શિક્ષણમંત્રી જે જિલ્લાના પ્રભારી છે ત્યાં જ ધમધમતું એજયુકેશન કૌભાંડ ઝડપાયું
જૂનાગઢની ગુજરાત એજયુકેશન સંસ્થામાં પૈસા આપી પાસનું રીઝલ્ટ મેળવવાની ગેરંટી
પોલીસના દરોડામાં મળ્યા વિદ્યાર્થીઓના ઓરીજનલ પ્રમાણપત્રોના થપ્પા : સંચાલકની આકરી પુછપરછ
અગ્ર ગુજરાત, જૂનાગઢ
રાજયમાં ગુણવત્તાસભર શિક્ષણ અને કાળો કારોબાર થતો હોવાનું કૌભાંડ રાજયના શિક્ષણમંત્રી પ્રધ્યુમન વાજા જે જિલ્લાના પ્રભારી છે તે જૂનાગઢ જિલ્લામાંથી ઝડપાતા ચકચાર મચી જવા પામી છે પૈસા આપી પાસ કરાવવાનું કૌભાંડ સામે આવતા પોલીસ દોડતી થઇ છે અને સંસ્થામાં દરોડા પાડયાં છે.
જૂનાગઢ શહેર અને જિલ્લામાં છેલ્લા ઘણા સમયથી શિક્ષણના નામે મોટો વેપલો ચાલતો હોવાની આશંકા સેવાઈ રહી હતી, જેનો પર્દાફાશ થતાં સમગ્ર રાજ્યના શિક્ષણ જગતમાં અને વહીવટી તંત્રમાં ભારે ખળભળાટ મચી ગયો હતો. જૂનાગઢ પોલીસ તાત્કાલિક એક્શન મોડમાં આવી ગઈ હતી. મોડી રાત સુધી જૂનાગઢ રેલવે સ્ટેશન પાછળ આવેલા મેરી ગોલ્ડ કોમ્પ્લેક્સમાં પોલીસે ધામા નાખ્યા હતા અને ત્યાં ધમધમતી ‘ગુજરાત એજ્યુકેશન’ નામની સંસ્થા પર સઘન તપાસ હાથ ધરી હતી, જે કાર્યવાહી મોડી રાત સુધી ચાલુ રહી હતી.
પોલીસની ટીમ ગુજરાત એજ્યુકેશન નામની આ સંસ્થાની ઓફિસે પહોંચી ત્યારે નાસભાગ જેવો માહોલ સર્જાયો હતો. ઓફિસમાં કામ કરતો અન્ય સ્ટાફ ઘરે જતો રહ્યો હતો, પરંતુ આ કાળા કારોબારનો મુખ્ય સંચાલક દર્શન મેસવાણિયા ત્યાં જ હાજર મળી આવ્યો હતો. અચાનક પોલીસને પોતાની સામે જોઈને દર્શન મેસવાણિયાના હોશ ઊડી ગયા હતા અને તે ગેંગે ફેફે કરવા લાગ્યો હતો. પોલીસ અધિકારીઓએ જ્યારે તેની પૂછપરછ શરૂ કરી ત્યારે એક પણ સવાલનો યોગ્ય કે સંતોષકારક જવાબ આપી શક્યો નહીં. સંચાલકની આવી શંકાસ્પદ હિલચાલ અને ગલ્લાતલ્લાં જોઈને પોલીસને સમગ્ર મામલે મોટી ગેરરીતિની દ્રઢ શંકા ગઈ હતી, જેના કારણે પોલીસે કાયદાકીય સકંજો વધુ મજબૂત કરીને ઓફિસના ખૂણેખૂણા ફેંદવાનું શરૂ કર્યું હતું. હાલ તો સમગ્ર મામલે SOGને તપાસ સોંપાઈ છે.
પોલીસના સર્ચ ઓપરેશન દરમિયાન ગુજરાત એજ્યુકેશનની ઓફિસમાંથી અનેક ચોંકાવનારા પુરાવાઓ હાથ લાગ્યા છે. ઓફિસની અંદરથી ગુજરાતના અલગ-અલગ જિલ્લાઓ અને તાલુકાઓના અસંખ્ય વિદ્યાર્થીઓના ઓરીજનલ દસ્તાવેજો મળી આવ્યા છે, જેમાં ધોરણ 10 અને 12ની અસલી માર્કશીટો, શાળા છોડ્યાનું પ્રમાણપત્ર એટલે કે લિવિંગ સર્ટી અને જન્મના પ્રમાણપત્રો જેવા મહત્વના કાગળોનો મોટો જથ્થો સામેલ છે. એટલું જ નહીં, આ શિક્ષણ માફિયાઓના તાર છેક બીજા રાજ્યો સાથે જોડાયેલા હોવાના પણ શંકા સેવાય રહી છે. પોલીસને તપાસ દરમિયાન ઘણા ઓરીજનલ દસ્તાવેજો હાથે લાગ્યા છે. આ તમામ શંકાસ્પદ સામગ્રીની સાથે પોલીસે પુરાવાનો નાશ ન થાય તે માટે ઓફિસમાં લગાવેલા સીસીટીવી કેમેરાનું ડીવીઆર (DVR), મોબાઈલો અને તમામ ઓરીજનલ દસ્તાવેજો જપ્ત કર્યા છે. ઓફિસમાં સીસીટીવી કેમેરા લાગેલા હોવાથી હવે સંચાલક દર્શન મેસવાણિયા માટે કોઈ પણ પુરાવા છુપાવવા કે તેનો નાશ કરવો અશક્ય બની જશે.
આ સમગ્ર કૌભાંડની મોડસ ઓપરેન્ડી એટલી હદે પદ્ધતિસરની અને આશ્ચર્યજનક હતી કે શિક્ષણ વ્યવસ્થા લજવાઈ જાય. આ આખા ખેલની શરૂઆત ત્યારે થઈ જ્યારે ધોરણ 12 પાસ કરેલા એક વિદ્યાર્થીના વાલી પર જૂનાગઢની આ ગુજરાત એજ્યુકેશન નામની સંસ્થામાંથી એક યુવતીનો ફોન આવ્યો હતો. ફોન પર વાત કરતી યુવતીએ વાલીને લાલચ આપતા સીધું જ જણાવ્યું હતું કે, તમારો દીકરો ધોરણ 12માં પાસ થઈ ગયો છે, તો શું તેને આગળ કોલેજમાં એડમિશન લેવડાવવું છે? જો એડમિશન લેવું હોય તો અમારો સંપર્ક કરજો કારણ કે અમે કોલેજના તમામ પ્રકારના કોર્સ કરાવી આપીએ છીએ અને તેમાં વિદ્યાર્થીને પાસ કરાવવાની 100 ટકા લેખિત ગેરંટી આપીએ છીએ. આ સંસ્થાની ઓફર એટલી હદે ગેરકાયદેસર અને શરમજનક હતી કે વિદ્યાર્થીએ ક્યારેય કોલેજ ભણવા જવાની કે ક્લાસ ભરવાની કોઈ જરૂર જ રહેતી નથી, માત્ર પરીક્ષા આપવા જવાનું રહેશે અને ત્યાં પણ તેને યુનિવર્સિટી તરફથી જ માઇક્રો કોપી પૂરી પાડવામાં આવશે જેમાંથી જોઈને વિદ્યાર્થીએ માત્ર પેપર લખી નાખવાનું રહેશે.
ઓફિસના એડમિનિસ્ટ્રેશનમાં બેઠેલી યુવતીએ ગ્રાહક સામે ખુલાસા કર્યા હતા. આ એડમિન યુવતીએ માહિતી આપતા જણાવ્યું હતું કે જો કોઈ વિદ્યાર્થીને બી.એ. (BA) માં એડમિશન લેવું હોય તો તેની કુલ ફી 35,000 રૂપિયા થશે. આ ડિગ્રી મેળવવા માટે વિદ્યાર્થીએ સુરેન્દ્રનગરની એક યુનિવર્સિટીમાં પરીક્ષા આપવા માટે જવું પડશે અને ત્યાં પાસ થવાની સંપૂર્ણ જવાબદારી સંસ્થાની રહેશે, કારણ કે પરીક્ષાના સમયે ત્યાં પરીક્ષા કેન્દ્ર પર જ વિદ્યાર્થીઓને ખુલ્લેઆમ માઇક્રો કોપીઓ એટલે કે ચોરી કરવાનું મટીરીયલ પૂરું પાડવામાં આવશે અને તેમાંથી બેઠું જોઈને જ પેપર લખીને પરીક્ષા સરળતાથી પાસ કરી શકાશે. શિક્ષણ માફિયાઓની ગોઠવણ એટલી હદ સુધી પાકી અને સુવિધાજનક હતી કે સુરેન્દ્રનગર યુનિવર્સિટીમાં પાંચ દિવસની પરીક્ષા આપવા માટે જૂનાગઢથી જતાં વિદ્યાર્થીઓ માટે ત્યાં સ્પેશિયલ હોસ્ટેલમાં રોકાવાની વ્યવસ્થા પણ સંસ્થા દ્વારા જ કરવામાં આવતી હતી, જ્યાં એક દિવસના માત્ર 200 રૂપિયાના નજીવા દરે રહેવા અને ઉત્તમ જમવાની સગવડ અપાતી હતી જેથી વિદ્યાર્થીઓને ચોરી કરવામાં કોઈ ખલેલ ન પડે.
આ કાળા કારોબારમાં સૌથી ગંભીર અને ચિંતાજનક બાબત એ સામે આવી છે કે યુનિવર્સિટી તરફથી જે પરીક્ષામાં પ્રશ્નો પૂછાવાના હોય છે, તેનું અગાઉથી જ તૈયાર કરેલું જવાબોવાળું મટીરીયલ વિદ્યાર્થીને સીધું હાથમાં આપી દેવામાં આવતું હોવાનો દાવો કરાયો છે. વિદ્યાર્થીઓએ માત્ર એ માઇક્રો કોપી સામે રાખીને ઉત્તરોની નકલ કરીને પોતાના પેપરમાં ઉતારવાના હોય છે. આ શિક્ષણના સોદાગરો એવો ખુલ્લેઆમ દાવો કરતા હતા કે અમારું યુનિવર્સિટી પ્રશાસન અને ઉચ્ચ અધિકારીઓ સાથે સીધું આંતરિક સેટિંગ થયેલું હોવાથી જ અમે સો ટકા પાસ થવાની લેખિત ગેરંટી આપવા સક્ષમ છીએ.
ધો.૧૦ અને ૧૨ના છાત્રોને પણ મળતી ગેરંટી
આ સંસ્થા માત્ર કોલેજ જ નહીં, પરંતુ ધોરણ 10 અને 12ના વિદ્યાર્થીઓને પણ ગેરકાયદેસર રીતે પાસ કરાવવાનો મસમોટો કારોબાર ચલાવતી હતી. જો કોઈ વિદ્યાર્થીને સેન્ટ્રલ બોર્ડ એટલે કે સીબીએસઈ (CBSE) માંથી ધોરણ 10 પાસ કરવું હોય તો તેની પરીક્ષા જૂનાગઢમાં જ લેવાશે અને તેની ફી 22,000 રૂપિયા નક્કી કરાઈ હતી, જેમાં પાંચેય પેપરમાં માઇક્રો કોપી આપીને પાસ કરાવવાની ખાતરી અપાતી હતી. તેવી જ રીતે ધોરણ 12 આર્ટસ કે કોમર્સ માટે 25,000 રૂપિયા અને સૌથી મુશ્કેલ ગણાતા સાયન્સ પ્રવાહને પાસ કરાવવા માટે 35,000થી લઈને 65,000 સુધીની મસમોટી રકમ વસૂલવામાં આવતી હતી અને આ પરીક્ષાઓ માટે જૂનાગઢ જિલ્લાના જ વંથલી અને શાપુર જેવા પરીક્ષા કેન્દ્રો ગોઠવવામાં આવતા હોવાની વિગતો બહાર આવી છે.
