ગુજરાતમાં આજથી હેલ્મેટ નિયમો પર કડક ઝુંબેશ, મહિના ભર ખાસ ચેકિંગ ડ્રાઇવ શરૂ
સરકારી કર્મચારીઓથી લઈને સામાન્ય વાહનચાલકો સુધી તમામ માટે ફરજિયાત પાલન, મોટા શહેરોમાં તબક્કાવાર અમલ
અગ્ર ગુજરાત, ગાંધીનગર
ગુજરાત રાજ્યમાં ટ્રાફિક નિયમોનું કડક પાલન સુનિશ્ચિત કરવા પોલીસ વિભાગ દ્વારા એક મહત્વપૂર્ણ નિર્ણય લેવામાં આવ્યો છે. રાજ્યભરમાં ૧ મે ૨૦૨૬થી ૩૧ મે ૨૦૨૬ સુધી ખાસ હેલ્મેટ ઝુંબેશ ચલાવવામાં આવશે, જેમાં દ્વિ-ચક્રી વાહન ચલાવનાર તેમજ પાછળ બેસનાર બંને માટે હેલ્મેટ પહેરવું ફરજિયાત રહેશે. આ એક મહિના સુધી ચાલનારી અભિયાન દરમિયાન નિયમોનું ઉલ્લંઘન કરનારાઓ સામે કડક કાર્યવાહી કરવામાં આવશે.
આ ઝુંબેશને વધુ અસરકારક બનાવવા માટે ખાસ કરીને સરકારી કચેરીઓમાં ફરજ બજાવતા અધિકારીઓ અને કર્મચારીઓ પર પણ ખાસ નજર રાખવામાં આવશે. તમામ સરકારી કચેરીઓના પ્રવેશદ્વાર પર ટ્રાફિક પોલીસને તૈનાત કરીને ત્યાં જ ચેકિંગ હાથ ધરાશે. જો કોઈ કર્મચારી હેલ્મેટ વિના ફરજ પર હાજર થતો જણાશે, તો તેના વિરુદ્ધ તાત્કાલિક કાર્યવાહી થશે. સરકાર દ્વારા આ પગલું લઈને સંદેશ આપવાનો પ્રયાસ કરવામાં આવ્યો છે કે નિયમો સૌ માટે સમાન છે.
આ સમગ્ર અભિયાન અંગે સૂચનાઓ સ્ટેટ ટ્રાફિક બ્રાન્ચ દ્વારા આપવામાં આવી છે, જેમાં દરેક શહેર અને જિલ્લામાં દૈનિક કામગીરીનો અહેવાલ તૈયાર કરવાની પણ ફરજ મૂકવામાં આવી છે. સંબંધિત અધિકારીઓએ રોજની કાર્યવાહીનો રિપોર્ટ તૈયાર કરીને બીજા દિવસે સવારે ૮ વાગ્યા સુધી ઈ-મેઈલ મારફતે મોકલવાનો રહેશે. આથી ઝુંબેશની અસરકારકતા અને પારદર્શિતા બંને જાળવી શકાય તેવો પ્રયાસ કરવામાં આવ્યો છે.
મહત્વપૂર્ણ બાબત એ છે કે આ ડ્રાઇવ માત્ર શહેર પૂરતી મર્યાદિત નથી, પરંતુ રાજ્યના તમામ જિલ્લાઓમાં અમલમાં મૂકવામાં આવી રહી છે. અગાઉ સુરતમાં હેલ્મેટ નિયમોની સફળ અમલવારીને ધ્યાનમાં રાખીને હવે અમદાવાદ, રાજકોટ અને વડોદરા સહિતના મોટા શહેરોમાં આ નિયમોને વધુ કડક બનાવવામાં આવ્યા છે. સાથે જ અન્ય જિલ્લાઓમાં પણ તબક્કાવાર અમલ શરૂ કરવામાં આવ્યો છે.
કાનૂની દૃષ્ટિએ જોવામાં આવે તો મોટર વાહન અધિનિયમ ૧૯૮૮ મુજબ દ્વિ-ચક્રી વાહનચાલકો માટે હેલ્મેટ ફરજિયાત છે. છતાં પણ ઘણા લોકો હજુ આ નિયમનું પાલન કરતા નથી, જેના કારણે માર્ગ અકસ્માતોમાં ઇજા અને મોતના કેસોમાં વધારો થાય છે. પોલીસ વિભાગનું માનવું છે કે આ ઝુંબેશથી લોકોમાં જાગૃતિ વધશે અને અકસ્માતોમાં ઘટાડો થશે.
રાજ્યના ઉચ્ચ પોલીસ અધિકારીઓ દ્વારા તમામ પોલીસ કમિશનરો, રેન્જ અધિકારીઓ અને જિલ્લા પોલીસ વડાઓને જરૂરી આયોજન સાથે આ ડ્રાઇવને સફળ બનાવવા સૂચના આપવામાં આવી છે. રોડ સેફટી સંબંધિત વિભાગો પણ આ ઝુંબેશમાં જોડાઈ રહ્યા છે, જેથી માર્ગ સુરક્ષા વધુ મજબૂત બની શકે. આમ આ એક મહિના સુધી ચાલનારી હેલ્મેટ ઝુંબેશ માત્ર દંડાત્મક કાર્યવાહી પૂરતી નથી, પરંતુ લોકોમાં ટ્રાફિક નિયમો પ્રત્યે જાગૃતિ લાવવાનો પ્રયાસ છે. જો લોકો સ્વયં પ્રેરિત થઈને નિયમોનું પાલન કરશે, તો માર્ગ અકસ્માતોમાં નોંધપાત્ર ઘટાડો શક્ય બનશે.
