રાજકોટના ડૉ. સંજય દેસાઈને મોટી સિદ્ધિ: ઇન્ડિયન ફર્ટિલિટી સોસાયટીના ગુજરાત હેડ તરીકે નિમણૂક
વંધ્યત્વ સારવાર ક્ષેત્રે શ્રેષ્ઠ કામગીરીને મળ્યું માન, દેશભરના નિષ્ણાતોની હાજરીમાં નિમણૂક સમારોહ યોજાયો
અગ્ર ગુજરાત, રાજકોટ
રાજકોટ શહેર માટે ગૌરવની ક્ષણ સમાન એક મહત્વપૂર્ણ સિદ્ધિ સામે આવી છે. શહેરના જાણીતા ગાયનેકોલોજિસ્ટ અને ફર્ટિલિટી સ્પેશિયાલિસ્ટ ડૉ. સંજય દેસાઈને ઇન્ડિયન ફર્ટિલિટી સોસાયટી (IFS) ના ગુજરાત રાજ્યના હેડ તરીકે નિમણૂક કરવામાં આવી છે. તેમની આ નિમણૂકને કારણે સમગ્ર મેડિકલ ક્ષેત્રમાં આનંદ અને ગૌરવની લાગણી વ્યાપી ગઈ છે. વર્ષોથી વંધ્યત્વ સારવાર ક્ષેત્રે તેઓએ આપેલા મહત્વપૂર્ણ યોગદાનને ધ્યાનમાં રાખીને આ જવાબદારી તેમને સોંપવામાં આવી છે.
રાજકોટના 150 ફૂટ રીંગ રોડ વિસ્તારમાં આવેલી પાયલ મેટરનિટી હોમ જેવી આધુનિક અને સુવિધાસભર હોસ્પિટલ સાથે સંકળાયેલા ડૉ. સંજય દેસાઈ હાલ નોવા વિંગ્સ IVF, રાજકોટના સેન્ટર હેડ તરીકે સેવા આપી રહ્યા છે. તેમના માર્ગદર્શન હેઠળ અનેક દંપતીઓને માતાપિતાનું સુખ પ્રાપ્ત થયું છે. તેઓએ ફર્ટિલિટી ક્ષેત્રમાં આધુનિક ટેકનોલોજી અને સારવાર પદ્ધતિઓનો સફળ ઉપયોગ કરીને દર્દીઓને ઉત્તમ સારવાર પૂરી પાડી છે.
ઇન્ડિયન ફર્ટિલિટી સોસાયટી (IFS) એ દેશભરના ફર્ટિલિટી નિષ્ણાતોને જોડતું એક મહત્વપૂર્ણ રાષ્ટ્રીય સંગઠન છે. આ સંસ્થા દ્વારા વંધ્યત્વના ક્ષેત્રમાં સંશોધન, શિક્ષણ અને નવીન સારવાર પદ્ધતિઓના વિકાસ માટે સતત પ્રયત્નો કરવામાં આવે છે. ડૉ. સંજય દેસાઈને વર્ષ 2026 થી 2028 માટે ગુજરાત રાજ્યના હેડ તરીકે નિયુક્ત કરવામાં આવતા, રાજ્યમાં ફર્ટિલિટી સારવાર ક્ષેત્રે વધુ પ્રગતિ થવાની આશા વ્યક્ત કરવામાં આવી રહી છે.
આ નિમણૂકનો સ્થાપન સમારોહ 19 એપ્રિલ 2026 ના રોજ રાજકોટ શહેરની હોટેલ સીઝન્સ ખાતે ભવ્ય રીતે યોજાયો હતો. આ કાર્યક્રમમાં ગુજરાત ઉપરાંત દિલ્હી સહિત દેશના વિવિધ રાજ્યોમાંથી 125 થી વધુ ફર્ટિલિટી નિષ્ણાતો અને ડોકટરો ઉપસ્થિત રહ્યા હતા. કાર્યક્રમ દરમિયાન ડૉ. સંજય દેસાઈને શુભેચ્છાઓ પાઠવવામાં આવી અને તેમની સિદ્ધિઓની પ્રશંસા કરવામાં આવી હતી.
સમારોહમાં ઉપસ્થિત વક્તાઓએ જણાવ્યું હતું કે, આજના સમયમાં વંધ્યત્વ એક ગંભીર અને વધતી જતી સમસ્યા બની રહી છે, ત્યારે આવા નિષ્ણાતોનું માર્ગદર્શન અત્યંત જરૂરી બની ગયું છે. ડૉ. દેસાઈએ વર્ષો સુધી દર્દીઓની સેવા કરીને જે વિશ્વાસ મેળવ્યો છે તે જ તેમને આ ઊંચા પદ સુધી પહોંચાડવામાં મદદરૂપ બન્યો છે.
ડૉ. સંજય દેસાઈએ પોતાના સંબોધનમાં જણાવ્યું હતું કે, આ જવાબદારી તેમના માટે ગૌરવની સાથે સાથે એક મોટી જવાબદારી પણ છે. તેઓ ગુજરાતમાં ફર્ટિલિટી સારવારને વધુ સસ્તી, સુલભ અને આધુનિક બનાવવા માટે પ્રયત્નશીલ રહેશે. સાથે સાથે તેઓ યુવા ડોકટરોને તાલીમ આપવા અને નવી ટેકનિક્સ અંગે માર્ગદર્શન આપવા માટે પણ કાર્ય કરશે.
તેમણે વધુમાં ઉમેર્યું કે, આજના સમયમાં જીવનશૈલીમાં બદલાવ, તણાવ અને અન્ય કારણોને કારણે વંધ્યત્વના કેસોમાં વધારો થઈ રહ્યો છે. આવી પરિસ્થિતિમાં યોગ્ય સમયસર નિદાન અને સારવાર ખૂબ જ મહત્વપૂર્ણ બની જાય છે. તેઓએ સમાજમાં જાગૃતિ લાવવા માટે પણ વિવિધ કાર્યક્રમો યોજવાની વાત કરી હતી. આ પ્રસંગે ઉપસ્થિત મહાનુભાવોએ ડૉ. દેસાઈની સિદ્ધિને રાજકોટ તેમજ સમગ્ર ગુજરાત માટે ગૌરવરૂપ ગણાવી હતી. મેડિકલ ક્ષેત્રના આગેવાનો દ્વારા તેમને શુભેચ્છાઓ પાઠવી અને તેમના કાર્યને વધુ વિસ્તૃત બનાવવાની આશા વ્યક્ત કરવામાં આવી હતી.
ડૉ. સંજય દેસાઈની આ સિદ્ધિ માત્ર વ્યક્તિગત ઉપલબ્ધિ નહીં પરંતુ રાજકોટ શહેર માટે પણ ગૌરવની બાબત છે. તેમની નિમણૂકથી ગુજરાતમાં ફર્ટિલિટી સારવાર ક્ષેત્રે નવી દિશા અને ગતિ મળશે તેવી અપેક્ષા સેવાઈ રહી છે.
