મોરબીના બળાત્કાર અને પોક્સોના ગુનામાં ૫૦૦૦નો ઈનામી આરોપી યુપીથી ઝડપાયો
ત્રણ મહિનાથી પોલીસને હાથતાળી આપતો હતો
અગ્ર ગુજરાત, રાજકોટ
રાજકોટ ગ્રામ્ય લોકલ ક્રાઇમ બ્રાન્ચ (LCB) એ એક મહત્વની સફળતા મેળવતા, મોરબી ‘એ’ ડિવિઝન પોલીસ સ્ટેશનમાં નોંધાયેલા બળાત્કાર અને પોક્સો (POCSO) જેવા ગંભીર ગુનામાં છેલ્લા ત્રણ મહિનાથી નાસતા ફરતા આરોપીને ઉત્તર પ્રદેશના બલરામપુર ખાતેથી ઝડપી પાડ્યો છે. આ આરોપી પર રાજકોટ રેન્જ આઈ.જી. દ્વારા રૂ. ૫૦૦૦નું ઈનામ પણ જાહેર કરવામાં આવ્યું હતું.
પોલીસ વિગતો મુજબ, આરોપી સંદીપ ગોકરણ પાસવાન (રહે. ઝરવા, જી. બલરામપુર, ઉત્તર પ્રદેશ) અગાઉ મોરબી ખાતે મજૂરી કામ કરતો હતો. આ દરમિયાન તેને એક સગીરા સાથે પ્રેમ સંબંધ બંધાયો હતો. આરોપી સગીરાને તેના વાલીની સંમતિ વગર અપહરણ કરી પોતાના વતન ઉત્તર પ્રદેશ લઈ ગયો હતો અને ત્યાં તેની સાથે દુષ્કર્મ આચર્યું હતું. આ અંગે મોરબી સીટી ‘એ’ ડિવિઝન પોલીસ મથકમાં ભારતીય ન્યાય સંહિતા-૨૦૨૩ની વિવિધ કલમો તેમજ પોક્સો એક્ટ હેઠળ ગુનો દાખલ કરવામાં આવ્યો હતો.
રાજ્યમાં આગામી સ્થાનિક સ્વરાજ્યની ચૂંટણીઓને ધ્યાનમાં રાખીને નાસતા ફરતા આરોપીઓને પકડવા માટે સ્પેશ્યલ ડ્રાઈવનું આયોજન કરવામાં આવ્યું છે. જે અંતર્ગત રાજકોટ રેન્જ આઈ.જી. શ્રી નિર્લિપ્ત રાય અને રાજકોટ ગ્રામ્ય પોલીસ અધિક્ષક શ્રી વિજય સિંહ ગુર્જરના માર્ગદર્શન હેઠળ એલ.સી.બી.ની ટીમ તપાસમાં હતી.
તપાસ દરમિયાન એલ.સી.બી.ના પોલીસ હેડ કોન્સ્ટેબલ મનીષભાઈ વરૂ, ધર્મેન્દ્રભાઈ ચાવડા અને તેમની ટીમને ટેકનિકલ સોર્સ તથા હ્યુમન ઇન્ટેલિજન્સ દ્વારા બાતમી મળી હતી કે આરોપી હાલ પોતાના વતનમાં છુપાયેલો છે. આ બાતમીના આધારે પોલીસની એક ટીમ ઉત્તર પ્રદેશ રવાના થઈ હતી અને બલરામપુર જિલ્લાના ઝરવા ગામથી આરોપી સંદીપ પાસવાનને દબોચી લીધો હતો.
આરોપી ધરપકડ ટાળવા માટે છેલ્લા ત્રણ મહિનાથી નાસતો ફરતો હોવાથી તેને પકડવા માટે રૂ. ૫૦૦૦નું પ્રોત્સાહન ઇનામ જાહેર કરવામાં આવ્યું હતું. પકડાયેલા આરોપીને આગળની કાયદેસરની કાર્યવાહી માટે જેતપુર સીટી પોલીસ સ્ટેશનને સોંપવામાં આવ્યો છે.
