જૈન શ્રેષ્ઠીઓએ ‘શ્રી અરવિંદભાઇ મણીઆર રિસર્ચ સેન્ટર’ અને ‘ઓલ અપ સિસ્ટમ’ની મુલાકાત લીધી
‘સેલ્ફ લર્નિંગ’ પદ્ધતિ વિકસાવવા અંગે મહત્વનું મંથન : વિવિધ પ્રોજેકટ બાબતે ચર્ચા વિચારણા કરાઇ
અગ્ર ગુજરાત, રાજકોટ
તાજેતરમાં ‘jss next’ સંસ્થાના અગ્રણી જૈન શ્રેષ્ઠીઓ સંજયભાઈ મહેતા, પરેશભાઈ પટેલ અને શૈલેષભાઈ દોશીએ રાજકોટ સ્થિત પ્રખ્યાત ‘શ્રી અરવિંદભાઇ મણીઆર રિસર્ચ સેન્ટર’ની સદ્ભાવના મુલાકાત લીધી હતી. આ મુલાકાત દરમિયાન તેઓએ સંસ્થાના મહત્વાકાંક્ષી પ્રોજેક્ટ ‘ઓલ અપ સિસ્ટમ’ (All Up System)નું બારીકાઈથી નિરીક્ષણ કર્યું હતું અને તેની સમગ્ર કાર્યપદ્ધતિને ઊંડાણપૂર્વક સમજી હતી.
મુલાકાતના પ્રારંભે સંસ્થાના નિલેષભાઈ શાહે તમામ આમંત્રિત મહાનુભાવોનું ભાવભેર સ્વાગત કર્યું હતું. ત્યારબાદ ઉમેશભાઈ દફતરીએ ઉપસ્થિત શ્રેષ્ઠીગણોને સંબોધિત કરી સંસ્થાના ઉદ્દેશ્યો અને સામાજિક ઉત્તરદાયિત્વ વિશે વિસ્તૃત માહિતી પૂરી પાડી હતી.
‘શ્રી અરવિંદભાઇ મણીઆર રિસર્ચ સેન્ટર’ અને ‘ઓલ અપ સિસ્ટમ’ના પ્રણેતા તેમજ ટ્રસ્ટના ડાયરેક્ટર હર્ષલભાઈ મણીઆરે મુલાકાતીઓને સંસ્થાની તમામ પ્રવૃત્તિઓથી માહિતગાર કર્યા હતા. તેઓએ ‘ઓલ અપ સિસ્ટમ’ વિશે પાયાથી લઈને અત્યાર સુધીની સફર અને તેના ભવિષ્યના વિઝનની ખૂબ જ સુંદર અને વિગતવાર પ્રસ્તુતિ આપી હતી. આ તકે સંસ્થાના વિવિધ પ્રોજેક્ટ્સ સાથે જોડાયેલા કર્મચારીઓએ પણ પોતપોતાની પ્રવૃત્તિઓ અને વિસ્તૃત પ્રોજેક્ટ અહેવાલો શ્રેષ્ઠીઓ સમક્ષ ખૂબ જ પ્રભાવશાળી રીતે રજૂ કર્યા હતા.
મુલાકાત દરમિયાન ‘jss next’ સંસ્થાના શ્રેષ્ઠીવર્યો અને મણીઆર રિસર્ચ સેન્ટરના સંચાલકો વચ્ચે એક મહત્વપૂર્ણ ચર્ચા-વિચારણા થઈ હતી. જેમાં ‘jss next’ના જૈન બાળકોને આધુનિક ‘ઓલ અપ સિસ્ટમ’નો મહત્તમ લાભ કઈ રીતે આપી શકાય તે અંગે વિસ્તૃત વાતચીત કરવામાં આવી હતી. આ ઉપરાંત, જૈન સમાજના બાળકોને આ સિસ્ટમ દ્વારા ‘સેલ્ફ સ્ટડી મોડ’ (સ્વ-અધ્યયન) માં કઈ રીતે જોડી શકાય અને બંને સંસ્થાઓ સાથે મળીને ‘સેલ્ફ લર્નિંગ’ (સ્વયં શીખવાની પદ્ધતિ) ને વધુ સુદ્રઢ અને અસરકારક કેવી રીતે બનાવી શકે, તે અંગે બંને પક્ષે હકારાત્મક વિચારોનું આદાન-પ્રદાન થયું હતું.
સંસ્થાની સરાહનીય કામગીરી, આધુનિક ટેકનોલોજીનો સદુપયોગ અને ભવિષ્યલક્ષી શૈક્ષણિક અભિગમ જોઈને ‘jss next’ના જૈન શ્રેષ્ઠીઓએ ભારે પ્રશંસા વ્યક્ત કરી હતી અને આગામી સમયમાં સાથે મળીને કામ કરવાની ઉત્કંઠા દર્શાવી હતી.
