સૌરાષ્ટ્રમાં હનીટ્રેપ ગેંગનો ભાંડો ફૂટ્યો
વેપારીઓને પ્રેમજાળમાં ફસાવી લાખોની ખંડણી વસૂલતી ‘પીયુ’ ઝડપાઈ
સોશિયલ મીડિયાથી ટાર્ગેટ શોધી વેપારી-ઉદ્યોગપતિઓને મળવા બોલાવતી હતી યુવતી, સાગરીતો સાથે મળી ધમકી આપી રૂપિયા પડાવતી; અનેક જિલ્લાઓમાં ગુનાઓ ખુલ્યા
અગ્ર ગુજરાત, રાજકોટ
સૌરાષ્ટ્રભરમાં વેપારીઓ, કારખાનેદારો અને ઉદ્યોગપતિઓને હનીટ્રેપમાં ફસાવી ખંડણી વસૂલતી ગેંગ સામે જેતપુર સિટી પોલીસે મહત્વની કાર્યવાહી હાથ ધરી છે. આ કેસમાં મુખ્ય ભૂમિકા ભજવનારી પ્રિયંકા ઉર્ફે પીયુ હંસરાજ ગીણોયાની ધરપકડ કરી તેને એક દિવસના પોલીસ રિમાન્ડ પર લેવામાં આવી છે. પ્રાથમિક તપાસમાં અનેક વેપારીઓને પ્રેમજાળમાં ફસાવી લાખો રૂપિયાની ઉઘરાણી કરવામાં આવી હોવાનું સામે આવ્યું છે.
પોલીસ તપાસ મુજબ, સોશિયલ મીડિયાના માધ્યમથી ગેંગના સભ્યો વેપારીઓ અને ઉદ્યોગપતિઓ સાથે મિત્રતા કેળવતા હતા. ત્યારબાદ યુવતી મીઠી વાતો કરી તેમને મળવા માટે એકાંત સ્થળે બોલાવતી હતી. ત્યાં અગાઉથી હાજર રહેલા ગેંગના અન્ય સભ્યો યુવતીના ભાઈ કે પતિ તરીકે ઓળખ આપી ધમકીઓ આપતા અને પોલીસ કેસમાં ફસાવવાની બીક બતાવી મોટી રકમની માંગણી કરતા હતા.
તાજેતરમાં જેતપુરના એક વેપારીને આ જ રીતે શહેર બહાર બોલાવી ગેંગના 11 સભ્યોએ મળીને રૂ.1.45 લાખ પડાવી લીધા હતા. આ બનાવ અંગે નોંધાયેલા ગુનાની તપાસ દરમિયાન મહિલા આરોપી સુધી પોલીસ પહોંચી હતી.
રાજકોટ જિલ્લા પોલીસ વડા વિજયસિંહ ગુર્જરના માર્ગદર્શન હેઠળ જેતપુર ડીવાયએસપી આર.એ. ડોડિયા તથા પીઆઈ એ.ડી. પરમારની ટીમે તપાસ હાથ ધરી હતી. કોન્સ્ટેબલ મીરલભાઈ ચંદ્રવાડિયાએ હ્યુમન ઇન્ટેલિજન્સ અને ટેક્નિકલ સર્વેલન્સના આધારે આરોપી પ્રિયંકાને ઝડપી પાડી હતી. કોર્ટમાં રજૂઆત બાદ તેના એક દિવસના પોલીસ રિમાન્ડ મંજૂર કરાયા છે. તપાસ દરમિયાન આરોપી મહિલાએ અનેક ચોંકાવનારા ખુલાસા કર્યા હોવાનું જાણવા મળ્યું છે. આશરે દસ મહિના પહેલા મોરબીના એક સિરામિક ઉદ્યોગપતિને ગોંડલ બોલાવી ખંડણી માંગવાનો પ્રયાસ કરાયો હતો. તે ઉપરાંત મોરબી, રાજકોટ, જેતપુર, ખોડલધામ-કાગવડ અને વાંકાનેર વિસ્તારના વેપારીઓ તથા ઉદ્યોગપતિઓને પણ પ્રેમજાળમાં ફસાવી રૂપિયા પડાવવાના બનાવો સામે આવ્યા છે.
પોલીસના જણાવ્યા મુજબ, પ્રિયંકા સામે અગાઉથી જેતપુર સિટી, જામકંડોરણા અને ભેસાણ પોલીસ સ્ટેશનોમાં પણ હનીટ્રેપના ગુનાઓ નોંધાયેલા છે. ભેસાણના એક કેસમાં જેલવાસ ભોગવ્યા બાદ તે તાજેતરમાં જ બહાર આવી હતી.
જેતપુર પોલીસે જાહેર અપીલ કરી છે કે આ મહિલા અથવા તેની ગેંગ દ્વારા કોઈ વ્યક્તિ હનીટ્રેપનો ભોગ બની હોય તો નજીકના પોલીસ સ્ટેશન અથવા સીધા જેતપુર સિટી પોલીસનો સંપર્ક કરે. વધુ ફરિયાદો સામે આવે તેવી શક્યતાને ધ્યાનમાં રાખીને પોલીસ ગેંગના અન્ય સભ્યોની શોધખોળમાં પણ લાગી છે. પોલીસ તપાસમાં ગેંગ સાથે સંકળાયેલા અનેક શખ્સોના નામ ખુલ્યા છે. તેમાં રાજકોટ, ધારી, બાબરા, બેડીગામ અને અન્ય વિસ્તારોના રહેવાસીઓનો સમાવેશ થાય છે. હાલ પોલીસ સમગ્ર નેટવર્કની કડીઓ જોડીને વધુ આરોપીઓની ધરપકડ માટે કાર્યવાહી કરી રહી છે.
