રાજકોટ પંથકની સંધી સમાજની દીકરી મહેકનો કમાલ: 12 કોમર્સમાં 99.97 PR સાથે રાજકોટમાં ત્રીજો ક્રમાંક, CEO બનવાનું સપનું
ખજુરડા ગામથી રાજકોટ સુધીનો સંઘર્ષ ; માતા-પિતા અને શિક્ષકોના સહકારથી મહેક પઢિયારે રચી સફળતાની ગાથા, ‘અગ્ર ગુજરાત’ સમક્ષ વર્ણવી સફળતાની ગાથા
અગ્ર ગુજરાત, રાજકોટ
રાજકોટ પંથકમાં બોર્ડ પરીક્ષાના પરિણામોમાં ફરી એકવાર ગ્રામ્ય વિસ્તારમાંથી ઉગેલી પ્રતિભાએ શહેરનું ગૌરવ વધાર્યું છે. ઉપલેટા તાલુકાના ખજુરડા ગામના ખેડૂત બસીરભાઈ પઢિયારની દીકરી મહેક પઢિયારે ધોરણ 12 કોમર્સમાં 99.97 પર્સેન્ટાઇલ (PR) મેળવી રાજકોટ શહેરમાં ત્રીજો ક્રમાંક પ્રાપ્ત કરી પરિવાર, સંધિ મુસ્લિમ સમાજ અને શુભમ શાળાનું નામ રોશન કર્યું છે. આ સિદ્ધિ માત્ર વ્યક્તિગત સફળતા નહીં પરંતુ ગ્રામ્ય વિસ્તારમાંથી આવેલી દીકરીઓ માટે પ્રેરણાસ્ત્રોત બની છે.
આ તેજસ્વી વિદ્યાર્થીની મહેક પઢિયાર આજે પોતાના પરિવાર સાથે અગ્ર ગુજરાત કાર્યાલય ખાતે શુભેચ્છા મુલાકાતે આવી હતી, જ્યાં તેણે પોતાના સંઘર્ષ, મહેનત અને ભવિષ્યના સપનાઓ વિશે ખુલાસો કર્યો હતો. મહેકની આ સિદ્ધિ પાછળ તેની દૃઢ ઈચ્છાશક્તિ અને સતત મહેનતનું ઉત્તમ ઉદાહરણ જોવા મળે છે.
મહેકે અગ્ર ગુજરાત સાથેની વાતચીતમાં જણાવ્યું હતું કે, ધોરણ 10માં પણ સારા ગુણ પ્રાપ્ત કર્યા બાદ તેણે જીવનમાં એક સ્પષ્ટ ગોલ નક્કી કર્યો હતો. તે ગોલને સાકાર કરવા માટે તેણે ગામ છોડીને રાજકોટમાં આવી અભ્યાસ શરૂ કર્યો. તેના મનમાં શરૂઆતથી જ એક મહેચ્છા હતી કે ધોરણ 12માં વધુમાં વધુ પીઆર મેળવી ગુજરાત બોર્ડમાં પોતાનું સ્થાન મજબૂત બનાવવું. આજે 99.97 PR સાથે તે ઈચ્છા પૂર્ણ થતા પરિવારજનોમાં આનંદનો માહોલ જોવા મળી રહ્યો છે.
મહેકે પોતાની સફળતાનો શ્રેય પોતાના માતા-પિતા અને શિક્ષકોને આપ્યો હતો. તેણે જણાવ્યું કે, “મારા માતા-પિતાએ મારી પાછળ ખૂબ મહેનત કરી છે. તેઓએ મને કોઈ પણ વસ્તુની કમી અનુભવવા દીધી નથી. મારી ઈચ્છા અને મહેનત જોઈ તેઓએ મને ગામમાંથી બહાર મોકલીને રાજકોટમાં અભ્યાસ કરવાની તક આપી.” ખાસ કરીને તેની માતાનો ઉલ્લેખ કરતાં મહેકે જણાવ્યું કે, મારી માતા રોજ રાત્રે 3 વાગ્યે મને ઉઠાડતી હતી, જેથી હું અભ્યાસમાં પાછળ ન રહી જાઉં.
શૈક્ષણિક માર્ગમાં શિક્ષકોનો સહકાર પણ મહેક માટે મહત્વપૂર્ણ રહ્યો હતો. શુભમ સ્કૂલના શિક્ષકોએ તેને યોગ્ય માર્ગદર્શન આપ્યું હતું અને અભ્યાસ માટે એક મજબૂત માળખું તૈયાર કરવામાં મદદ કરી હતી. મહેકે જણાવ્યું કે તે રોજ શાળામાં લગભગ 8 કલાક અભ્યાસ કરતી હતી અને ઘરે જઈને 4 કલાક સુધી રિવિઝન કરતી હતી. આ સતત અભ્યાસ અને આયોજનબદ્ધ મહેનતના કારણે જ તે આજે આ ઊંચાઈએ પહોંચી શકી છે.
મહેકના જીવનમાં રાજકોટમાં રહી અભ્યાસ કરવો પણ એક મહત્વપૂર્ણ નિર્ણય હતો. તેણે અહીં પોતાના નાના-નાની સાથે રહી અભ્યાસ કર્યો હતો. પરિવારથી દૂર રહીને અભ્યાસ કરવો સરળ નહોતો, પરંતુ પોતાના સપનાઓને સાકાર કરવા માટે તેણે આ પડકાર સ્વીકાર્યો હતો. આ દરમિયાન પરિવાર અને સગાસંબંધીઓનો સતત સહકાર મળતો રહ્યો હતો, જેના કારણે તે પોતાની મહેનત ચાલુ રાખી શકી.
ભવિષ્યના લક્ષ્યો વિશે વાત કરતાં મહેકે જણાવ્યું કે, તે BBA કર્યા બાદ IIM માં માસ્ટર ડિગ્રી મેળવવા માંગે છે અને ભવિષ્યમાં CEO બનવાનું સપનું ધરાવે છે. તેણે કહ્યું કે, મારે કોઈ મોટી કંપનીમાં સારી પોસ્ટ પર કામ કરવું છે અને દેશ માટે કંઈક કરવાની ઈચ્છા છે. હું માત્ર પોતાનો વિચાર નહીં કરું, પરંતુ દેશ માટે કામ કરવાની મારી પૂર્ણ તૈયારી છે.
આ સફળતા માત્ર મહેક માટે જ નહીં પરંતુ સમગ્ર સંધી મુસ્લિમ સમાજ માટે ગૌરવની બાબત બની છે. ખાસ કરીને તે વાત મહત્વપૂર્ણ છે કે સમાજમાં જ્યાં દીકરીઓને આગળ વધવાની તકો ઓછી મળે છે, ત્યાં મહેકે પોતાની મહેનત અને આત્મવિશ્વાસથી એક નવી દિશા દર્શાવી છે. આ પ્રસંગે સંધી મુસ્લિમ યુવા સંગઠન રાજકોટના આગેવાનો રાજુભાઈ દલવાણી, અવેશભાઈ દલ, ઇમરાનભાઈ દલવાણી, જીગાભાઈ જુણાચ સહિતનાઓ તેની સાથે જોડાયા હતા અને તેની સિદ્ધિને વધાવી હતી.
ધોરણ 12માં નિષ્ફળ રહેલા વિદ્યાર્થીઓ માટે મહેકે ખૂબ પ્રેરણાદાયક સંદેશ આપ્યો હતો. તેણે કહ્યું કે, નબળા કોઈ નથી હોતા, માત્ર વિચારો નબળા હોય છે. ઘણી વખત આજુબાજુના લોકો ‘આ તારાથી નહીં થાય’ એવું કહીને વિદ્યાર્થીનો આત્મવિશ્વાસ તોડી નાખે છે. પરંતુ જો કોઈ વિદ્યાર્થી એક ગોલ નક્કી કરી મહેનત કરે અને નકારાત્મક વિચારોને દૂર રાખે, તો તે જરૂર સફળતા મેળવી શકે છે. મહેકની આ વાતો માત્ર શબ્દો નથી, પરંતુ તેની પોતાની સફરની સાક્ષી છે. તેણે સાબિત કર્યું છે કે મહેનત, સંકલ્પ અને યોગ્ય માર્ગદર્શન હોય તો કોઈ પણ વિદ્યાર્થી મોટી સિદ્ધિ હાંસલ કરી શકે છે.
આ રીતે ઉપલેટાના નાના ગામ ખજુરડાથી શરૂ થયેલી મહેક પઢિયારની સફર આજે રાજકોટમાં ત્રીજા ક્રમાંક સુધી પહોંચી છે, જે અનેક વિદ્યાર્થીઓ માટે પ્રેરણાસ્ત્રોત બની છે. તેની આ સફળતા દર્શાવે છે કે ગ્રામ્ય વિસ્તારોમાં પણ પ્રતિભાનો કોઈ અભાવ નથી, માત્ર તેને યોગ્ય તક અને માર્ગદર્શનની જરૂર છે.
મહેક પઢિયારની આ સિદ્ધિએ એકવાર ફરી સાબિત કર્યું છે કે દીકરીઓ કોઈ પણ ક્ષેત્રમાં પાછળ નથી અને જો તેમને યોગ્ય સપોર્ટ મળે તો તેઓ આકાશને પણ સ્પર્શી શકે છે.
