“સત્ય સનાતન દેશ હૈ મેરા” – માનવ ઉત્કર્ષ મહોત્સવમાં ઉદ્ભવ્યો રાષ્ટ્રભાવનાનો મહાસાગર
“मेरा भारत महान है” સુત્રો દ્વારા રેસકોર્સના મેદાનમાં હજારો શ્રોતાજનોને સંપની સાંકળથી વસુધૈવ કુટુંબકમની ભાવના દ્રઢ કરાવતા પૂજ્ય અપૂર્વમુનિ સ્વામી
આધુનિકતા સ્વીકારવી એ સમયની જરૂર છે, પરંતુ પોતાની સંસ્કૃતિ અને ચારિત્ર્યને ક્યારેય ભૂલવું નહીં. – પૂજ્ય અપૂર્વમુનિ સ્વામી
અગ્ર ગુજરાત, રાજકોટ
રાજકોટના રેસકોર્સ મેદાનમાં યોજાઈ રહેલો ભવ્ય ‘માનવ ઉત્કર્ષ મહોત્સવ’ આજે માત્ર એક કાર્યક્રમ ન રહ્યો, પરંતુ એ એક એવી આધ્યાત્મિક અને રાષ્ટ્રજાગૃતિની ક્રાંતિ બની ગયો છે, જે દરેક હૃદયને સ્પર્શી જાય અને જીવનમાં પરિવર્તન લાવવાની પ્રેરણા આપે. ચોથા દિવસે “સત્ય સનાતન દેશ હૈ મેરા” વિષયક કાર્યક્રમમાં હજારો લોકોની ઉપસ્થિતિએ એ સાબિત કર્યું કે આજનો માનવ હજુપણ સંસ્કાર, સંસ્કૃતિ અને રાષ્ટ્રપ્રેમ માટે તરસી રહ્યો છે.
મંચ પર પૂજ્ય અપૂર્વમુનિ સ્વામીનું આગમન થતાં જ સમગ્ર મેદાન જયઘોષોથી ગુંજી ઉઠ્યું. તેમના ઉર્જાસભર અને હૃદયસ્પર્શી વક્તવ્યએ દરેક શ્રોતાના અંતરમાં સનાતન પ્રત્યે ગર્વ અને દેશપ્રેમની જ્યોત પ્રગટાવી. સ્વામીએ જણાવ્યું કે સનાતન કોઈ પંથ કે પરંપરા પૂરતું સીમિત નથી, પરંતુ એ માનવજાત માટેનું શાશ્વત જીવનદર્શન છે – એક એવું તત્વ, જેને સમય પણ બદલી શકતો નથી. તેમની વાણીમાં માત્ર શબ્દો નહોતા, પરંતુ એક એવી શક્તિ હતી જે મનને ઝંઝોડે અને આત્માને જાગૃત કરે. સ્વામીએ પોતાના વક્તવ્યમાં ખૂબ જ અસરકારક રીતે સમજાવ્યું કે સનાતન કોઈ સંપ્રદાય કે પંથ નથી, પરંતુ એ સમગ્ર માનવજાત માટેનું શાશ્વત જીવનશાસ્ત્ર છે. “સમય પણ જેને બદલી પણ ન શકે એનું નામ સનાતન” – આ વિચાર માત્ર વાક્ય નથી, પરંતુ જીવન જીવવાનો માર્ગ છે. સનાતન એ માત્ર પૂજા કે પરંપરા નથી, પરંતુ એ જીવનની દરેક પ્રણાલી, દરેક સંસ્કાર અને દરેક વિચારમાં રહેલું વિજ્ઞાન છે.
કાર્યક્રમમાં હજારો શ્રોતાઓએ પોતાના સ્થાને ઉભા રહી એકબીજાના હાથ પકડી “એકતા ની સાંકળ” રચી. આ દૃશ્ય માત્ર એક પ્રતિક નહોતું, પરંતુ એ “વસુધૈવ કુટુંબકમ”ના સિદ્ધાંતને જીવંત બનાવતું એક અનોખું અનુભવ હતું – જ્યાં દરેક વ્યક્તિએ અનુભવું કે આપણે બધા એક છીએ. ત્યારબાદ હજારો લોકો દ્વારા ડિજિટલ ફ્લેશલાઈટ પ્રગટાવી પોતાના કર્તવ્ય માર્ગને ઉજાગર કરવાનો સંકલ્પ લેવામાં આવ્યો. આ પ્રકાશ માત્ર મોબાઈલનો નહોતો, પરંતુ એ એક નવી ચેતનાનો પ્રકાશ હતો – જે જીવનમાં સત્ય, સંસ્કાર અને સેવા તરફ દોરી જાય છે.
સ્વામીએ યુવાશક્તિને ખાસ સંદેશ આપ્યો કે આધુનિકતા સ્વીકારવી એ સમયની જરૂર છે, પરંતુ પોતાની સંસ્કૃતિ અને ચારિત્ર્યને ક્યારેય ભૂલવું નહીં. ફેશન બદલાય, ટેક્નોલોજી બદલાય, પરંતુ સનાતન મૂલ્યો ક્યારેય બદલાતા નથી. તેમણે વ્યસનમુક્ત જીવન જીવવા, ગૌસેવા તરફ આગળ વધવા અને સમાજ માટે જીવવાની પ્રેરણા આપી. “સમાજ માટે ઘસાઓ” આ એક વાક્યએ દરેકના મનમાં સેવા અને સમર્પણની ભાવના જગાવી.
કાર્યક્રમના અંતે સ્વામીએ સૌને આવનારા વિશેષ વિષય “પરમાત્મા છે તો પ્રશ્નો કેમ?” માટે સહપરિવાર ઉપસ્થિત રહેવા આમંત્રણ આપ્યું અને જીવનમાં આધ્યાત્મિકતા સાથે વ્યવહારિકતા લાવવાની પ્રેરણા આપી. માનવ ઉત્કર્ષ મહોત્સવ’ માત્ર એક પ્રસંગ ન રહેતા સમાજમાં નૈતિકતા અને સંસ્કાર જાગૃત કરતું પ્રેરણાત્મક મંચ બની રહ્યું છે.
નિષ્ણાત સર્જનો દ્વારા જરૂરિયાતમંદ દર્દીઓની નિશુલ્ક સારવાર
શહેરના આશરે ૩૯ જેટલા ખ્યાતનામ અને અનુભવી ડૉક્ટરો પોતાની વ્યસ્ત સમયસૂચિમાંથી સમય કાઢીને નિઃસ્વાર્થ ભાવનાથી આ સેવાયજ્ઞમાં જોડાયા છે. વિવિધ ક્ષેત્રોના નિષ્ણાતો જેમ કે કાર્ડિયોલોજિસ્ટ, ગાયનેકોલોજિસ્ટ, ઓર્થોપેડિક સર્જન, પીડિયાટ્રિશિયન, ડર્મેટોલોજિસ્ટ, ENT નિષ્ણાત, ફિઝિશિયન અને અન્ય તબીબો એક જ મંચ પર દર્દીઓને માર્ગદર્શન અને સારવાર આપી રહ્યા છે. સાંજે 5 વાગ્યાથી લઈને રાત્રિના મોડા સુધી સતત ચાલતી આ સેવા અનેક લોકો માટે આશીર્વાદ સમાન બની રહી છે, કારણ કે અહીં તેમને માત્ર સારવાર જ નહીં પરંતુ સહાનુભૂતિ અને સમજણ પણ મળે છે.
મહોત્સવમાં યોજાયેલ રક્તદાન કેમ્પ એ માનવતાનો એક જીવંત ઉત્સવ બની ગયો છે જેમાં રાજકોટની પ્રતિષ્ઠિત બ્લડ બેંકો જેવી કે રાજકોટ વોલન્ટરી, સૌરાષ્ટ્ર વોલન્ટરી, રેડ ક્રોસ, નાથાણી, જીવનદીપ, P.D.U. મેડિકલ કોલેજ, ફિલ્ડ માર્શલ અને AIIMS બ્લડ બેંકના સહયોગથી મોટા પાયે રક્ત એકત્રિત કરવામાં આવ્યું છે, જે ભવિષ્યમાં અનેક જીવ બચાવવા માટે ઉપયોગી બનશે. દરેક રક્તદાતાનું સંપૂર્ણ આરોગ્ય પરીક્ષણ, જેમ કે હિમોગ્લોબિન, બ્લડ પ્રેશર, વજન અને અન્ય જરૂરી પરિમાણોની ચકાસણી પછી જ રક્તદાન લેવામાં આવે છે, જેથી દાતાની સલામતી સુનિશ્ચિત રહે.
