ત્રણ તાલુકા પંચાયતની બેઠક પર ઉમેદવારોના અવસાન થતા પેટાચૂંટણીની તારીખ જાહેર

ત્રણ તાલુકા પંચાયતની બેઠક પર ઉમેદવારોના અવસાન થતા પેટાચૂંટણીની તારીખ જાહેર

વિજયની ચિતરીયા, બારડોલીના અસ્તાન અને બાવળાની દહેગામડા બેઠક પર તા.૨૪મીમેએ મતદાન

અગ્ર ગુજરાત, રાજકોટ

ગુજરાતમાં ચાલી રહેલી સ્થાનિક સ્વરાજ્યની ચૂંટણીઓ વચ્ચે રાજ્ય ચૂંટણી આયોગે ત્રણ મહત્વપૂર્ણ તાલુકા પંચાયત બેઠકો પર પેટાચૂંટણીની જાહેરાત કરતાં રાજકીય માહોલ ફરી ગરમાયો છે. અગાઉના ઉમેદવારોના દુઃખદ અવસાનને કારણે આ બેઠકો પર ચૂંટણી પ્રક્રિયા મધ્યમાં જ રદ કરવામાં આવી હતી, જેના કારણે હવે ફરીથી મતદાન યોજાવાનું નક્કી કરવામાં આવ્યું છે.

સાબરકાંઠા જિલ્લાના વિજયનગર તાલુકાની ચિતરીયા બેઠક પર ભાજપના ઉમેદવાર લીનાબેન નીનામા, સુરત જિલ્લાના બારડોલીની અસ્તાન બેઠક પર કોંગ્રેસના ઉમેદવાર ધર્મેશ રાઠોડ અને અમદાવાદ જિલ્લાના બાવળા તાલુકાની દહેગામડા બેઠક પર ભાજપના ઉમેદવાર જશીબેન ડાભીના અવસાનને કારણે આ ત્રણેય બેઠકો પર ફરી ચૂંટણી યોજાશે.

રાજ્ય ચૂંટણી આયોગ દ્વારા જાહેર કરાયેલા સત્તાવાર કાર્યક્રમ મુજબ 11 મે, 2026 સુધી ઉમેદવારી પત્રો ભરવાની છેલ્લી તારીખ નક્કી કરવામાં આવી છે. 12 મેના રોજ ઉમેદવારી પત્રોની ચકાસણી હાથ ધરાશે, જેમાં ઉમેદવારોના દસ્તાવેજોની તપાસ કરીને માન્ય ઉમેદવારો નક્કી કરવામાં આવશે. ત્યારબાદ 13 મે સુધી ઉમેદવારી ફોર્મ પરત ખેંચવાની પ્રક્રિયા પૂર્ણ થશે, જેથી અંતિમ ઉમેદવારોની યાદી જાહેર થશે. આ તમામ પ્રક્રિયા પૂર્ણ થયા બાદ 24 મે 2026ના રોજ મતદાન યોજાશે, જ્યારે 26 મેના રોજ મતગણતરી હાથ ધરવામાં આવી અંતિમ પરિણામો જાહેર કરવામાં આવશે.

આ પેટાચૂંટણીઓ માત્ર ખાલી પડેલી બેઠકો પૂરવા માટે જ નહીં પરંતુ સ્થાનિક સત્તાના સમીકરણો બદલવા માટે પણ અત્યંત મહત્વપૂર્ણ બની રહી છે. ખાસ કરીને સાબરકાંઠા, સુરત અને અમદાવાદ જિલ્લાના આ વિસ્તારોમાં રાજકીય રીતે સ્પર્ધા તીવ્ર બનવાની સંભાવના છે. ભાજપ અને કોંગ્રેસ સહિતના મુખ્ય રાજકીય પક્ષોએ આ બેઠકો જીતવા માટે અત્યારથી જ રણનીતિ બનાવવાની શરૂઆત કરી દીધી છે અને નવા ઉમેદવારોની પસંદગી માટે મથામણ તેજ બની છે. સ્થાનિક નેતાઓ અને કાર્યકરો પણ સક્રિય થઈ જતા આગામી દિવસોમાં પ્રચારનો માહોલ ગરમાવાની શક્યતા છે.

વહીવટી તંત્ર દ્વારા પણ આ પેટાચૂંટણીઓને ધ્યાનમાં રાખીને તૈયારીઓ શરૂ કરી દેવામાં આવી છે. ગરમીના વધતા તાપમાનને ધ્યાનમાં રાખીને મતદાન મથકો પર પીવાના પાણી, છાંયો, આરામ માટેની વ્યવસ્થા સહિતની જરૂરી સુવિધાઓ ઉપલબ્ધ કરાવવા માટે આયોજન કરવામાં આવી રહ્યું છે. સાથે જ શાંતિપૂર્ણ અને નિષ્પક્ષ મતદાન થાય તે માટે પોલીસ બંદોબસ્ત અને મોનીટરીંગ મિકેનિઝમ મજબૂત બનાવવામાં આવશે.