હોકર્સ ઝોનમાં મનપાની મનમાની : ધંધાર્થીઓનો શાકભાજીનો હાર પહેરી વિરોધ
વોર્ડ નં.૧૮ના ગોપવંદના હોકર્સ ઝોનના વેપારીઓનો મનપા કચેરીમાં ધરણા પર બેસી વિરોધ પ્રદર્શન : યોગ્ય ઉકેલ નહી આવે તો ઉગ્ર આંદોલનની ચીમકી
અગ્ર ગુજરાત, રાજકોટ
વોર્ડ નં.૧૮માં આવેલ ગોપવંદના હોકર્સ ઝોનમાં છેલ્લા ઘણા સમયથી મહાનગરપાલિકાના અધિકારીઓની મનમાની વધી ગઇ હોવાના આરોપ સાથે આજે શાકભાજીનો હાર પહેરી ધંધાર્થીઓ દ્વારા વિરોધ પ્રદર્શન કરવામાં આવ્યું હતું. મનપાના અધિકારીઓ છાશવારે હોકર્સ ઝોનમાં આવીને ધંધાર્થીઓને કોઇને કોઇ બહાને નોટીસ ફટકારતાં હોવાની રાવ કરવામાં આવી હતી.
આ અંગે હોકર્સ ઝોનના પ્રમુખ પરેશભાઇ રાઠોડ અને અગ્રણીઓએ જણાવ્યું હતું કે ગોપ વંદના હોકર્સ ઝોનમાં ૭૦થી વધારે ધંધાર્થીઓ પોતાનો થડો જમાવીને બેઠા છે. જેઓને મનપા દ્વારા પણ મંજૂરી આપવામાં આવી છે. પરંતુ છેલ્લા ઘણા સમયથી મનપા દ્વારા ત્યાં હોકર્સ ઝોન તોડી પાડવામાં આવ્યો છે અને પટ કરી દેવામાં આવ્યો છે. આ પટમાં અમુક આવારા તત્વો દ્વારા ધંધાર્થીઓને હેરાન કરવામાં પણ આવી રહ્યાં છે. આ બાબતે અનેક વખત રજુઆત કરવા છતાં પણ કોઇ ઉકેલ આવ્યો નથી.
વધુમાં તેઓએ જણાવ્યું હતું કે વેપારીઓ દ્વારા અડધો ફૂટ જગ્યા વપરાશમાં લેવામાં આવે તો પણ મહાનગરપાલિકા દ્વારા તરત નોટીસ ફટકારી દેવામાં આવે છે. સપ્તાહમાં અનેકવાર મનપાના અધિકારીઓ ત્યાં આવીને ધંધાર્થીઓને કોઇના કોઇ બહાને હેરાન પરેશાન કરે છે. આ બાબતેથી કંટાળી આજે હોકર્સ ઝોનના ૭૦થી વધુ ધંધાર્થીઓ મનપા કચેરી ખાતે રજુઆત કરવા આવ્યા હતાં. શાકભાજીના હાર પહેરીને ધંધાર્થીઓએ ધરણાં પર બેસી વિરોધ પ્રદર્શન કર્યુ હતું. આગામી દિવસોમાં યોગ્ય કાર્યવાહી કરવામાં નહી આવે તો આજુબાજુના ધંધાર્થીઓને પણ સાથે લઇ ઉગ્ર આંદોલન કરવામાં આવશે.
તેઓએ જણાવ્યું હતું કે મનપાને પાઠવેલ આવેદનમાં નોટીસ અંગેનો જવાબ આપવામાં આવ્યો છે. જેમાં હોકર્સ ઝોનમાં શાકભાજીના વેચાણ અંગેના થડાઓ ધરાવીએ છીએ. આ બાબતે રાજકોટ મહાનગરપાલિકાને દર મહિને રૂ.૧૧૮૦ ચૂકવીએ છીએ. મહાનગરપાલિકા તરફથી ચેકીંગ અર્થે કર્મચારીઓ આવતા હોય છે. જગ્યા વધુ હોવાના કારણે આ કર્મચારીઓ ધંધાર્થીઓને નોટીસ પાઠવેલ હતી. થડા ધારકોમાંથી શરતચૂકથી પોતાનો સામાન ફાળવેલ જગ્યા કરતાં વધુ રહી જવા પામેલ હોય જે બાબતે અમે દરગુજર છીએ. ભવિષ્યમાં અમોને ફાળવેલ જગ્યા કરવા વધુ જગ્યામાં અમે માલ સામાન રાખીશું નહી.
