૮૦માં જિલ્લા કક્ષાના સ્વાતંત્ર્ય પર્વે શ્રી ખીજડીયા પ્રા.શાળાના શિક્ષક રામદેવસિંહ જાડેજાનું બહુમાન
રાષ્ટ્રીય-રાજ્ય કક્ષાએ શાળાના શ્રેષ્ઠ પ્રદર્શન અને શૈક્ષણિક સિદ્ધિઓ બદલ મંત્રી જીતુભાઈ વાઘાણીના હસ્તે સન્માન કરાયું
અગ્ર ગુજરાત, રાજકોટ
૧૫ ઓગસ્ટ ૨૦૨૬ના રોજ રાજકોટ ખાતે યોજાયેલા ૮૦મા જિલ્લા કક્ષાના સ્વાતંત્ર્ય પર્વની ઉજવણી દરમિયાન રાજકોટ તાલુકાની ખીજડીયા પ્રાથમિક શાળાના મુખ્ય શિક્ષક રામદેવસિંહ હિતેન્દ્રસિંહ જાડેજાનું શાળાની વિવિધ ગૌરવપૂર્ણ સિદ્ધિઓ બદલ વિશેષ સન્માન કરવામાં આવ્યું હતું.
શાળાએ ‘સ્વચ્છ અને હરિત વિદ્યાલય પુરસ્કાર’માં રાષ્ટ્રીય કક્ષાએ ૫મો તથા રાજ્ય કક્ષાએ દ્વિતીય ક્રમાંક મેળવ્યો છે. આ ઉપરાંત, ખેલ મહાકુંભમાં તાલુકા કક્ષાએ દ્વિતીય સ્થાન અને ગુણોત્સવમાં સતત પાંચ વર્ષ ‘A’ ગ્રેડ પ્રાપ્ત કર્યો છે. શાળાના વિદ્યાર્થીઓએ NMMS, જ્ઞાનસેતુ, ખેલ મહાકુંભ, ચિત્ર અને નિબંધ સ્પર્ધાઓમાં રાષ્ટ્રીય, રાજ્ય તેમજ જિલ્લા કક્ષાએ વિશિષ્ટ સફળતા હાંસલ કરી છે. કેબિનેટ મંત્રી જીતુભાઈ વાઘાણી, રાજકોટ કલેક્ટર ડૉ.ઓમ પ્રકાશ, જિલ્લા પંચાયત પ્રમુખ સંજયભાઈ પીપળીયા અને જિલ્લા વિકાસ અધિકારી આનંદુ સુરેશ ગોવિંદના હસ્તે રામદેવસિંહ જાડેજાને સન્માનિત કરવામાં આવ્યા હતા.
ઉલ્લેખનીય છે કે વર્ષ ૨૦૨૪-૨૫માં જાડેજાને જિલ્લા કક્ષાના ‘શ્રેષ્ઠ મુખ્ય શિક્ષક પુરસ્કાર’થી પણ નવાજવામાં આવ્યા હતા. આ સિદ્ધિ સમગ્ર શાળા પરિવાર અને ખીજડીયા ગામ માટે ગૌરવની ક્ષણ બની રહી છે.
