અમરેલી જિલ્લામાં શાંતિપૂર્ણ માહોલમાં સ્થાનિક સ્વરાજ્યની ચૂંટણીનું મતદાન પૂર્ણ
રાજુલા-જાફરાબાદ પંથકમાં 51.86% મતદાન નોંધાયું
અગ્ર ગુજરાત, રાજુલા
અમરેલી જિલ્લામાં સ્થાનિક સ્વરાજ્યની ચૂંટણીને લઈને મતદાન પ્રક્રિયા શાંતિપૂર્ણ માહોલમાં યોજાઈ હતી. રાજુલા-જાફરાબાદ પંથકમાં વહેલી સવારથી જ મતદાન મથકો પર મતદાતાઓ ઉમટી પડ્યા હતા. ડુંગર ગામે સવારથી જ મતદાન મથકો પર લોકોની ભારે ભીડ જોવા મળી હતી. પોલીસ દ્વારા તમામ મતદાન મથકો પર ચૂસ્ત બંદોબસ્ત ગોઠવવામાં આવ્યો હતો અને સુરક્ષા વ્યવસ્થાને લઈ તંત્ર એલર્ટ મોડમાં રહ્યું હતું. સમગ્ર વિસ્તારમાં શાંતિપૂર્ણ વાતાવરણમાં મતદાન પ્રક્રિયા પૂર્ણ થઈ હતી. ડુંગર ગામે બપોર સુધી આશરે 20 ટકા મતદાન નોંધાયું હતું જ્યારે સાંજ સુધીમાં આ આંકડો વધીને 60 ટકા સુધી પહોંચ્યો હતો. રાજુલા પંથકમાં કુલ 51.86 ટકા મતદાન નોંધાયું હતું.
રાજુલાની ૨૦ તાલુકા પંચાયત બેઠક અને ૪ જીલ્લા પંચાયત બેઠક માટે મતદાન પ્રક્રિયા હાથ ધરાઇ હતી. તેમજ વિવિધ ગામડાઓમાં લોકોએ ઉત્સાહભેર મતદાન કર્યું હતું. મતદાન પૂર્ણ થયા બાદ તમામ EVM મશીનો સીલ કરી દેવામાં આવ્યા હતા અને ઉમેદવારોના ભાગ્ય હવે EVM માં કેદ થઈ ગયા છે. આવતીકાલ 28 એપ્રિલ મંગળવારે મતગણતરી હાથ ધરાશે. અને પરિણામ જાહેર થશે. મતદાન દરમિયાન ડુંગર ગામે 98 વર્ષીય વૃદ્ધ સુરેશભાઈ સોદરવાએ લાકડીના ટેકે આવીને મતદાન કર્યું હતું જે લોકશાહીના પ્રત્યેનો ઉત્સાહ દર્શાવે છે. પોલીસ જવાને તેમની મદદ કરી મતદાન મથક સુધી પહોંચાડ્યા હતા. સુરેશભાઈએ જણાવ્યું હતું કે, “લોકશાહીના મહાપર્વમાં મતદાન કરવું આપણી ફરજ છે. આ સાથે ઇફકોના ચેરમેન દિલીપ સંઘાણી પોતાના પત્ની ગીતાબેન સાથે માદરે વતન માળીલા ખાતે મતદાન કરવા પહોંચ્યા હતા અને મતદાન બાદ મતદારોને ચોકલેટ આપી મોઢું મીઠું કરાવ્યું હતું. રાજ્યના ઉર્જા મંત્રી કૌશિક વેકરીયા દેવરાજિયા ગામે પરિવાર સાથે મતદાન કરવા પહોંચ્યા હતાં. અને લોકોએ વધુમાં વધુ મતદાન કરવા અપીલ કરી હતી. રાજુલાની ડુંગર જિલ્લા પંચાયત બેઠકના કોંગ્રેસના ઉમેદવાર દક્ષાબેન કળસરિયા પણ મતદાન કરવા પહોંચ્યા હતા. તેઓ સાથે તેમના પતિ અને તાલુકા પંચાયત બેઠકના ઉમેદવાર વિજયભાઈ કળસરિયા પણ બાબરીયાધાર પ્રાથમિક શાળા ખાતે મતદાન કરવા આવ્યા હતા. બન્ને પતિ-પત્નીએ સાથે મતદાન કરીને જીતનો વિશ્વાસ વ્યક્ત કર્યો હતો.
