માર્કેટ યાર્ડની બેદરકારીના કારણે ખેડૂતોની મહેનત પર વરસાદી પાણી ફરી વળ્યું

માર્ચ મહિનાની શરૂઆત સાથે જ આજે વહેલી સવારથી રાજ્યના વિવિધ વિસ્તારોમાં કમોસમી વરસાદ ખાબક્યો છે. સૌરાષ્ટ્ર કચ્છ અને ઉત્તર ગુજરાતના ઘણા ભાગોમાં કમોસમી વરસાદના કારણે ખેડૂતોની ચિંતામાં વધારો થયો છે. જેમાં પણ બનાસકાંઠા અને પાટણમાં યાર્ડમાં રાખવામાં આવેલી જણસી પલળી ગઈ છે.

છેલ્લા થોડાં દિવસોથી હવામાન વિભાગ દ્વારા વરસાદ અંગે આગાહી કરવામાં આવી હતી. જેમાં ઉત્તર ગુજરાત અને સૌરાષ્ટ્રના વિવિધ ભાગોમાં વરસાદને લઈ માર્કેટિંગ યાર્ડને પણ ચેતવણી આપી તેમ છતાં ગંભીર બેદરકારી રાખવામાં આવી હોય તેવા દ્રશ્યો હાલમાં વરસેલા વરસાદના કારણે જોવા મળી રહી છે.

આ વચ્ચે હવામાન વિભાગની આગાહી અને સૂચના છતાં રાધનપુર ખુલ્લામાં રાખવામાં આવેલી જણસ પલળી છે. રાધનપુર માર્કેટ યાર્ડમાં જણસ પલળી જતાં ખેડૂતોને નિરાશ થવાનો વારો આવ્યો છે. જેમાં APMCમાં વેપારી તેમજ ખેડૂતની જણસ પલળી છે. રાધનપુર માર્કેટ યાર્ડની ગંભીર બેદરકારી સામે આવી છે. વેપારીઓએ ખેડૂતો પાસેથી ખરીદેલી જણસી તેમજ ખેડૂતોએ વેચવા માટે મુકેલ જણસી પલળી છે. જેમાં મુખ્યત્વે યાર્ડમાં રાખેલા એરંડા, ચણા, રાયડાનો પાક પલળ્યો છે.

જ્યારે બીજી તરફ ધાનેરાના બોર્ડર વિસ્તારના ગામડાઓમાં વરસાદના કારણે ખેડૂતોની હાલત ફરી મુશ્કેલ જોવા મળી રહી છે. બાપલા, વક્તાપુરા, માલોતરા, કુંડી સહિતના વિસ્તારોમાં વરસાદના કારણે તૈયાર પાકને નુકસાન થયેલું જોવા મળી રહ્યું છે. વીજળીના ચમકારા સાથે થયેલા વરસાદથી રાયડો, જીરું, વરિયાળી, બટાકા સહિતના પાકમાં નુકસાન થયું છે. તેમજ ભારે પવન સાથે વરસાદની શરૂઆતથી ખેડૂતો મુશ્કેલીમાં મુકાયા છે.

બનાસકાંઠાના થરામાં માર્કેટ યાર્ડની બેદરકારી સામે આવી છે. જેમાં ખુલ્લામાં મુકી રાખેલી જણસી પલળી છે. જેમાં વિવિધ તૈયાર થઇને આવેલા પાક માર્કેટ યાર્ડમાં પહોંચ્યો હતો. જેમાં વરસાદી પાણી ફરી વળ્યું છે, આ કારણે ખેડૂતો તેમજ વેપારીઓને રડવાનો વારો આવ્યો છે. હવામાન વિભાગની આગાહી બાદ પણ માર્કેટિંગ યાર્ડમાં તંત્ર દ્વારા બેદરકારી રાખી હોવાનું જોવા મળી રહ્યું છે.

કચ્છના ત્રણ તાલુકામાં ભારે વરસાદ પડ્યો છે. અંજારમાં દોઢ ઈંચ જેટલો વરસાદ ખાબકયો છે. વહેલી પરોઢથી કચ્છમાં અનેક વિસ્તારોમાં ઝાપટા પડી રહ્યા છે. જિલ્લામાં હવામાન વિભાગની આગાહી અન્વયે કમોસમી વરસાદ પડતા ખેડૂતોને આર્થિક ફટકો પડ્યો છે.ખાસ કરીને જીરું સહિતના પાકને નુકશાન થયું છે તેમજ આંબાના ઝાડ પર આવેલા મોર ખરી પડયા છે.

આ તરફ કચ્છ અને સૌરાષ્ટ્રમાં પણ સાર્વત્રિક કમોસમી વરસાદ જોવા મળી રહ્યો છે. માવઠાએ ધરતીપુત્રોની ચિંતા વધારી છે. ખંભાળિયા તેમજ દ્વારકા પંથક ના ગ્રામ્ય વિસ્તારમાં ગાજવીજ સાથે કમોસમી વરસાદ ખાબક્યો છે. રાજકોટના ગ્રામ્ય પંથકમાં કમોસમી વરસાદ વરસ્યો છે. આ દરમિયાન પડધરી, તરઘડી સહિતના ગામોમાં વરસાદ પડ્યો છે.