જામકંડોરણા પંથકમાં ચાલુ લાઇનમાંથી વીજ વાયર ચોરી કરતી ગેંગ પકડાઈ
વાયર કાપી બોલેરોમાં ભરી કિયા કારથી પાયલોટીંગ કરી બાબરા પંથકમાં પહોંચાડતા હતા : 6 શખ્સોને 15.27 લાખના મુદામાલ સાથે ઝડપી લેવાયા, ત્રણ ફરાર
અગ્ર ગુજરાત, રાજકોટ
રાજકોટ જિલ્લાના જામકંડોરણા પંથકમાં પીજીવીસીએલની ચાલુ વીજ લાઈનમાંથી એલ્યુમિનિયમના વાયર કાપી ચોરી કરતી સુનિયોજિત ગેંગને રૂરલ એલસીબીની ટીમે ઝડપી પાડી છે. આરોપીઓ ચાલતા વીજપ્રવાહને જંપર દ્વારા અસ્થાયી રીતે બંધ કરી, કટર વડે વાયર કાપીને તેને ગોળ ફીંડલા બનાવી બોલેરો વાહનમાં ભરતા અને કિયા કાર દ્વારા પાયલોટીંગ કરી ચોરીનો મુદામાલ બાબરા પંથક સુધી પહોંચાડતા હોવાનું તપાસમાં બહાર આવ્યું છે. પોલીસે રોકડ, એલ્યુમિનિયમ વાયર, બે કાર સહિત કુલ રૂ.15.27 લાખનો મુદામાલ જપ્ત કર્યો છે અને 6 શખ્સોની ધરપકડ કરી છે, જ્યારે ત્રણ શખ્સોની શોધખોળ હાથ ધરવામાં આવી છે.
જિલ્લામાં વધી રહેલી વીજ વાયરની ચોરીની ઘટનાઓને ધ્યાનમાં રાખીને રાજકોટ એસપી વિજયસિંહ ગુર્જરે વણશોધાયેલ ગુનાઓ ડિટેક્ટ કરવા સૂચના આપતા રૂરલ એલસીબી પીઆઈ વી.વી. ઓડેદરાની આગેવાનીમાં ટીમ સક્રિય બની હતી. તપાસ દરમિયાન જામકંડોરણા અને આસપાસના વિસ્તારોમાં અલગ-અલગ દિવસોએ પીજીવીસીએલની લાઈનમાં થી વાયર કાપી ચોરી થતી હોવાની માહિતી મળી હતી. ગેંગ ખૂબ જ તકેદારીપૂર્વક કામગીરી કરતી હતી. પહેલા તેઓ જંપર વડે વીજપ્રવાહ બંધ કરતા, પછી કટર વડે વાયર કાપીને ગોળ કરી વાહનમાં ભરી લેતા અને આગળ કિયા કાર પાયલોટીંગ કરીને સુરક્ષિત રીતે માલને બાબરા તરફ લઈ જવામાં આવતો.
ગઈકાલે વિરપુર પોલીસ મથક વિસ્તારમાં પણ આવી જ ચોરીને અંજામ આપી ગેંગ કાગવડ ગામના પાટિયા પાસે થી મુદામાલ લઈ જતી હતી ત્યારે રૂરલ એલસીબીની ટીમે ત્રાટકી કાર્યવાહી કરી ગેંગને રંગેહાથ પકડી પાડી હતી. ઝડપી પાડાયેલા આરોપીઓમાં પ્રતાપસિંહ પુનમસિંહ ચૌહાણ, ગોપાલસિંહ લક્ષ્મણસિંહ રાવત, ભગવાનસિંહ ગોપાલસિંહ ચૌહાણ, શોભાગસિંહ નવલસિંહ રાવત, સાજીદ લતીફ પારેખ અને નીસાર ઉર્ફે ટીનો ઓસમાણ સેતાનો સમાવેશ થાય છે. જ્યારે સરફરાજ કટારિયા, મુસ્તાક ઈસા ઘાચી અને ગોપાલસિંહ મોહનસિંહ સુરાડિયા હાલ પોલીસ પકડથી દૂર છે.
પોલીસ તપાસમાં સામે આવ્યું છે કે ગેંગ દ્વારા જામકંડોરણા પંથકમાં અગાઉ પણ અનેક ચોરીઓ કરવામાં આવી હતી. 10મી તારીખે રામપર ગામ નજીકથી અને 15મી તારીખે આંચવડથી હરિયાસણ સીમ વિસ્તારમાંથી પીજીવીસીએલના થાંભલા પરથી એલ્યુમિનિયમ વાયર કાપી ચોરી કરવામાં આવી હતી. આ ઉપરાંત વિરપુર પોલીસ મથકના થોરાળા ગામની સીમમાં પણ સમાન રીતથી ચોરી કરાઈ હતી. ચોરાયેલ વાયર બાબરા પંથકમાં વેચવામાં આવતા અને મળેલી રકમ આરોપીઓ વચ્ચે વહેંચાતી હતી.
પોલીસ સૂત્રોના જણાવ્યા અનુસાર, રાજસ્થાનના રહેવાસી આ આરોપીઓ લગભગ એક વર્ષ પહેલાં જામકંડોરણા વિસ્તારમાં મજૂરી કામ માટે આવ્યા હતા. દરમિયાન હળવદ વિસ્તારમાં તેમની બાબરા પંથકની ટોળકી સાથે ઓળખાણ થઈ અને ત્યારબાદ વીજ વાયરની ચોરીનો પ્લાન બનાવવામાં આવ્યો હતો. બાબરા ગેંગ ચોરાયેલ માલ ખરીદવા માટે તૈયાર થતા બંને ટોળકીઓએ મળીને ગુનાઓને અંજામ આપવાનું શરૂ કર્યું હતું.
રૂરલ એલસીબીની ટીમે સમયસર કાર્યવાહી કરીને ગેંગ વધુ ચોરી કરે તે પહેલાં જ તેમને ઝડપીને ગેંગનો ભાંડો ફોડી નાખ્યો છે. હાલ પોલીસે આરોપીઓ પાસેથી રૂ.1.14 લાખ રોકડ, અંદાજે 320 કિલો એલ્યુમિનિયમ વાયર તથા કિયા અને બોલેરો કાર સહિત કુલ રૂ.15.27 લાખનો મુદ્દામાલ કબ્જે કર્યો છે. ફરાર આરોપીઓને ઝડપી પાડવા માટે પોલીસે અલગ-અલગ ટીમો બનાવી તપાસ તેજ કરી છે.
આ સમગ્ર કાર્યવાહી રૂરલ એલસીબી પીઆઈ વી.વી. ઓડેદરાની આગેવાનીમાં પીએસઆઈ કે.એમ. ચાવડા, હેડ કોન્સ્ટેબલ ગોહીલ, આર.વી. ભીમાણી અને તેમની ટીમ દ્વારા કરવામાં આવી હતી. પોલીસના આ ઝડપી ઓપરેશનને કારણે વિસ્તારમાં ચાલતી વીજ વાયરની ચોરીની પ્રવૃત્તિઓ પર મોટો અંકુશ લાગશે તેવી આશા વ્યક્ત કરવામાં આવી રહી છે.
