માવઠાની મોકાણ વચ્ચે વાતાવરણમાં સતત બદલાવની અસર
રાજકોટમાં સૂર્યપ્રકોપ, ૪૨.૯ ડિગ્રી સાથે દેશનું સૌથી ગરમ શહેર
છેલ્લા ૨૪ કલાકમાં સુર્યદેવતાએ પોતાનો મીજાજ બતાવવા સાતથી વધુ શહેરમાં તાપમાનનો પારો ૪૦ ડિગ્રીને વટાવી ગયો
તા.૧૨મે સુધી સૌરાષ્ટ્ર-કચ્છ અને દીવ દમણમાં હવામાન સુકુ રહેશે : દરિયાકાંઠાના વિસ્તારમાં બફારો પણ વધ્યો
અગ્ર ગુજરાત, રાજકોટ
રાજકોટ સહિત દેશભરમાં આકરા ઉનાળા વચ્ચે મિશ્ર ઋતુનો અનુભવ થઇ રહ્યો છે. દર સપ્તાહમાં વાતાવરણમાં બદલાવ આવી રહ્યો છે. કાળઝાળ ગરમી વચ્ચે રાજકોટ સહિત દેશના કેટલાક રાજયોમાં મુશળધાર વરસાદ પડી રહ્યો છે. ત્યારે ગરમી પણ પોતાનું રૂદ્ર સ્વરૂપ દેખાડી રહી છે. આ વર્ષે રાજકોટમાં ગરમીએ રેકોર્ડ તોડયા છે અને સતત ૪૦થી વધુ ડિગ્રી તાપમાન નોંધાયું છે. ત્યારે છેલ્લા ૨૪ કલાકમાં જોવા મળેલ આંકડા મુજબ રાજકોટ ૪૨.૯ ડિગ્રી સાથે દેશમાં સૌથી ગરમ શહેર નોંધાયું છે.
રાજ્યમાં છેલ્લા બે દિવસથી સૌરાષ્ટ્ર અને ઉત્તર ગુજરાતના કેટલાક વિસ્તારોમાં જોવા મળેલા વરસાદી માહોલ બાદ હવે વાતાવરણ સંપૂર્ણપણે બદલાયું છે. માવઠાની અસર ઓસરતાની સાથે જ સૂર્યદેવતાએ પોતાનો મિજાજ બતાવવાનું શરૂ કર્યું છે. છેલ્લા 24 કલાકમાં રાજ્યના સાત શહેરોમાં તાપમાનનો પારો 40 ડિગ્રીને વટાવી ગયો છે, જેના કારણે હવે આકરો ઉનાળો શરૂ થયો હોય તેવો અહેસાસ થઈ રહ્યો છે.
ગઈકાલે ભાવનગર, ગીર સોમનાથ, મહિસાગર, હિંમતનગર, ભરૂચ સહિતના જિલ્લાઓના છુટાછવાયા સ્થળોએ કમોસમી વરસાદ ખાબક્યો હતો. ભારે પવનને કારણે વૃક્ષો પડવાની પણ ઘટનાઓ સામે આવી હતી. વરસાદને પગલે વાતાવરણમાં ઠંડક પ્રસરી ગઈ છે, પણ લોકોને બફારાનો સામનો કરવો પડી રહ્યો છે.
છેલ્લા 24 કલાકમાં નોંધાયેલા આંકડા મુજબ, સૌરાષ્ટ્રનું રાજકોટ 42.9°C તાપમાન સાથે દેશનું સૌથી ગરમ શહેર નોંધાયું છે. તે સિવાય અમરેલી, સુરેન્દ્રનગર અને વડોદરામાં પણ ગરમીનું જોર વધુ જોવા મળ્યું છે.
હવામાન વિભાગના જણાવ્યા અનુસાર, હવે રાજ્યમાં વરસાદી વાદળો વિખેરાઈ ગયા છે. આગામી 12 મે સુધી સમગ્ર ગુજરાત, સૌરાષ્ટ્ર-કચ્છ અને દીવ-દમણમાં હવામાન મુખ્યત્વે સૂકું (Dry Weather) રહેશે. જે જિલ્લાઓમાં વાવાઝોડા અને પવનની ચેતવણી હતી, ત્યાં હવે પવનની ગતિ સામાન્ય થઈ છે, પરંતુ તેની સામે તાપમાનમાં વધારો થયો છે.
તાપમાન વધવાની સાથે દરિયાકાંઠાના વિસ્તારોમાં બફારો પણ વધ્યો છે. સુરત, દમણ અને વેરાવળ જેવા વિસ્તારોમાં તાપમાન ભલે 40°Cથી નીચે હોય, પરંતુ ભેજને કારણે અસહ્ય અકળામણ અનુભવાઈ રહી છે.
ગરમી અને ભેજનું જોર વધશે
વરસાદી માહોલ વચ્ચે રાજ્યમાં ગરમીનું પ્રમાણ પણ જળવાઈ રહેશે. આગામી 7 દિવસ દરમિયાન તાપમાનમાં કોઈ મોટો ફેરફાર થવાની શક્યતા નથી. જોકે કેટલાક છૂટાછવાયા વિસ્તારોમાં પારો 40°Cને વટાવી શકે છે. આગામી 9 મેથી 11 મે (DAY-5થી DAY-7) દરમિયાન ગુજરાત અને સૌરાષ્ટ્ર-કચ્છના દરિયાકાંઠાના વિસ્તારોમાં ગરમ અને ભેજવાળા પવનને કારણે અકળામણ કે બફારો અનુભવાઈ શકે છે.
સાયક્લોનિક સર્ક્યુલેશન હજી યથાવત
કાશ્મીર અને આસપાસના વિસ્તારમાં આશરે 3.1 કિમી ઊંચાઈએ વેસ્ટર્ન ડિસ્ટર્બન્સ રૂપે સાયક્લોનિક સર્ક્યુલેશન હજી યથાવત્ છે. સાથે જ મધ્ય અને ઉપરના ટ્રોપોસ્ફેરિક પશ્ચિમ પવનમાં આશરે 5.8 કિમી ઊંચાઈએ એક ટ્રફ પણ સક્રિય છે, જેને કારણે રાજ્યના અનેક વિસ્તારોમાં કમોસમી વરસાદ ખાબકી રહ્યો છે. બીજી તરફ, દક્ષિણ-પશ્ચિમ રાજસ્થાન વિસ્તારમાં 1.5 કિમી ઊંચાઈ સુધી ફેલાયેલું અપર એર સાઇક્લોનિક સર્ક્યુલેશન પણ યથાવત્ છે. આ દરમિયાન, સમગ્ર વિસ્તારમાં નીચલા સ્તરે દક્ષિણ-પશ્ચિમથી પશ્ચિમ દિશાના પવનો ફૂંકાઈ રહ્યા છે, જેને કારણે રાજ્યના લોકોને ગરમીથી આંશિક રાહત મળી શકે છે.
વાતાવરણમાં સતત બદલાવની આગાહી
અંબાલાલ પટેલ મુજબ દક્ષિણ-પશ્ચિમ દિશાના ભેજના પવનોનો લીધે રાજ્યના વાતાવરણમાં પલટો આવ્યો છે. 12થી 14 મે આસપાસ વેસ્ટર્ન ડિસ્ટર્બન્સને લીધે રાજસ્થાન સરહદ નજીકના વિસ્તારોમાં વરસાદ વરસી શકે છે. તેમના જણાવ્યા અનુસાર, 19થી 23 મે વચ્ચે ફરી હવામાનમાં પલટો આવશે. દરિયામાં ઊંચા મોજા ઉછળવાની અને 50 કિલોમીટર પ્રતિ કલાકની ઝડપે પવન ફુંકાવાની તેમણે આગાહી કરી છે. 15 જૂન આસપાસ રાજ્યમાં પવન સાથે ચોમાસાનો વરસાદ વરસી શકે છે. અંબાલાલ પટેલે જણાવ્યું છે કે 12 મે સુધી રાજ્યમાં આકરી ગરમી યથાવત રહેશે. હવામાન વિભાગની આગાહી મુજબ ગુજરાતમાં હજુ ત્રણથી ચાર દિવસ વાતાવરણમાં પલટો જોવા મળશે અને થન્ડરસ્ટ્રોર્મ એક્ટિવિટીના કારણે ગાજવીજ અને ભારે પવન સાથે વરસાદ વરસશે.
