ગોંડલમાં મોહરમ પર્વને લઈને શાંતિ સમિતિની બેઠક યોજાઈ
અગ્રણીઓ સાથે વિવિધ મુદ્દે ચર્ચા-માર્ગદર્શન
અગ્ર ગુજરાત, ગોંડલ
આગામી દિવસોમાં મુસ્લિમ સમાજ દ્વારા પવિત્ર મોહરમ શરીફ પર્વની ભવ્ય અને પરંપરાગત રીતે ઉજવણી કરવામાં આવનાર છે. જેને ધ્યાનમાં રાખીને આજે ગોંડલ ‘એ’ ડિવિઝન પોલીસ સ્ટેશન ખાતે એક ખાસ શાંતિ સમિતિની મીટિંગનું આયોજન કરવામાં આવ્યું હતું.
આ બેઠક ગોંડલના DYSP કે.જી. ઝાલાના અધ્યક્ષ સ્થાને યોજવામાં આવી હતી. આ તકે કાયદો અને વ્યવસ્થાની સ્થિતિ જળવાઈ રહે તે માટે વિસ્તૃત ચર્ચા-વિચારણા કરવામાં આવી હતી. આ મીટિંગમાં ગોંડલ ‘એ’ ડિવિઝનના PI જે.આર. ઝાલા, ‘બી’ ડિવિઝનના PI જી.એસ. ગઢવી, તેમજ PSI વી.કે. સુરાણી સહિત ‘એ’ અને ‘બી’ ડિવિઝનનો સમગ્ર પોલીસ સ્ટાફ ઉપસ્થિત રહ્યો હતો.
તહેવાર દરમિયાન વીજળી પુરવઠો અને વાયરોને લગતી કોઈ સમસ્યા ન સર્જાય તે માટે PGVCL) ના અધિકારીઓ પણ ખાસ હાજર રહ્યા હતા. આ સાથે જ મુસ્લિમ સમાજના અગ્રણીઓ અને મોટી સંખ્યામાં આગેવાનોએ આ બેઠકમાં ઉત્સાહભેર ભાગ લીધો હતો.
મીટિંગ દરમિયાન પોલીસ અધિકારીઓ દ્વારા મુસ્લિમ સમાજના આગેવાનોને અપીલ કરવામાં આવી હતી કે, આગામી મોહરમનો તહેવાર એકદમ શાંતિપૂર્ણ અને કોમી એકતાના માહોલમાં ઉજવાય તેમજ જનતાને ટ્રાફિકની કોઈ અડચણ ઊભી ન થાય તે રીતે આયોજન કરવામાં આવે. મુસ્લિમ સમાજના આગેવાનોએ પણ વહીવટી તંત્ર અને પોલીસ પ્રશાસનને પૂરતો સહકાર આપવાની ખાતરી આપી હતી.
