રશિયાએ અમેરિકાના રાષ્ટ્રપતિ ડોનાલ્ડ ટ્રમ્પને કડક ચેતવણી આપી છે. રશિયાએ કહ્યું છે કે, જો તેમણે ઈરાનનાં પરમાણુ મથકો પર બોમ્બમારો કરવાની પોતાની ધમકી હકીકતમાં બદલી તો તેનાં પરિણામ વિનાશક હશે.
જ્યારે ટ્રમ્પે એક સાર્વજનિક નિવેદનમાં ઈરાન સામે સૈન્ય કાર્યવાહીની સંભાવનાનો ઉલ્લેખ કર્યો, ત્યાર બાદ મંગળવારે મોડી રાત્રે રશિયન રાષ્ટ્રપતિ વ્લાદિમીર પુતિનના પ્રવક્તા તરફથી આ નિવેદન કરવામાં આવ્યું હતું. રશિયાના નાયબ વિદેશમંત્રી સર્ગેઈ રયાબકોવે આંતરરાષ્ટ્રીય બાબતોના એક મીડિયાને આપેલા ઇન્ટરવ્યૂમાં કહ્યું કે, અમે આ પ્રકારની ધમકીઓ અને અલ્ટિમેટમને અયોગ્ય માનીએ છીએ. અમે તેની નિંદા કરીએ છીએ અને ઈરાન પર અમેરિકાની ઇચ્છા લાદવાનો પ્રયાસ માનીએ છીએ. રશિયાએ આ મુદ્દે અમેરિકા અને ઈરાન વચ્ચે મધ્યસ્થતાની રજૂઆત કરી છે. મોસ્કોએ જાન્યુઆરીમાં તહેરાન સાથે એક વ્યૂહાત્મક સંધિ પર હસ્તાક્ષર કર્યા હતા અને હવે તે બંને દેશો વચ્ચેનો તણાવ ઘટાડવાની કોશિશ કરે છે. જોકે, ટ્રમ્પ સખત વલણ પર અડગ છે.
પરમાણુ સમજૂતીમાંથી US બહાર નીકળ્યા પછી તણાવ
ટ્રમ્પે પોતાના પ્રથમ કાર્યકાળમાં 2015માં ઈરાન પરમાણુ સમજૂતીમાંથી અમેરિકાને બહાર કરી દીધું હતું. આ સમજૂતી હેઠળ ઈરાનને આકરા પરમાણુ પ્રતિબંધોના બદલામાં આર્થિક પ્રતિબંધોમાંથી રાહત આપવામાં આવી હતી. ઈરાનનું કહેવું છે કે, તેનો પરમાણુ કાર્યક્રમ શાંતિપૂર્ણ ઉદ્દેશો માટે છે અને તે પરમાણુ હથિયાર નથી બનાવતું. રયાબકોવે ચેતવ્યા કે ટ્રમ્પની ધમકીથી ક્ષેત્રિય તણાવ હજુ વધી શકે છે. તેમણે કહ્યું કે, હજુ પણ સમય છે કે બધા પક્ષ એક વ્યાવહારિક સમજૂતી પર પહોંચવાનો પ્રયાસ કરે. રશિયા આ વાર્તાલાપમાં મદદ કરવા તૈયાર છે.
