મૂડી રોકાણમાં ગુજરાત ફરી દેશનું બાદશાહ

નીતિ આયોગના ઈન્ડેક્સમાં ફરી ટોચ પર

મૂડી રોકાણમાં ગુજરાત ફરી દેશનું બાદશાહ

56.6 પોઈન્ટ સાથે પ્રથમ સ્થાન; 1,850 રોકાણકારોના અભિપ્રાયો આધારિત રેન્કિંગમાં મહારાષ્ટ્ર બીજા ક્રમે, વાઈબ્રન્ટ ગુજરાત મોડેલને વધુ એક માન્યતા

અગ્ર ગુજરાત, ગાંધીનગર

દેશમાં મૂડી રોકાણ માટે સૌથી અનુકૂળ રાજ્ય તરીકે ગુજરાતે ફરી એક વખત પોતાની આગવી ઓળખ મજબૂત બનાવી છે. નીતિ આયોગ દ્વારા જાહેર કરાયેલા ઇન્વેસ્ટમેન્ટ ફ્રેન્ડલીનેસ ઇન્ડેક્સમાં ગુજરાતે 56.6 પોઈન્ટ સાથે સમગ્ર દેશમાં પ્રથમ સ્થાન મેળવ્યું છે. ઉદ્યોગોને પ્રોત્સાહન, રોકાણકારોને અનુકૂળ નીતિઓ, મજબૂત ઈન્ફ્રાસ્ટ્રક્ચર, ઝડપી મંજૂરી પ્રક્રિયા અને ઔદ્યોગિક શાંતિ જેવા અનેક પરિબળોના આધારે ગુજરાતે દેશના અન્ય રાજ્યોને પાછળ છોડી દીધા છે.
નીતિ આયોગના આ ઇન્ડેક્સમાં મહારાષ્ટ્ર 53.7 પોઈન્ટ સાથે બીજા, તમિલનાડુ 53.3 સાથે ત્રીજા, ગોવા 53.1 સાથે ચોથા અને ઓડિશા 52.4 પોઈન્ટ સાથે પાંચમા સ્થાને રહ્યા છે. જ્યારે ઉત્તર-પૂર્વના કેટલાક રાજ્યો અને કેટલાક કેન્દ્રશાસિત પ્રદેશો સૌથી નીચેના ક્રમે રહ્યા છે. આ ઇન્ડેક્સ તૈયાર કરવા માટે દેશભરના 1,850 રોકાણકારો, ઉદ્યોગકારો અને ઉદ્યોગ સંગઠનોના પ્રતિનિધિઓના અભિપ્રાયો લેવામાં આવ્યા હતા. ઉપરાંત લગભગ 90થી વધુ માપદંડોના આધારે રાજ્યોનું મૂલ્યાંકન કરવામાં આવ્યું હતું. તેમાં સરકારની ઔદ્યોગિક નીતિ, રોકાણકારોને મળતી સહાય, જમીન ઉપલબ્ધતા, વીજળી અને માર્ગ જેવી માળખાકીય સુવિધાઓ, કાયદો-વ્યવસ્થા, કુશળ માનવબળ, વ્યવસાય શરૂ કરવાની સરળતા અને સરકારી સેવાઓની કાર્યક્ષમતાનો સમાવેશ કરવામાં આવ્યો હતો.
ગુજરાતમાં છેલ્લા બે દાયકાથી યોજાતી વાઈબ્રન્ટ ગુજરાત ગ્લોબલ સમિટના કારણે રાજ્યમાં દેશ-વિદેશના રોકાણકારોનો વિશ્વાસ સતત વધ્યો છે. હવે રાજ્ય સરકારે રીજનલ વાઈબ્રન્ટ સમિટ દ્વારા નાના શહેરો અને જિલ્લાઓ સુધી ઔદ્યોગિક વિકાસ પહોંચાડવાનો પ્રયાસ શરૂ કર્યો છે, જેના પરિણામે MSME ક્ષેત્ર તેમજ સ્થાનિક ઉદ્યોગોને પણ નવા અવસરો મળી રહ્યા છે.
અમદાવાદ અને ગાંધીનગર વચ્ચે વિકસેલું ગિફ્ટ સિટી આજે આંતરરાષ્ટ્રીય નાણાકીય સેવાઓનું કેન્દ્ર બની રહ્યું છે. વિદેશી રોકાણ, ફિનટેક, બેન્કિંગ અને ગ્લોબલ કંપનીઓની હાજરીના કારણે ગુજરાતની વૈશ્વિક ઓળખ વધુ મજબૂત બની રહી છે. બીજી તરફ દિલ્હી-મુંબઈ ઇન્ડસ્ટ્રીયલ કોરિડોર, ધોલેરા સ્પેશિયલ ઇન્વેસ્ટમેન્ટ રિજન, વિશ્વસ્તરીય બંદરો, હાઈવે નેટવર્ક અને લોજિસ્ટિક્સ સુવિધાઓ પણ રાજ્યને રોકાણ માટે વધુ આકર્ષક બનાવે છે.
નિષ્ણાતોના મતે, નીતિ આયોગના આ રેન્કિંગથી માત્ર ગુજરાતની સિદ્ધિને જ નહીં, પરંતુ દેશ-વિદેશના નવા રોકાણકારોમાં પણ રાજ્ય પ્રત્યે વધુ વિશ્વાસ ઉભો થશે. આગામી વર્ષોમાં ઉત્પાદન, ગ્રીન એનર્જી, સેમિકન્ડક્ટર, ડિફેન્સ મેન્યુફેક્ચરિંગ, ઈલેક્ટ્રોનિક્સ અને ડેટા સેન્ટર જેવા ક્ષેત્રોમાં ગુજરાત વધુ મોટું રોકાણ ખેંચી શકે તેવી આશા વ્યક્ત કરવામાં આવી રહી છે.

ટોપ-5 રોકાણકાર મિત્ર રાજ્યો

ગુજરાત – 56.6 પોઈન્ટ
મહારાષ્ટ્ર – 53.7 પોઈન્ટ
તમિલનાડુ – 53.3 પોઈન્ટ
ગોવા – 53.1 પોઈન્ટ
ઓડિશા – 52.4 પોઈન્ટ

90થી વધુ માપદંડોના આધારે થયું મૂલ્યાંકન

ઇન્ડેક્સમાં રોકાણ નીતિ, ઇઝ ઓફ ડૂઇંગ બિઝનેસ, ઔદ્યોગિક શાંતિ, ઈન્ફ્રાસ્ટ્રક્ચર, વીજળી, જમીન ઉપલબ્ધતા, કાયદો-વ્યવસ્થા, કુશળ માનવબળ, ડિજિટલ ગવર્નન્સ અને મંજૂરી પ્રક્રિયાની ઝડપ સહિત લગભગ 90 પરિમાણોનો સમાવેશ કરવામાં આવ્યો હતો.

1,850 રોકાણકારોના અભિપ્રાયને અપાયું મહત્વ

દેશભરના 1,850 ઉદ્યોગપતિઓ, રોકાણકારો અને ઉદ્યોગ સંગઠનોના પ્રતિસાદના આધારે રાજ્યોની કામગીરીનું મૂલ્યાંકન કરવામાં આવ્યું હતું, જેથી રેન્કિંગ માત્ર સરકારી માહિતી નહીં પરંતુ ઉદ્યોગજગતના અનુભવ પર પણ આધારિત રહે.

વાઈબ્રન્ટ ગુજરાત બન્યું સફળતાનું મોડેલ

2003થી શરૂ થયેલી વાઈબ્રન્ટ ગુજરાત સમિટે લાખો કરોડના રોકાણ માટેનો માર્ગ મોકળો કર્યો છે. હવે રીજનલ વાઈબ્રન્ટ સમિટ દ્વારા જિલ્લાવાર ઉદ્યોગ વિકાસને પ્રોત્સાહન આપવામાં આવી રહ્યું છે, જે નાના અને મધ્યમ ઉદ્યોગોને નવી તકો આપી રહ્યું છે.

ગિફ્ટ સિટીથી વૈશ્વિક ઓળખ મજબૂત

અમદાવાદ નજીક આવેલી ગિફ્ટ સિટી આજે આંતરરાષ્ટ્રીય નાણાકીય સેવા કેન્દ્ર તરીકે ઉભરી રહી છે. વૈશ્વિક બેન્કો, ફિનટેક કંપનીઓ અને વિદેશી સંસ્થાઓની વધતી હાજરી ગુજરાતને આંતરરાષ્ટ્રીય રોકાણનું મહત્વનું કેન્દ્ર બનાવી રહી છે.

આગામી સમયમાં આ ક્ષેત્રોમાં વધશે રોકાણ

ગ્રીન એનર્જી અને રિન્યુએબલ એનર્જી
સેમિકન્ડક્ટર મેન્યુફેક્ચરિંગ
ઇલેક્ટ્રોનિક્સ અને હાઈ-ટેક ઉત્પાદન
ડિફેન્સ મેન્યુફેક્ચરિંગ
ડેટા સેન્ટર અને ડિજિટલ ઈન્ફ્રાસ્ટ્રક્ચર
લોજિસ્ટિક્સ અને પોર્ટ આધારિત ઉદ્યોગો