રાજકોટ બનશે ભારતનું પ્રથમ ૧૫ મિનિટ યોગા સિટી

રાજકોટ બનશે ભારતનું પ્રથમ ૧૫ મિનિટ યોગા સિટી

 યોગને જીવન જરૂરી બનાવવા શહેરના ૪૧૯ સ્થળે 3૬૫ દિવસ યોગ તાલીમનું મનપા દ્વારા આયોજન

ગુજરાત યોગ બોર્ડ સાથે કોર્પોરેશનનું MoU : નાગરિકોને પોતાના ઘરથી ૧૫ મિનિટના અંતરે મળશે નિ:શુલ્ક યોગ તાલીમની સુવિધા

અગ્ર ગુજરાત, રાજકોટ

રાજકોટ મહાનગરપાલિકા દ્વારા વિશ્વ યોગ દિવસની ઉજવણીને એક દિવસીય કાર્યક્રમ સુધી મર્યાદિત ન રાખી, વર્ષના તમામ ૩૬૫ દિવસ નાગરિકોના આરોગ્ય અને સુખાકારી માટે યોગને જીવનશૈલીનો અભિન્ન ભાગ બનાવવા દિશામાં દેશવ્યાપી પ્રેરણારૂપ પહેલ હાથ ધરવામાં આવી છે. આ અભૂતપૂર્વ પહેલ અંતર્ગત રાજકોટને ભારતનું પ્રથમ “15 મિનિટ યોગા સિટી” બનાવવા માટે રાજકોટ મહાનગરપાલિકા દ્વારા ગુજરાત યોગ બોર્ડ સાથે સમજૂતી કરાર (MoU) કરવામાં આવશે.

આ અંગે વધુ માહિતી આપવા અંગે રાજકોટ મહાનગરપાલિકાના મેયર ડૉ. નેહલ શુક્લના અધ્યક્ષ સ્થાને ડેપ્યુટી મેયર દક્ષાબેન વસાણી, સ્ટેન્ડિંગ કમિટી ચેરમેન પરેશભાઈ પીપળીયા, મ્યુનિસિપલ કમિશનર તુષાર સુમેરા, શાસક પક્ષના નેતા ડૉ.હિરેનભાઈ ખીમાણિયા તથા શાસક પક્ષના દંડક સંજયસિંહ રાણા દ્વારા પ્રેસમિટ યોજાઇ હતી.

આ નવીન અભિગમ વિશ્વભરમાં પ્રચલિત “15 મિનિટ સિટી”ના શહેરી આયોજન મોડેલથી પ્રેરિત છે, જેમાં નાગરિકોને દૈનિક જીવનની જરૂરી સુવિધાઓ પોતાના નિવાસસ્થાનથી 15 મિનિટના અંતરે ઉપલબ્ધ થાય છે. રાજકોટ મહાનગરપાલિકાએ આ વિચારધારાને આરોગ્ય અને સુખાકારી સાથે સાંકળી દરેક નાગરિકને પોતાના ઘરથી માત્ર 15 મિનિટના અંતરે નિઃશુલ્ક યોગ તાલીમની સુવિધા ઉપલબ્ધ કરાવવાનો સંકલ્પ કર્યો છે.

આ યોજના અંતર્ગત રાજકોટ શહેરના વિવિધ વિસ્તારોમાં આવેલા પાર્ક, જાહેર બગીચા, કોમ્યુનિટી હોલ, વોર્ડ કક્ષાના કેન્દ્રો સહિત કુલ ૪૨૬ સ્થળોની ઓળખ અને ચકાસણી કરવામાં આવી છે. જેમાંથી હાલ ૪૧૯ સ્થળોએ નિયમિત યોગનું આયોજન કરવામાં આવશે.

ગુજરાત યોગ બોર્ડ દ્વારા પ્રમાણિત અને પ્રશિક્ષિત યોગ શિક્ષકોની યાદી તૈયાર કરી આ સ્થળોએ તેમની નિમણૂક કરવામાં આવશે, જેથી નાગરિકોને ઉચ્ચ ગુણવત્તાવાળી યોગ તાલીમ સંપૂર્ણપણે નિઃશુલ્ક મળી રહે.

રાજકોટ મહાનગરપાલિકાની આ પહેલ માત્ર યોગ દિવસની ઉજવણી પૂરતી મર્યાદિત નથી, પરંતુ શહેરના દરેક નાગરિકને આરોગ્યપ્રદ, સક્રિય અને સંતુલિત જીવનશૈલી તરફ પ્રેરિત કરતી લાંબા ગાળાની પ્રતિબદ્ધતા છે. શહેરના તમામ વોર્ડ સુધી આરોગ્ય સેવાઓનું વિકેન્દ્રીકરણ કરીને રાજકોટ નિવારક આરોગ્ય સંભાળના ક્ષેત્રમાં દેશ માટે એક નવી દિશા અને પ્રેરણાદાયક મોડેલ તરીકે ઉભરી રહ્યું છે.

GIS ટેક્નોલોજીથી આરોગ્ય સેવાઓને નવી દિશા

આ સમગ્ર પહેલમાં આધુનિક ટેક્નોલોજીનો ઉપયોગ કરવામાં આવશે. રાજકોટ મહાનગરપાલિકા દ્વારા શહેરના તમામ યોગ કેન્દ્રોને જિયોગ્રાફિક ઇન્ફોર્મેશન સિસ્ટમ (GIS) આધારિત સ્માર્ટ સિટી પોર્ટલ સાથે સંકલિત કરવામાં આવશે. નાગરિકો ઓનલાઈન પોર્ટલ મારફતે પોતાના નજીકના યોગ કેન્દ્રનું સ્થાન, સમય અને અન્ય વિગતો સરળતાથી જાણી શકશે, જેના પરિણામે શારીરિક અને માનસિક સ્વાસ્થ્યને રોજિંદા જીવનમાં સરળતાથી અપનાવી શકાશે.

યોજનામાં બંને સંસ્થાઓની મહત્વપૂર્ણ ભૂમિકા

રાજકોટ મહાનગરપાલિકા દ્વારા :

• શહેરના બગીચા, જાહેર સ્થળો, કોમ્યુનિટી હોલ અને વોર્ડ સ્તરની સુવિધાઓને યોગ કેન્દ્ર તરીકે ઉપલબ્ધ કરાવવામાં આવશે.
• GIS આધારિત ડિજિટલ મેપિંગ અને માહિતી વ્યવસ્થા વિકસાવવામાં આવશે.

ગુજરાત યોગ બોર્ડ દ્વારા :

• પ્રમાણિત અને અનુભવી યોગ શિક્ષકોની નિમણૂક કરવામાં આવશે.
• નાગરિકોને નિયમિત અને ગુણવત્તાસભર યોગ તાલીમ નિઃશુલ્ક આપવામાં આવશે.