મોરબી મહાપાલિકામાં ‘ડિજિટલ’ ભ્રષ્ટાચાર: 13 શખ્સો સામે ગુનો દાખલ
કર્મચારીઓની ગેરહાજરી છતાં ઓનલાઈન સિસ્ટમમાં હાજરી પુરાવી આચરવામાં આવતું કૌભાંડ
અગ્ર ગુજરાત, મોરબી
મોરબી મહાપાલિકામાં રોજમદાર કર્મચારીઓની હાજરીમાં મોટા પાયે કૌભાંડ સામે આવ્યું છે. કામ ન કરતા કર્મચારીઓની પણ ઓનલાઈન હાજરી પુરીને તેમના બેંક ખાતામાં નાણાં જમા કરાવવામાં આવતા હતા. આ મામલે મહાપાલિકાના ડેપ્યુટી ઇજનેરે 13 શખ્સો વિરુદ્ધ પોલીસ ફરિયાદ નોંધાવી છે.
મહાપાલિકામાં ગુટલીબાજ કર્મચારીઓને પકડવા માટે ઓનલાઈન એટેન્ડન્સ સિસ્ટમ લાગુ કરવામાં આવી હતી. જોકે, કેટલાક કર્મચારીઓ દ્વારા પોતાના ઉપરાંત અન્ય રોજમદાર કર્મચારીઓની પણ હાજરી પૂરવામાં આવતી હતી. આમાં એવા કર્મચારીઓનો પણ સમાવેશ થતો હતો જેણે ખરેખર કોઈ કામ કર્યું ન હતું. રાજકોટના દીપભાઈ સુરેશભાઈ ફળદુ, જે મોરબી મહાપાલિકામાં ડેપ્યુટી ઇજનેર તરીકે ફરજ બજાવે છે, તેમણે મોરબી સિટી A ડિવિઝન પોલીસ સ્ટેશનમાં આ અંગે ફરિયાદ નોંધાવી છે.
ફરિયાદમાં મંદિપ ચાવડા (નાની વાવડી), વિમલભાઈ બાવળીયા (લક્ષ્મી સોસાયટી, મોરબી), અભયભાઈ છબીલભાઈ ચૌહાણ (રામકૃષ્ણનગર, મોરબી), સુનિલભાઈ ભરતભાઈ મકવાણા (અનુ જાતિવાસ, મોરબી), રોહિતભાઈ ધીરુભાઈ (મોરબી), લલિતભાઈ કુમારભાઈ ચાવડા (મોરબી), સંજયભાઈ ઘનશ્યામભાઈ ચાવડા (મોરબી) અને રાજેશભાઈ (મોરબી) સહિત 13 શખ્સોના નામનો ઉલ્લેખ છે. આ તમામ સામે વિશ્વાસઘાત અને નાણાકીય ઉચાપતનો ગુનો નોંધવામાં આવ્યો છે.
મહાપાલિકાના ડેપ્યુટી કમિશનર કુલદીપસિંહ વાળાના ધ્યાન પર આવ્યું હતું કે રોજમદાર કર્મચારીઓ પોતાના નામ સિવાય અન્ય કર્મચારીઓના નામની હાજરી પૂરી રહ્યા છે, જેનાથી મહાપાલિકાને આર્થિક નુકસાન થઈ રહ્યું છે. જુદી જુદી શાખાઓમાં હાજરીની ચકાસણી કરતા એકથી વધુ કર્મચારીઓની ખોટી હાજરી પૂરવામાં આવતી હોવાનું સામે આવ્યું. ખાસ કરીને, તાજેતરમાં 5 અને 6 તારીખના હાજરી રજીસ્ટરના રિપોર્ટની ચકાસણીમાં ગેરરીતિઓ જોવા મળી હતી.
એટેન્ડન્સ મશીનમાં પણ કેટલાક કર્મચારીઓ પોતાના નામ સિવાય અન્ય કર્મચારીઓની હાજરી પોતાની આંગળી અને ફેસનો ઉપયોગ કરીને પૂરી દેતા હતા. આ રીતે, જે વ્યક્તિઓ નોકરી કરતા ન હતા તેમની ખોટી રીતે હાજરી પુરીને સરકારી સંસ્થા સાથે વિશ્વાસઘાત અને નાણાકીય ઉચાપત કરવામાં આવી હતી. પોલીસે ગુનો નોંધીને આરોપીઓને પકડવા માટે વધુ તપાસ હાથ ધરી છે.
આ કૌભાંડમાં આરોપીઓ અત્યંત ચાલાકીથી હાજરી પૂરતા હતા. જેમાં આરોપી મંદિપ ચાવડા મશીનમાં લલિતકુમાર ચાવડા માટે જમણા હાથની આંગળી, રોહિતભાઈ માટે જમણા હાથની બીજી આંગળી, પોતાના માટે ફેસ અને જમણા હાથની પહેલી આંગળી તથા અભયભાઈ ચૌહાણ માટે ડાબા હાથની પહેલી આંગળી વડે હાજરી પૂરતો હતો. વિમલ બાવળીયા દ્વારા અંકુર કુંભારિયા, મહેશભાઈ, પ્રકાશભાઈ અને રાહુલભાઈ ડામોર સહિતના કર્મચારીઓ માટે અલગ-અલગ આંગળીઓનો ઉપયોગ કરી હાજરી પુરાતી હતી. જ્યારે અભય ચૌહાણ વર્કશોપમાં સંજયભાઈ ચાવડાની જમણા હાથના અંગૂઠાથી હાજરી ભરતો હતો.
