ગાજવીજ અને ભારે પવન સાથે વરસાદ ખાબક્યો

ગાજવીજ અને ભારે પવન સાથે વરસાદ ખાબક્યો

વંથલી, રાજુલા, જાફરાબાદ, ઉના સહિત રાજ્યમાં આકાશી પાણી વરસ્યા: છોટા ઉદેપુરમાં વૃક્ષ પડવાથી એક યુવાનનું મોત

૨૪ કલાકમાં ૪૫ તાલુકામાં પડ્યો વરસાદ, ૧૮ તાલુકામાં અડધાથી એક ઈંચ, બે દિવસમાં ૪ ડિગ્રી ઘટતા વાતાવરણમાં ઠંડક પ્રસરી

અગ્ર ગુજરાત, રાજકોટ

ગુજરાતમાં જાણે ચોમાસું વહેલું બેસી ગયું હોય તેવો માહોલ સર્જાયો છે. રાજ્યના સૌરાષ્ટ્ર, ઉત્તર ગુજરાત, મધ્ય ગુજરાત અને દક્ષિણ ગુજરાતના અનેક જિલ્લાઓમાં ભારે પવન, ગાજવીજ અને ધૂળની ડમરીઓ સાથે કમોસમી વરસાદ ખાબક્યો છે. અચાનક બદલાયેલા આ વાતાવરણને કારણે લોકોને કાળઝાળ ગરમીમાંથી તો મોટી રાહત મળી છે, પરંતુ ખેતરોમાં ઊભેલો ઉનાળુ પાક અને આંબાવાડીઓમાં કેરીના પાકને ભારે નુકસાન થવાની શક્યતાથી ખેડૂતોના જીવ તાળવે ચોંટી ગયા છે. ભારે વાવાઝોડાને કારણે અનેક જગ્યાએ વૃક્ષો અને વીજપોલ ધરાશાયી થયા છે, જ્યારે છોટા ઉદેપુરમાં વૃક્ષ પડવાથી 1 યુવકનું કરુણ મોત નીપજ્યું છે.

ઉત્તર ગુજરાતમાં હિંમતનગર, ઈડર, વડાલી અને ખેડબ્રહ્મામાં ભારે પવન સાથે અડધાથી 1 ઈંચ જેટલો વરસાદ ખાબક્યો. અનેક જગ્યાએ હોર્ડિંગ્સ અને વૃક્ષો પડ્યા તો વીજ પુરવઠો પણ ખોરવાયો હતો. બનાસકાંઠાના અમીરગઢમાં ધોધમાર વરસાદ અને વાવાઝોડાને લીધે ખેતરોમાં લણણી માટે તૈયાર મકાઈ અને બાજરીનો પાક આડો પડી ગયો છે, જેનાથી ખેડૂતોને મોટું આર્થિક નુકસાન વેઠવું પડશે. અંબાજીમાં તો નાઈટ ક્રિકેટ ટુર્નામેન્ટ ચાલતી હતી ત્યાં જ અચાનક ધૂળની ડમરીઓ ઊડતાં ખેલાડીઓ અને દર્શકોએ જીવ બચાવવા દોડાદોડ કરવી પડી હતી.

અરવલ્લી અને મહેસાણાના મોડાસા, મેઘરજ અને ભિલોડામાં પણ ધોધમાર વરસાદથી રસ્તા પર નદીઓ વહેતી થઈ ગઈ. મેઘરજના જીતપુરમાં પવનના જોરથી એક મકાનની છત અને દીવાલ ધરાશાયી થયા છે, જોકે સદનસીબે કોઈ જાનહાનિ થઈ નથી. મહેસાણામાં ઝરમર વરસાદથી વાતાવરણમાં ઠંડક પ્રસરી હતી.

મધ્ય ગુજરાતમાં છોટા ઉદેપુર જિલ્લામાં મોડી રાત્રે મેઘરાજાએ જોરદાર બેટિંગ કરતાં બોડેલી, પાવી જેતપુર અને સંખેડામાં ધોધમાર વરસાદ પડ્યો. નસવાડીના આમરોલી ગામમાં તોતિંગ વૃક્ષ ધરાશાયી થતાં અરવિંદ તડવી નામના 1 યુવકનું કમકમાટીભર્યું મોત નીપજ્યું છે. આ ઉપરાંત જબુગામ પાસે રેલવે ટ્રેક પર વીજ વાયર તૂટી પડતાં અલીરાજપુર-પ્રતાપનગર જતી ટ્રેનને અધવચ્ચે રોકવી પડી હતી.

દાહોદ શહેરમાં રસ્તા પર અને બસ સ્ટેન્ડમાં ગોઠણસમા પાણી ભરાઈ ગયા, જ્યારે લીમખેડામાં એક મકાન ધરાશાયી થયું છે. મહીસાગરના કડાણા પાસે રસ્તા વચ્ચે મોટું વૃક્ષ પડતાં વાહનવ્યવહાર અટકી ગયો હતો, જેને પોલીસે મહામહેનતે હટાવી રસ્તો ખુલ્લો કરાવ્યો હતો.

વડોદરાના સાવલી, શિનોર અને વાઘોડિયામાં પણ ભારે પવનથી લોકોના મકાનના પતરાં ઊડ્યા અને વૃક્ષો ધરાશાયી થયાની ઘટનાઓ બની છે.

જૂનાગઢના વંથલી અને આસપાસના ગામોમાં સવારથી ધીમી ધારે વરસાદ પડતાં રસ્તા પર પાણી વહેતા થયા હતા. આ વરસાદથી બાગાયતી પાક, ખાસ કરીને કેરી અને રાવણાં પકવતા ખેડૂતોની ચિંતા વધી ગઈ છે. બીજી તરફ, જૂનાગઢના દાતાર પર્વત પર વાદળો સીધા જમીન પર ઉતરી આવ્યા હોય તેવો અદભુત નજારો જોવા મળ્યો હતો, જેનો પ્રવાસીઓએ મન ભરીને આનંદ માણ્યો. અમરેલીના રાજુલા અને જાફરાબાદના દરિયાકાંઠાના વિસ્તારોમાં ગાજવીજ સાથે વરસાદ પડ્યો, જ્યારે ગીર સોમનાથના ઉના પંથકમાં પણ વરસાદી ઝાપટાં પડવાથી લોકોને ગરમીથી રાહત મળી.

તાપીના સોનગઢમાં ગાજવીજ સાથે વરસાદ ખાબક્યો, જ્યારે સુરત શહેરના ઉધના, લિંબાયત અને પલસાણા તાલુકામાં હળવા ઝાપટાં પડ્યા. નવસારીના ચીખલી અને ગણદેવી તેમજ વાપી અને વલસાડમાં પણ વહેલી સવારે પવન સાથે વરસાદ પડતાં રસ્તાઓ ભીંજાયા હતા અને વાતાવરણ ઠંડુગાર બની ગયું હતું. હવામાન વિભાગની આગાહી મુજબ હજુ પણ આગામી 4 દિવસ સુધી રાજ્યના કેટલાક ભાગોમાં વાદળછાયું વાતાવરણ રહેશે અને છૂટાછવાયા સ્થળોએ વરસાદ પડી શકે છે.

ગુજરાતમાં પ્રી-મોન્સૂન એક્ટિવિટીના ભાગરૂપે છેલ્લા 24 કલાક દરમિયાન રાજ્યના 45 તાલુકાઓમાં વરસાદ નોંધાયો છે. હવામાનમાં આવેલા પલટાને કારણે અનેક વિસ્તારોમાં વરસાદી માહોલ સર્જાયો હતો.રાજ્યના 18 તાલુકાઓમાં અડધાથી લઈને સવા ઈંચ સુધી વરસાદ વરસ્યો છે. મહિસાગર જિલ્લાના વીરપુર તાલુકામાં સૌથી વધુ સવા ઈંચ વરસાદ નોંધાયો છે. જ્યારે અરવલ્લીના મોડાસામાં એક ઈંચથી વધુ વરસાદ પડ્યો હતો.પંચમહાલના શહેરા અને અરવલ્લીના ભિલોડામાં એક ઈંચ વરસાદ નોંધાયો છે. ઉપરાંત સાબરકાંઠાના વડાલી અને મહિસાગરના કડાણા તાલુકામાં પણ એક ઈંચ જેટલો વરસાદ વરસ્યો હતો.મોરવા હડફ અને ધનસુરા તાલુકામાં પોણો ઈંચ વરસાદ નોંધાયો છે. સાબરકાંઠાના ખેડબ્રહ્મા તેમજ દાહોદ તાલુકામાં પણ પોણો ઈંચ જેટલો વરસાદ પડ્યો હતો. આ ઉપરાંત સાઠંબા, માલપુર અને વિજયનગરમાં અડધા ઈંચ સુધી વરસાદ નોંધાયો છે. જ્યારે ક્વાંટ, બોડેલી, ઈડર, મેઘરજ અને શામળાજી સહિતના વિસ્તારોમાં પણ અડધો ઈંચ વરસાદ વરસતાં વાતાવરણમાં ઠંડક પ્રસરી ગઈ છે. હવામાન વિભાગે 8 મે સુધી રાજ્યના વિવિધ વિસ્તારોમાં ગાજવીજ સાથે વરસાદની શક્યતા વ્યક્ત કરી છે.

એક સાથે ચાર સિસ્ટમ એક્ટિવ

દેશભરના મોટાભાગના રાજ્યોના હવામાન પલટાયું છે. ગુજરાત રાજ્યમાં પણ હવામાનમાં મોટો ફેરફાર જોવા મળ્યો છે. હવામાન વિભાગ મુજબ એકસાથે ચાર અલગ-અલગ સિસ્ટમ સક્રિય થવાના કારણે આગામી દિવસોમાં વરસાદની શક્યતા વ્યક્ત કરવામાં આવી છે. હવામાન મોડલ મુજબ, આગામી ચાર દિવસ સુધી રાજ્યના વિવિધ વિસ્તારોમાં ભારે પવન સાથે વરસાદ વરસી શકે છે.