મંગેતરના દગાથી તૂટી પડી યુવતી, ફિનાઈલ પી કર્યો આપઘાતનો પ્રયાસ

મંગેતરના દગાથી તૂટી પડી યુવતી, ફિનાઈલ પી કર્યો આપઘાતનો પ્રયાસ

સગાઈ બાદ લગ્નના વચન આપી શારીરિક સંબંધ બાંધ્યા, બાદમાં લગ્નથી ઇનકાર કરતાં 20 વર્ષની યુવતી રાજકોટ સિવિલમાં સારવાર હેઠળ

અગ્ર ગુજરાત, રાજકોટ

ચોટીલાની એક 20 વર્ષીય યુવતીએ મંગેતર દ્વારા લગ્નના વચનો તોડી દેવામાં આવ્યા હોવાના આક્ષેપ વચ્ચે ફિનાઈલ પી આપઘાતનો પ્રયાસ કરતાં તેને ગંભીર હાલતમાં સારવાર માટે રાજકોટ સિવિલ હોસ્પિટલમાં ખસેડવામાં આવી છે. સમગ્ર મામલે યુવતીએ પોતાના મંગેતર સામે વિશ્વાસઘાત અને છેતરપિંડીના આક્ષેપો કર્યા છે, જ્યારે પોલીસે યુવતીનું નિવેદન નોંધવાની કાર્યવાહી હાથ ધરી છે.
મળતી માહિતી મુજબ ચોટીલાના સાંઈધામ સોસાયટી વિસ્તારમાં રહેતી યુવતીએ ગઈકાલે સાંજના સમયે પોતાના ઘરે ફિનાઈલ પી લીધું હતું. ઘટનાની જાણ થતાં પરિવારજનોએ તાત્કાલિક તેને ચોટીલાની સરકારી હોસ્પિટલમાં પહોંચાડી હતી. ત્યાં પ્રાથમિક સારવાર બાદ વધુ સારવારની જરૂર જણાતા યુવતીને રાજકોટ સિવિલ હોસ્પિટલમાં રીફર કરવામાં આવી હતી.
પરિવારના જણાવ્યા અનુસાર યુવતીની સગાઈ વાંકાનેરના એક યુવાન સાથે થઈ હતી. સગાઈ બાદ બંને પરિવારો વચ્ચે આવનજાવન શરૂ થઈ હતી. આ દરમિયાન યુવકના પરિવારમાં યોજાયેલા એક લગ્ન પ્રસંગમાં યુવતીને પણ બોલાવવામાં આવી હતી, જ્યાં તે કેટલાક દિવસ સુધી રોકાઈ હતી.
યુવતીનો આક્ષેપ છે કે તે દરમિયાન યુવકે લગ્ન તો નક્કી જ છે તેવી ખાતરી આપીને નજીકતા વધારી હતી અને શારીરિક સંબંધ બાંધ્યા હતા. ત્યારબાદ થોડા સમય સુધી બધું સામાન્ય ચાલ્યું, પરંતુ પછી યુવકનું વર્તન બદલાઈ ગયું હતું. અંતે તેણે લગ્ન કરવાની ના પાડી દેતાં યુવતીને ભારે માનસિક આઘાત પહોંચ્યો હતો.
પોતાના ભાવિ પતિ તરીકે જેને સ્વીકાર્યો હતો તે જ વ્યક્તિએ દગો આપ્યાની લાગણીથી વ્યથિત બનેલી યુવતીએ અંતિમ પગલું ભર્યાનું પરિવારજનોએ જણાવ્યું હતું. હાલ યુવતી રાજકોટ સિવિલ હોસ્પિટલમાં સારવાર હેઠળ છે અને પોલીસ દ્વારા સમગ્ર ઘટનાક્રમ અંગે વધુ તપાસ હાથ ધરવામાં આવી છે.