જેતપુર તાલુકાના ડેડરવા ગામની સીમમાંથી હથિયાર સાથે એક શખ્સ ઝડપાયો
છરાના ત્રણ પાઉચ સહિત આઠ હજારનો મુદામાલ જપ્ત
અગ્ર ગુજરાત, રાજકોટ
આગામી સ્થાનિક સ્વરાજ્યની ચૂંટણીઓ શાંતિપૂર્ણ વાતાવરણમાં યોજાય અને ગુનાહિત પ્રવૃત્તિઓ પર લગામ કસી શકાય તે હેતુથી રાજકોટ ગ્રામ્ય પોલીસ દ્વારા સઘન ઝુંબેશ હાથ ધરવામાં આવી છે. આ ઝુંબેશ અંતર્ગત રાજકોટ રેન્જ આઈ.જી. નિર્લિપ્ત રાય અને પોલીસ અધિક્ષક વિજયસિંહ ગુર્જરના માર્ગદર્શન હેઠળ લોકલ ક્રાઈમ બ્રાન્ચ (LCB) એ જેતપુર તાલુકાના ડેડરવા ગામની સીમમાંથી એક શખ્સને ગેરકાયદેસર દેશી હથિયાર સાથે પકડી પાડ્યો છે.
મળતી માહિતી મુજબ, રાજકોટ ગ્રામ્ય લોકલ ક્રાઈમ બ્રાન્ચ (LCB)ની ટીમ જેતપુર તાલુકા પોલીસ સ્ટેશન વિસ્તારમાં પેટ્રોલિંગમાં હતી. તે દરમિયાન મળેલી ખાનગી હકીકતના આધારે ડેડરવા ગામની ‘વોકળા’ તરીકે ઓળખાતી સીમમાં વોચ ગોઠવવામાં આવી હતી. ત્યાંથી પસાર થતા રિયાજભાઇ અબ્દુલભાઇ લાડક (ઉ.વ. ૨૭, રહે. નવાગઢ, જેતપુર) નામના શખ્સને અટકાવી તેની તલાશી લેતા તેની પાસેથી એક હાથબનાવટની દેશી જામગરી મળી આવી હતી. હથિયાર રાખવા અંગે કોઈ પરવાનો ન હોવાનું જણાતા પોલીસે તેની ધરપકડ કરી હતી.
પોલીસે આરોપી પાસેથી એક દેશી હાથબનાવટની જામગરી (કિંમત રૂ. ૩,૦૦૦/-) આશરે ૫૦ ગ્રામ ગન પાવડર (દારૂગોળો) છરાના ૩ પાઉચ એક નંગ મોબાઈલ ફોન (કિંમત રૂ. ૫,૦૦૦/-) મળી કુલ રૂ. ૮,૦૨૦/- ની કિંમતનો મુદ્દામાલ જપ્ત કર્યો છે,
આ મામલે આરોપી વિરુદ્ધ જેતપુર તાલુકા પોલીસ સ્ટેશનમાં આર્મ્સ એક્ટ હેઠળ ગુનો નોંધી વધુ તપાસ હાથ ધરવામાં આવી છે. ઉલ્લેખનીય ઝડપાયેલ આરોપી રિયાજ લાડક અગાઉ પણ જેતપુર સિટી પોલીસ મથકે મારામારી અને અપશબ્દો બોલવા જેવા ગુનાઓમાં સંડોવાયેલ હોવાનું સામે આવ્યું છે.
