભાગે સેમ્પલિંગ કાર્યવાહી વધુ સઘન બનાવવા છતાં ટેસ્ટિંગ દરમિયાન ફરી વખત વોર્ડ નંબર 11ના અંબિકા ટાઉનશિપ તથા કણકોટ રોડ સહિતના અનેક વિસ્તારોમાં બેક્ટેરિયાયુક્ત પાણીનું વિતરણ થયાનું મનપાના સત્તાવાર રિપોર્ટમાં દર્શાવવામાં આવ્યું છે.
મહાનગરપાલિકાના વોટર મેનેજમેન્ટ યુનિટ દ્વારા ગત માસ દરમિયાન વેસ્ટ ઝોન, સેન્ટ્રલ ઝોન અને ઇસ્ટ ઝોનના અલગ અલગ વિસ્તારોમાં કરાતા પાણી વિતરણમાં ક્લોરિન, બેક્ટેરિયા અને કેમિકલની ચકાસણી કરવામાં આવી હતી અને સેમ્પલ લેવામાં આવ્યા હતા. તેમાં વેસ્ટ ઝોનમાં કણકોટ રોડ તથા અંબિકા ટાઉનશિપ સહિતના અમુક એપાર્ટમેન્ટ અને સોસાયટીમાંથી લેવાયેલા ત્રણ પાણીના સેમ્પલમાં બેક્ટેરિયા મળી આવ્યા હતા.
આથી તંત્રએ આ વિસ્તારમાં સપ્લાય થતા પાણીનું સુપર ક્લોરિન કરી ફરી સેમ્પલ લઈ લેબ ટેસ્ટ કરવામાં આવ્યા છે. જે રિપોર્ટ નોર્મલ આવ્યો હોવાનું અને પાણી શુદ્ધ તથા પીવાલાયક હોવાનું વોટરવર્કસ વિભાગે જણાવ્યું છે.
વોટર મેનેજમેન્ટ વિભાગ દ્વારા પ્રસિદ્ધ કરાયેલા સત્તાવાર આંકડા મુજબ વેસ્ટ ઝોનમાંથી 3114, સેન્ટ્રલ ઝોનમાંથી 1484, સેમ્પલના ક્લોરિન ટેસ્ટ કરવામાં આવ્યા હતા. આમાંથી એકપણ ઝોનમાં ક્લોરિનનું પ્રમાણ ઓછું જણાયું નથી. આવી જ રીતે, વેસ્ટ ઝોનમાંથી 147 તથા સેન્ટ્રલ ઝોનમાંથી 58 અને ઈસ્ટ ઝોનમાંથી 61 સ્થળેથી બેક્ટેરિયોલોજિકલ સેમ્પલ લેવામાં આવ્યા હતા.
જેમાં વેસ્ટ ઝોનમાં ત્રણ સ્થળે નમૂના ફેલ થયા હતા.આવી જ રીતે વેસ્ટ ઝોનમાં 14, સેન્ટ્રલ ઝોનમાં 09 અને ઈસ્ટ ઝોનમાં 06 સ્થળેથી કેમિકલ સેમ્પલ લેવામાં આવ્યા હતા. આમાંથી એક પણ સ્થળે કેમિકલ સેમ્પલ અનફિટ જાહેર કરાયા નથી.
મહાનગરપાલિકાના વોટર મેનેજમેન્ટ યુનિટ દ્વારા 7228 રેસિડ્યુઅલ ક્લોરિન, 262 બેક્ટેરિયોલોજિકલ અને 29 સ્થળેથી કેમિકલ સેમ્પલ મળીને કુલ 7519 સેમ્પલ લેવામાં આવ્યા છે.
