ચૂંટણીઓ પૂર્વે રાજકોટ પોલીસની ગુન્હેગારો પર કડક કાર્યવાહી : 14 દિવસમાં 1100થી વધુની અટકાયત
1068 વોરંટ બજાવાયા, 6 માથાભારે ગુનેગારો સામે ‘પાસા’; હથિયારો જમા, બૂટલેગરો-જુગારીઓ પર ત્રાટક્યું પોલીસ તંત્ર
અગ્ર ગુજરાત, રાજકોટ
ગુજરાતમાં આવનારી સ્થાનિક સ્વરાજ્યની ચૂંટણીઓને ધ્યાનમાં રાખીને રાજકોટ શહેર પોલીસ અને વહીવટી તંત્ર સંપૂર્ણ રીતે એલર્ટ મોડમાં આવી ગયું છે. કાયદો અને વ્યવસ્થા જળવાઈ રહે તેમજ ચૂંટણી દરમિયાન કોઈ અનિચ્છનીય બનાવ ન બને તે માટે 1લી એપ્રિલથી શહેરભરમાં સઘન ચેકિંગ અને ગુનેગારો સામે કડક કાર્યવાહી હાથ ધરવામાં આવી છે.
પોલીસ દ્વારા માત્ર 14 દિવસના ગાળામાં જ મોટા પાયે અભિયાન ચલાવી 1100થી વધુ માથાભારે તત્ત્વોની અટકાયત કરવામાં આવી છે. આ તમામ લોકો જાહેરમાં શાંતિ ભંગ કરતા અથવા અગાઉ ગુનાહિત પ્રવૃત્તિઓમાં સંડોવાયેલા હોવાનું સામે આવ્યું છે. ચૂંટણી દરમિયાન ભયમુક્ત વાતાવરણ જળવાઈ રહે તે માટે પોલીસે આવા તત્વો સામે લાલ આંખ કરી છે.
આ ઉપરાંત, લાંબા સમયથી ફરાર અને પેરોલ જમ્પ કરીને નાસતા ફરતા ગુનેગારોને ઝડપી લેવા માટે પણ પોલીસ દ્વારા વિશેષ ટીમો ગોઠવવામાં આવી છે. અત્યાર સુધીમાં 18 પેરોલ જમ્પર સહિત કુલ 523 ફરાર આરોપીઓને શોધવા માટે શહેરભરમાં સઘન શોધખોળ ચાલી રહી છે. કોર્ટ દ્વારા ઈસ્યૂ કરાયેલા બિન-જામીનપાત્ર વોરંટની બજવણી માટે પણ પોલીસે કમર કસી છે અને 1068 જેટલા વોરંટ બજાવવાની કાર્યવાહી હાથ ધરવામાં આવી છે.
હથિયારોના દુરુપયોગને રોકવા માટે પણ પોલીસ દ્વારા વિશેષ અભિયાન ચલાવવામાં આવ્યું છે. રાજકોટ શહેરમાં કુલ 3039 લાઇસન્સ ધરાવતા હથિયારધારકોમાંથી અત્યાર સુધીમાં 2616 લોકોએ પોતાના હથિયારો પોલીસ પાસે જમા કરાવ્યા છે. જ્યારે બેંક સુરક્ષા અથવા સંવેદનશીલ સેવાઓ સાથે જોડાયેલા 228 લોકોને મુક્તિ આપવામાં આવી છે. પ્ર.નગર વિસ્તારમાંથી ચાર હથિયારો કબજે કરાયા છે.
વિભાગવાર જોવામાં આવે તો માલવિયાનગર, ગાંધીગ્રામ, યુનિવર્સિટી અને તાલુકા વિસ્તારોમાં સૌથી વધુ 1829 લાઇસન્સ ધરાવતા લોકો છે, જેમાંથી 1584 હથિયારો જમા કરાવવામાં આવ્યા છે અને 140 લોકોને છૂટછાટ આપવામાં આવી છે. એ-ડિવિઝન અને પ્ર.નગર વિસ્તારમાં 437 ગન માલિકોમાંથી 228એ હથિયાર જમા કરાવ્યા છે, જ્યારે 56 લોકોને મુક્તિ મળી છે. એરપોર્ટ, આજીડેમ, બી-ડિવિઝન, ભક્તિનગર, થોરાળા અને કુવાડવા વિસ્તારમાં 773માંથી 489 હથિયારો જમા લેવાયા છે અને 37 લોકોને છૂટછાટ આપવામાં આવી છે.
ચૂંટણી દરમિયાન દારૂના પ્રલોભનને રોકવા માટે પોલીસે શહેરના 644 લિસ્ટેડ બૂટલેગરો સામે પણ કડક કાર્યવાહી શરૂ કરી છે. જેમાંથી 155 જેટલા અડ્ડાઓ પર ઓચિંતા દરોડા પાડી લાખો રૂપિયાનો દેશી-વિદેશી દારૂનો જથ્થો જપ્ત કરવામાં આવ્યો છે. આ ઉપરાંત 213 હિસ્ટ્રીશીટરોનું ચેકિંગ કરવામાં આવ્યું છે.
જુગાર પ્રવૃત્તિઓને અટકાવવા માટે પણ પોલીસ સતર્ક બની છે. શહેરના 204 લિસ્ટેડ જુગારીઓના સ્થાનો પર રેડ કરીને 6 શખ્સ સામે કાયદેસરની કાર્યવાહી કરવામાં આવી છે.
ચૂંટણી દરમિયાન ગેરકાયદેસર નાણાંની હેરાફેરી રોકવા માટે શહેરમાં પ્રવેશતા તમામ મુખ્ય માર્ગો પર કુલ 8 ચેક પોસ્ટ ઉભી કરવામાં આવી છે. અહીં અત્યાર સુધીમાં 4738 વાહનોનું ચેકિંગ કરવામાં આવ્યું છે, જોકે અત્યાર સુધી કોઈ શંકાસ્પદ વસ્તુ મળી આવી નથી.
ગંભીર ગુનાઓમાં સંડોવાયેલા 6 માથાભારે શખ્સો સામે ‘પાસા’ (પ્રિવેન્ટિવ ડિટેન્શન) હેઠળ કાર્યવાહી કરીને તેમને રાજ્યની અલગ-અલગ જેલોમાં મોકલી દેવામાં આવ્યા છે. જ્યારે અન્ય 6 અસામાજિક તત્ત્વોને જિલ્લામાંથી તડીપાર કરવાનો હુકમ પણ કરવામાં આવ્યો છે. રાજકોટ પોલીસના આ કડક અભિયાનને કારણે શહેરમાં કાયદો અને વ્યવસ્થાની સ્થિતિ મજબૂત બનવાની સાથે ચૂંટણી દરમિયાન શાંતિપૂર્ણ માહોલ જળવાઈ રહે તેવી આશા વ્યક્ત કરવામાં આવી રહી છે.
