ભાજપના હારેલા ઉમેદવારોએ રસ્તાઓ તોડ્યા, લાઈટના વિજપોલ ઉધેડ્યા, ધોકા લઈને નિકળ્યા
છોટા ઉદેપુરના મોટી સઢલી, દાતાના ગ્રામ્ય વિસ્તારનો વિડિયો સોશિયલ મીડિયામાં વાયરલ
અગ્ર ગુજરાત, છોટા ઉદેપુર
સ્થાનિક સ્વરાજ્યની ચૂંટણીમાં તમામ સંસ્થાઓમાં ભાજપનો ભગવો લહેરાયો છે. ભાજપના ઉમેદવારો વિજેતા થયા છે પરંતુ ભાજપના હારેલા ઉમેદવારોએ લોકોને ધમકાવવાનું શરૂ કર્યું હોવાના ફોટા અને વિડિયો વાયરલ થયા છે.
ગુજરાત સ્થાનિક સ્વરાજ્યની ચૂંટણીના પરિણામોમાં ભાજપનું પલડું ભારે રહ્યું છે. BJP ના વિજેતા ઉમેદવારોએ ઉજવણી કરી તો બીજી તરફ હારેલા ઉમેદવારો ગુસ્સે ભરાયા છે અને તેમની હરકતો મીડિયામાં ચમકી રહી છે. હાર સહન નહીં કરી શકનારા ઉમેદવારોએ રોડ ખોદી નાંખવા, વીજળીના થાંભલા ઉખાડવા આદેશ આપ્યા તો ક્યાંક ગામનું પાણી બંધ કરી દેવાની અને દૂધ મંડળીમાં દૂધ નહીં લેવાની ધમકીઓ આપી રહ્યાં છે.
છોટા ઉદેપુર તાલુકાના મોટી સઢલી જિલ્લા પંચાયત બેઠકના ભાજપના ઉમેદવાર અશોક રાઠવા હારી ગયા છે. તેમની હાર બાદ કેટલાંક લોકો JCB મશીન અને હાથમાં દંડા લઈને ગામમાં આવ્યા હતા અને તાજેતરમાં બનાવવામાં આવેલા આર.સી. રોડને વચ્ચેથી તોડી નાંખ્યો છે. ભરૂચના જંબુસર તાલુકા પંચાયતની કાવી-2 બેઠકનો પરાજિત ભાજપના ઉમેદવારનો તલવાર સાથેનો વીડિયો સોશિયલ મીડિયામાં વાયરલ થયો છે. તેણે ગામનું પાણી બંધ કરાવી દેવાની ધમકી આપી છે.
બનાસકાંઠા જિલ્લાના દાંતામાં એક ગામમાં થયેલા મતદાનમાં 60 ટકા મત ભાજપ અને બાકી 40 ટકા વિરોધ પક્ષને પડ્યા હતા. આ કારણસર દૂધ મંડળીએ કહ્યું કે, ગ્રામજનોએ 100 ટકા મત ભાજપને આપ્યા નથી એટલે આજથી તમારૂં દૂધ ભરવાનું બંધ કરી દેવામાં આવશે. આથી સમગ્ર મામલો પોલીસ પાસે ગયો છે. દાહોદના ઝાલોદમાં ભાજપનો ઉમેદવાર હારી જતાં કેટલાંક કાર્યકરોએ ગામમાં લાગેલા વીજળીના થાંભલા ઉખાડી ફેંક્યા હતા.
