જેતપુરના જેતલસર પાસેની ‘વ્રજ વાટીકા’ હોટલમાં ભીષણ આગ, લગ્ન મંડપ બળીને ખાખ
હોટલના પ્રાંગણમાં તૈયાર કરાયેલું વાંસનું વિશાળ સ્ટ્રક્ચર આગની લપેટમાં આવ્યું: લાખોનું નુકસાન, સદનસીબે જાનહાનિ ટળી
અગ્ર ગુજરાત, જેતપુર
રાજકોટ-જૂનાગઢ હાઈવે પર જેતલસર ગામ પાસે આવેલી જાણીતી હોટલ ‘વ્રજ વાટીકા’માં આજે અચાનક ભીષણ આગ ફાટી નીકળતા સમગ્ર પંથકમાં અફરાતફરીનો માહોલ સર્જાયો હતો. હોટલમાં કંકુ પગલાં અને લગ્ન પ્રસંગનું આયોજન હોવાથી મહેમાનોની હાજરી વચ્ચે લાગેલી આ આગને કારણે લોકોમાં ભારે ભય અને દોડધામ મચી ગઈ હતી.
મળતી વિગતો અનુસાર, રાજકોટ-જૂનાગઢ હાઈવે પર જેતલસર ગામ પાસે આવેલી જાણીતી વ્રજ વાટીકા હોટલમાં આજે એક ભવ્ય લગ્ન પ્રસંગનું આયોજન કરવામાં આવ્યું હતું. આ ખાસ પ્રસંગ માટે હોટલના ગ્રાઉન્ડમાં વાંસ અને અન્ય સુશોભન સામગ્રીની મદદથી એક આકર્ષક અને વિશાળ સ્ટ્રક્ચર (મંડપ) ઊભું કરવામાં આવ્યું હતું. બપોરના સમયે અચાનક આ સ્ટ્રક્ચરમાં આગ લાગી હતી. વાંસ અને શણગારની વસ્તુઓ જ્વલનશીલ હોવાથી જોતજોતામાં આગે રૌદ્ર સ્વરૂપ ધારણ કર્યું હતું અને આખું સ્ટ્રક્ચર બળીને ખાખ થઈ ગયું હતું.
આગ એટલી પ્રચંડ હતી કે તેના કાળા ધુમાડાના ગોટેગોટા હાઈવે પર દૂર-દૂર સુધી જોઈ શકાતા હતા. આગને પગલે હોટલમાં હાજર મહેમાનો અને સ્ટાફમાં નાસભાગ મચી ગઈ હતી. સ્થાનિક લોકોએ તાત્કાલિક ધોરણે જેતપુર-નવાગઢ ફાયર બ્રિગેડને જાણ કરી હતી. ફાયર ફાઈટરોની ટીમે ઘટનાસ્થળે પહોંચી સતત પાણીનો મારો ચલાવી ભારે જહેમત બાદ આગ પર કાબૂ મેળવ્યો હતો.
આ દુર્ઘટનામાં સદનસીબે કોઈ જાનહાનિના સમાચાર નથી, જે મોટી રાહતની વાત છે. જોકે, આકર્ષક ડેકોરેશન અને હોટલની મિલકતને ભારે નુકસાન થતા હોટલ માલિકને લાખો રૂપિયાનું નુકશાન થયું છે. પ્રાથમિક અનુમાન મુજબ શોર્ટ સર્કિટના કારણે આગ લાગી હોવાનું લાગી રહ્યું છે, પરંતુ વહીવટી તંત્ર દ્વારા આગનું ચોક્કસ કારણ જાણવા માટે તપાસ હાથ ધરવામાં આવી છે.
