ભારત-ન્યુઝીલેન્ડ મેચ પહેલાં રાજકોટમાં હાઈ એલર્ટ : સ્ટેડિયમમાં આતંકી હુમલાની મોકડ્રીલ યોજાઈ
નિરંજન શાહ સ્ટેડિયમમાં હથિયારધારી ઘુસ્યાની દૃશ્યાવલિ, 3 મજૂરો બંધક; ચેતક કમાન્ડોએ સફળ ઓપરેશનથી સ્થિતિ કાબૂમાં લીધી
અગ્ર ગુજરાત, રાજકોટ
ભારત અને ન્યુઝીલેન્ડ વચ્ચે યોજાનારી આંતરરાષ્ટ્રીય વનડે મેચ પૂર્વે રાજકોટમાં સુરક્ષા વ્યવસ્થાની સજ્જતા ચકાસવા માટે આજે સવારના સમયે એક વ્યાપક આતંકવાદ વિરોધી મોકડ્રીલ યોજાઈ હતી. જામનગર રોડ પર ખંઢેરી ગામ નજીક આવેલા નિરંજન શાહ સ્ટેડિયમ ખાતે અચાનક સર્જાયેલી ઘટનાએ થોડા સમય માટે સાચા આતંકી હુમલાની આશંકા ઉભી કરી દીધી હતી, જેના કારણે આસપાસના વિસ્તારમાં અફરાતફરી ફેલાઈ ગઈ હતી.
મોકડ્રીલના ભાગરૂપે કાળી કલરની એક સ્પોર્ટ્સ કાર પુરઝડપે સ્ટેડિયમ સંકુલમાં પ્રવેશી હતી. કારમાં સવાર ચાર હથિયારધારી શખસોએ સ્ટેડિયમમાં કામ કરી રહેલા ત્રણ મજૂરોને બંદૂકની અણીએ બંધક બનાવી લીધા હતા. આતંકીઓએ 100 કરોડ રૂપિયાની રોકડ રકમ તેમજ કચ્છ બોર્ડર મારફતે પાકિસ્તાન જવા માટે હેલિકોપ્ટરની માંગણી કરતા પોલીસ અને વહીવટી તંત્રમાં ભારે દોડધામ મચી જવા પામી હતી.
ઘટનાની ગંભીરતા જોતા તાત્કાલિક ચેતક કમાન્ડો તથા રાજકોટ ગ્રામ્ય પોલીસની અલગ અલગ ટીમોએ સ્ટેડિયમને ચારેય બાજુથી ઘેરી લીધું હતું. હવામાં થયેલા ધડાકાના અવાજો, સાયરન વગાડતી એમ્બ્યુલન્સ અને ફાયર બ્રિગેડની હાજરીએ સમગ્ર દૃશ્યને હકીકતસરનું બનાવી દીધું હતું.
ચેતક કમાન્ડોએ અતિ ચપળતાથી સ્ટેડિયમમાં પ્રવેશ કરી ઓપરેશન શરૂ કર્યું હતું. બોમ્બ ડિસ્પોઝલ સ્ક્વોડ, ક્વિક રિસ્પોન્સ ટીમ (QRT), ફાયર બ્રિગેડ અને આરોગ્ય વિભાગની ટીમો પણ સમન્વય સાથે ખડેપગે તૈનાત કરવામાં આવી હતી. કલાકો સુધી ચાલેલી આ વ્યૂહાત્મક કાર્યવાહી બાદ સુરક્ષા દળોએ આતંકીઓને ઠાર કર્યા હોવાનું દૃશ્ય રચી બંધકોને સંપૂર્ણ સુરક્ષિત રીતે મુક્ત કરાવ્યા હતા.
ઓપરેશન પૂર્ણ થયા બાદ સત્તાવાર રીતે જાહેરાત કરવામાં આવી હતી કે આ કોઈ વાસ્તવિક આતંકી હુમલો નહીં પરંતુ એક આયોજનબદ્ધ ‘મોકડ્રીલ’ હતી. આ ડ્રીલનો મુખ્ય હેતુ મોટા આંતરરાષ્ટ્રીય રમતોત્સવ દરમિયાન સર્જાતી કટોકટીની પરિસ્થિતિમાં વિવિધ વિભાગો વચ્ચેના સંકલન, પ્રતિભાવ ક્ષમતા અને સમયસર કાર્યવાહીનું મૂલ્યાંકન કરવાનો હતો.
આ મોકડ્રીલ રાજકોટ ગ્રામ્ય પોલીસ અધિક્ષક વિજયસિંહ ગુર્જરના માર્ગદર્શન હેઠળ યોજાઈ હતી. ઓપરેશન દરમિયાન ચેતક કમાન્ડોના ડીવાયએસપી ડી.વી. ગોહિલ, રાજકોટ ગ્રામ્ય ડીવાયએસપી વિક્રમ વ્યાસ અને કે.જી. ઝાલા સહિતના ઉચ્ચ અધિકારીઓએ નેતૃત્વ આપ્યું હતું.
વહીવટી તંત્ર તરફથી ગ્રામ્ય પ્રાંત અધિકારી વિમલ ચક્રવર્તી, પડધરી મામલતદાર કેતન સખીયા તેમજ પીજીવીસીએલ, ફાયર વિભાગ અને મેડિકલ ઈમરજન્સી ટીમોએ પણ મહત્વપૂર્ણ ભૂમિકા ભજવી હતી. મોકડ્રીલ સફળતાપૂર્વક પૂર્ણ થતા તંત્રએ રાહતનો શ્વાસ લીધો હતો અને આગામી મેચને લઈ સુરક્ષા વ્યવસ્થા સંપૂર્ણ સજ્જ હોવાનું સ્પષ્ટ સંદેશ આપ્યો હતો.
