વિસાવદરના રતાંગમાં મિજબાની માણતા સિંહને પજવતા બાળકી પાછળ દોટ મૂકી
મોબાઈલની ફ્લેશ લાઈટ અને અવાજો કરતા વિચલીત સિંહ શિકાર છોડી પાછળ દોડ્યો: ગામમાં ભયનો માહોલ
અગ્ર ગુજરાત, વિસાવદર
ગીર સોમનાથ અને જૂનાગઢના સરહદી ગામડાઓમાં સિંહનું દેખાવું હવે સામાન્ય વાત છે, પરંતુ વિસાવદરના રતાંગ ગામે બનેલી એક ‘ખૌફનાક’ ઘટનાએ પંથકમાં ફાળ પાડી દીધી છે. ગામની શેરીમાં પશુનું મારણ કરી મિજબાની માણી રહેલા ડાલાપથ્થા સિંહને જોવા ઉમટેલા ટોળાએ હદ વટાવી હતી. મોબાઈલની ફ્લેશ લાઈટ અને સતત અવાજોથી વિચલિત થયેલા વનરાજે અચાનક શિકાર છોડી નજીક ઉભેલી એક બાળકી પાછળ દોટ મૂકતા અફરાતફરી મચી ગઈ હતી.
સોશિયલ મીડિયા પર વાયરલ થયેલા હચમચાવી દે તેવા વીડિયોમાં દેખાય છે કે, સિંહ શાંતિથી ખોરાક આરોગી રહ્યો હતો ત્યારે લોકો જીવના જોખમે વીડિયો ઉતારવામાં મશગૂલ હતા. લોકોની નિકટતા અને અંધારામાં મોબાઈલના પ્રકાશથી સિંહ આક્રમક બન્યો હતો ને બાળકી પાછળ દોટ મૂકી હતી. સદનસીબે, લોકોએ દેકારો કરતા સિંહ બાળકીને શિકાર બનાવે તે પહેલા જ પાછો વળી ગયો હતો, પરંતુ આ સેકન્ડોના દૃશ્યોએ જોનારાના શ્વાસ અધ્ધર કરી દીધા હતા.
રતાંગ ગામમાં છેલ્લા ત્રણ વર્ષથી ચૂંટણી થઈ નથી અને વહીવટદારનું શાસન છે. આટલી ગંભીર ઘટના બની હોવા છતાં ગામના વહીવટદાર ચિરાગ ઠુમ્મરે અજાણ હોવાનું જણાવી તંત્રની ઉદાસીનતા છતી કરી છે. વન વિભાગ અને સ્થાનિક તંત્ર વચ્ચેના સંકલનના અભાવે જંગલના રાજા હવે શેરીઓમાં ભટકી રહ્યા છે અને જનતા કુતૂહલવશ સિંહની નજીક જઈને જોખમ ખેડી રહી છે.
ગીરના વનરાજો અને માનવીઓ વચ્ચેના સંઘર્ષની આ ઘટના લાલબત્તી સમાન છે. વન વિભાગ દ્વારા વારંવાર સૂચનાઓ આપવામાં આવતી હોવા છતાં સિંહને શિકાર વખતે ખલેલ પહોંચાડવાનું બંધ કરતા નથી. રતાંગ ગામનો આ વીડિયો સોશિયલ મીડિયામાં ખૂબ જ વાયરલ થઈ રહ્યો છે. જંગલ છોડીને શેરીઓમાં પશુઓના મારણ કરતા સિંહો હવે લોકો માટે કુતૂહલ અને ડરનો વિષય બન્યા છે, પણ આ કુતૂહલ ક્યારેક શોકમાં ન ફેરવાય તે માટે સાવચેતી રાખવી અનિવાર્ય છે. સિંહોની પ્રકૃતિ શાંત હોય છે પણ જ્યારે તેમને ઘેરી લેવામાં આવે કે પરેશાન કરવામાં આવે ત્યારે તેઓ રક્ષણાત્મક રીતે હુમલો કરતા હોય છે, જેનો ભોગ આ માસૂમ બાળકી બનતા રહી ગઈ છે.
