જૂનાગઢની બહાઉદ્દીન કોલેજના વિદ્યાર્થીઓનું ઇન્ડિયન બજેટ કવેસ્ટમાં શ્રેષ્ઠ પ્રદર્શન
કોલેજ દ્વારા વિદ્યાર્થીઓનું સન્માન કરાયું
અગ્ર ગુજરાત, જૂનાગઢ
ગાંધીનગર ખાતે આયોજીત ‘ઇન્ડિયન બજેટ ક્વેસ્ટ’માં જૂનાગઢની ઐતિહાસિક બહાઉદ્દીન સરકારી વિનયન કૉલેજના ચાર તેજસ્વી વિદ્યાર્થીઓએ ઉત્કૃષ્ટ દેખાવ કરી સંસ્થા અને શહેરનું ગૌરવ વધાર્યું છે. ત્રણ મુખ્ય ચરણોમાં યોજાયેલી આ સ્પર્ધાની શરૂઆત ‘ઓનલાઇન ક્વિઝ’થી થઈ હતી. તેને પાર કર્યા બાદ, દ્વિતીય સોપાનમાં વિષયને અનુરૂપ ‘નિબંધ લેખન’ સબમિટ કરવાનો હતો. આ બંને પ્રક્રિયાઓમાં શ્રેષ્ઠ પ્રદર્શન કરીને પસંદગી પામેલા વિદ્યાર્થીઓએ રૂબરૂ ગાંધીનગર જઈને અંતિમ ચરણમાં ભાગ લીધો હતો. આ અંતર્ગત વિદ્યાર્થીઓએ ગાંધીનગર સ્થિત ‘રાષ્ટ્રીય ફોરેન્સિક વિજ્ઞાન યુનિવર્સિટી’ ખાતે યોજાયેલ ‘નારી વંદના શક્તિ’ કાર્યક્રમ તેમજ ‘સ્પોર્ટ્સ ઓથોરિટી ઓફ ઇન્ડિયા’ ખાતે આયોજિત વિવિધ સત્રોમાં ઉત્સાહભેર સહભાગીદારી નોંધાવી હતી.
આ ત્રણેય કઠિન પડાવો સફળતાપૂર્વક પસાર કરી અંતિમ મુકામ સુધી પહોંચનાર બહાઉદ્દીન સરકારી વિનયન કૉલેજના ચાર વિદ્યાર્થીઓમાં હરિયાણી હિતાક્ષી, ભેટારીયા ડોલી, બામણીયા હાર્દિક અને સુખાનંદી ભાર્ગવનો સમાવેશ થાય છે. ગાંધીનગરથી આ કાર્યક્રમ પૂર્ણ કરી પરત ફર્યા બાદ આજ રોજ તારીખ ૨૦ એપ્રિલ, ૨૦૨૬ ના રોજ તમામ વિદ્યાર્થીઓએ અત્રેની કોલેજ ખાતે મુલાકાત લીધી હતી. વિદ્યાર્થીઓની આ ગૌરવવંતી સિદ્ધિ પર રાજીપો વ્યક્ત કરતા કોલેજના આચાર્ય ડૉ. જે. આર. વાંઝાએ પોતાના શુભેચ્છા સંદેશમાં જણાવ્યું હતું કે, “આપણા વિદ્યાર્થીઓએ રાજ્યકક્ષાએ પોતાના જ્ઞાન અને કૌશલ્યનું શ્રેષ્ઠ પ્રદર્શન કરીને સંસ્થાનું નામ રોશન કર્યું છે. તેમની આ ઝળહળતી સિદ્ધિ અને મહેનત કોલેજના અન્ય વિદ્યાર્થીઓ માટે પણ પ્રેરણાદાયક બની રહેશે.” આ તકે સિનિયર અધ્યાપક ડૉ. પી. વી. બારસીયા અને ડૉ. કે. પી. બાકુએ પણ આ યુવાઓને ભવિષ્યની વિશેષ પ્રગતિ માટે હાર્દિક શુભેચ્છાઓ પાઠવી હતી. આ સમગ્ર પ્રક્રિયામાં પ્રોગ્રામ ઓફિસર પ્રો. ભાવિક ચાવડાએ સ્પર્ધકોને સતત માર્ગદર્શન પૂરું પાડી પ્રોત્સાહિત કર્યા હતા. આ સફળતાથી સમગ્ર કૉલેજ પરિવારમાં હર્ષની લાગણી છવાઈ છે.
