મિલકતોમાં રોકાણના નામે ગોંડલના ૮૮ વર્ષીય વૃદ્ધ સાથે રૂ.1.56 કરોડની છેતરપીંડી
રોકાણના નામે વિશ્વાસમાં લઈ વર્ષો સુધી નાણાં પડાવ્યા; રાજકોટના શખ્સ સામે ગુનો નોંધાયો
અગ્ર ગુજરાત, રાજકોટ
ગોંડલ શહેરમાં નિવૃત્ત ૮૮ વર્ષીય વૃદ્ધ સાથે લાખો નહીં પરંતુ કરોડોની છેતરપીંડીનો ચોંકાવનારો બનાવ સામે આવ્યો છે. મિલકતોમાં રોકાણ કરાવવાની લાલચ આપી ત્રણ-ચાર વર્ષમાં રકમ ડબલ કરવાની ખાતરી આપનાર રાજકોટના એક શખ્સે કુલ રૂ. 1,56,65,000ની રકમ પડાવી લીધી હોવાનું બહાર આવ્યું છે. બનાવ અંગે ગોંડલ બી-ડિવિઝન પોલીસ સ્ટેશનમાં ફરિયાદ નોંધાતા પોલીસે તપાસ હાથ ધરી છે.
ફરિયાદી દયાળજીભાઈ દેવરાજભાઈ મકવાણા (ઉંમર ૮૮), જે ગોંડલની બેંક સોસાયટી વિસ્તારમાં રહે છે, તેમણે નોંધાવેલી ફરિયાદ મુજબ, આશરે સાત વર્ષ પહેલા તેમના ઘરે રસોઈ કામ કરતી મહિલાના પતિ રાજેશભાઈ સુરેશચંદ્ર શાહ (રહે. રાજકોટ) સાથે ઓળખાણ થઈ હતી. ઓળખાણ બાદ આરોપીએ પોતાને રાજકીય ક્ષેત્રના મોટા માણસો સાથે સારા સંબંધો હોવાનું જણાવી ધીમે ધીમે વિશ્વાસ જીત્યો હતો. આરોપી રાજેશભાઈએ દયાળજીભાઈને સમજાવ્યું હતું કે મિલકતોમાં રોકાણ કરવાથી મંત્રીઓના સંપર્કથી થોડા વર્ષોમાં નાણાં બમણા કરી આપી શકાય. આ મોહમાં આવી વૃદ્ધે પોતાની જીવનભરની કમાણી, પ્લોટ વેચાણની આવક, પ્રોવિડન્ટ ફંડ તેમજ શેર વેચાણમાંથી મળેલા નાણાં સહિત કુલ રૂ. 1.56 કરોડથી વધુની રકમ વર્ષ 2018 થી 2022 દરમિયાન અલગ-અલગ હપ્તામાં આરોપીને સોંપી હતી.
ફરિયાદ મુજબ, આરોપીએ ખાસ કાવતરું રચી વૃદ્ધના પરિવારજનોને આ સમગ્ર વ્યવહારથી અજાણ રાખવાનો પ્રયાસ કર્યો હતો. માટે તેણે દયાળજીભાઈનો એન્ડ્રોઇડ મોબાઈલ બંધ કરાવીને સાદો ફોન અપાવ્યો હતો, જેથી તેમની વાતચીત અથવા સ્થાન વિશે કોઈને જાણ ન થાય. જ્યારે પણ વૃદ્ધે રોકાણ સંબંધિત દસ્તાવેજો અથવા ખાતરી માંગવાની કોશિશ કરી, ત્યારે આરોપી મંત્રીઓના બહાના આપી વાત ટાળી દેતો હતો. સમયગાળો પૂર્ણ થયા બાદ દયાળજીભાઈએ પોતાનો મૂડી પરત માંગતાં આરોપીએ પૈસા આપવાનો ઇન્કાર કર્યો હતો. ત્યારબાદ પોતે છેતરાયા હોવાનો ભાન થતાં વૃદ્ધે પોલીસનો સંપર્ક કર્યો હતો.
પોલીસે આરોપી રાજેશભાઈ સુરેશચંદ્ર શાહ વિરુદ્ધ છેતરપીંડી સંબંધિત ગુનો નોંધ્યો છે અને કાયદેસરની કાર્યવાહી હાથ ધરી છે. હાલ પોલીસ દ્વારા આ કેસમાં વધુ પુરાવા એકત્રિત કરવાની તથા આરોપીની ધરપકડ માટેની કાર્યવાહી ચાલી રહી છે.
