હીટવેવથી બચવા સિવિલમાં ખાસ ‘હીટસ્ટ્રોક વોર્ડ’ કાર્યરત કરાયો
ઇમરજન્સી વિભાગની ઉપર વોર્ડ નં. ૧૦માં વિશેષ સુવિધા; ૫ તબીબો અને ૧૦ નર્સિંગ સ્ટાફની ટીમ ૨૪ કલાક તૈનાત રહેશે
અગ્ર ગુજરાત, રાજકોટ
સમગ્ર ગુજરાતમાં ગરમીનો પારો સતત વધી રહ્યો છે, ત્યારે રંગીલા રાજકોટમાં તાપમાન 42 ડિગ્રીને પાર પહોંચી ગયું છે. આ આકરી ગરમી અને લૂ (હીટવેવ) સામે નાગરિકોના રક્ષણ માટે રાજકોટની પી.ડી.યુ. સિવિલ હોસ્પિટલ દ્વારા આગોતરું આયોજન કરવામાં આવ્યું છે. અને ખાસ વોર્ડ તૈયાર કરી દેવામાં આવ્યો છે.
સિવિલ હોસ્પિટલના આરએમઓ ડો. હર્ષદ દૂસરાના જણાવ્યા અનુસાર, કોઈપણ કટોકટીને પહોંચી વળવા માટે આ સુવિધાઓ ઉભી કરવામાં આવી છે. વોર્ડ નંબર 10ના બિલ્ડિંગમાં (ઇમરજન્સી વિભાગની ઉપર) હીટસ્ટ્રોકના દર્દીઓ માટે 20 બેડનો ખાસ વોર્ડ શરૂ કરાયો છે. આ વોર્ડમાં 5 અનુભવી તબીબો અને 10 નર્સિંગ સ્ટાફની ટીમ 24 કલાક ખડેપગે સેવા આપશે.
દર્દીઓ માટે પૂરતા પ્રમાણમાં ORS પેકેટ, જીવનરક્ષક દવાઓ અને ઠંડક આપતા સાધનોની વ્યવસ્થા કરવામાં આવી છે. દર્દીના લક્ષણો મુજબ તેને તાત્કાલિક ‘સિમ્પ્ટોમેટિક ટ્રીટમેન્ટ’ આપવામાં આવશે. ગરમીથી બચવા અને તબિયત ન બગડે તે માટે તબીબોએ સાવચેતી રાખવા અપીલ કરી છે.
ડો. હર્ષદ દૂસરાએ જણાવ્યું હતું કે, જ્યારે હીટવેવ જેવી સ્થિતિ હોય ત્યારે લોકોએ ખાસ કરીને સુતરાઉ કપડાં પહેરવા જોઈએ અને શરીરને શક્ય તેટલું ઢાંકીને રાખવું જોઈએ. ખાસ કરીને બપોરે 1થી 4 વાગ્યાના સમયગાળામાં, જ્યારે સૂર્યનો તાપ સૌથી વધુ હોય છે, ત્યારે બિનજરૂરી કામ વગર ઘરની બહાર નીકળવાનું ટાળવું હિતાવહ છે. જે લોકોને વ્યવસાય કે નોકરીના કારણે બહાર નીકળવું પડે તેમ હોય, તેમણે સાથે લીંબુ શરબત, ગોળનું પાણી અથવા સાદું પાણી રાખવું જોઈએ અને પૂરતા પ્રમાણમાં પ્રવાહી લેતા રહેવું જોઈએ.તડકામાંથી આવ્યા બાદ તરત જ એસી (AC) માં જવાને બદલે થોડીવાર સામાન્ય વાતાવરણમાં બેસવું જોઈએ. રાજકોટ સિવિલ હોસ્પિટલ સમગ્ર સૌરાષ્ટ્રનું મેડિકલ હબ હોવાથી, તંત્ર દ્વારા તમામ તૈયારીઓ પૂર્ણ કરી દેવામાં આવી છે. જેથી દર્દીઓને ઝડપી અને સચોટ સારવાર મળી રહે.
