આત્મીય યુનિવર્સિટીના વિદ્યાર્થીઓ GPAT 2026 પરીક્ષામાં ઓલ ઈન્ડિયા રેન્ક સાથે ચમક્યા
ફાર્મસી વિભાગના ત્રણ છાત્રોએ મેળવી સિધ્ધિ
અગ્ર ગુજરાત, રાજકોટ
આત્મીય યુનિવર્સિટીમાં વિદ્યાર્થીઓને તેમના રસ અને ક્ષમતા મુજબ આગળ વધવા પ્રોત્સાહિત કરવામાં આવે છે. આ ફલશ્રુતિ રૂપે ફેકલ્ટી ઓફ હેલ્થ સાયન્સના ત્રણ વિદ્યાર્થીઓએ GPAT માં ઝળહળતી સફળતા મેળવી છે. GPAT એટલે કે (ગ્રેજ્યુએટ ફાર્મસી એપ્ટિટ્યુડ ટેસ્ટ). જે ભારતભરમાં M.Pharm કાર્યક્રમોમાં પ્રવેશ માટે લેવામાં આવતી પ્રતિષ્ઠિત રાષ્ટ્રીય સ્તરની પરીક્ષા છે. તે શિષ્યવૃત્તિ, સંશોધન તકો, ફાર્માસ્યુટિકલ ઉદ્યોગો, નિયમનકારી બાબતો અને શિક્ષણમાં કારકિર્દી માટે ઉત્તમ પ્રવેશદ્વાર તરીકે કાર્ય કરે છે.
AICTE શિષ્યવૃત્તિ માન્યતા પ્રાપ્ત આ પરીક્ષામાં આ વર્ષે દેશભરમાંથી GPAT 2026 માટે 53,617 વિદ્યાર્થીઓ હાજર રહ્યાં હતા. તેમાંથી આત્મીય યુનિવર્સિટી ફાર્મસી વિભાગના વિદ્યાર્થી ધ્રુવ શિવજીયાણીએ અસાધારણ શૈક્ષણિક શ્રેષ્ઠતા અને સમર્પણ દર્શાવતા ઓલ ઈન્ડિયા રેન્ક (AIR) 1 મેળવ્યો છે તથા તિલકરામ ભાવેશ ભરાડ અને વાળા નિસર્ગ રાજેશભાઈ પણ ઉચ્ચ ક્રમાંક સાથે ઉતીર્ણ થયેલ છે.
આ પરિણામોએ આત્મીય યુનિવર્સિટી ફેકલ્ટી ઓફ હેલ્થ સાયન્સ વિભાગના વિદ્યાર્થીઓમાં એક નોંધપાત્ર સીમાચિહ્ન હાંસલ કર્યું છે, જે આત્મીય યુનિવર્સિટી માટે ગૌરવની ક્ષણ છે. આ સફળતા વિદ્યાર્થીઓની મહેનત, લગન અને અભ્યાસ પ્રત્યેની નિષ્ઠાનું પ્રતિબિંબ છે અને પ્રતિભાશાળી ફેકલ્ટી દ્વારા આપવામાં આવતું ગુણવત્તાસભર માર્ગદર્શનનું પરિણામ છે. જે આત્મીય યુનિવર્સિટીમાં અપાતા ઉત્કૃષ્ઠ શિક્ષણનું ઉદાહરણ પૂરું પાડે છે.
વિદ્યાથીઓની આ ઝળહળતી સફળતા માટે આત્મીય યુનિવર્સિટીના પ્રેસિડેન્ટ પૂજ્ય ત્યાગવલ્લભ સ્વામીજી, વાઇસ ચાન્સેલર ડૉ. રાકેશકુમાર મુદગલ, રજીસ્ટ્રાર ડૉ. ડી.ડી.વ્યાસ, ફેકલ્ટી ઓફ હેલ્થ સાયન્સના ડીન ડૉ. કેવિન ગરાળા, ડિપાર્ટમેન્ટ હેડ ડૉ. ફાલ્ગુન ધાબલીયા તેમજ ડિપાર્ટમેન્ટ સર્વે ફેકલ્ટી તથા તમામ શિક્ષણવૃદોએ વિદ્યાર્થીઓની આ સફળતા માટે અભિનંદન પાઠવ્યા છે.
