રાજકોટના કુખ્યાત ભૂમાફિયા રમેશ રાણાને તડીપાર કરતી રૂરલ પોલીસ

રાજકોટના કુખ્યાત ભૂમાફિયા રમેશ રાણાને તડીપાર કરતી રૂરલ પોલીસ

ગુજસીટોક સહિતના ગંભીર ગુનાઓમાં પણ સંડોવણી : મેટોડા GIDC પોલીસે કરી કાર્યવાહી

અગ્ર ગુજરાત, રાજકોટ

રાજકોટમાં અસામાજિક પ્રવૃત્તિઓમાં સંડોવાયેલા કુખ્યાત ભૂમાફિયા રમેશ રાણાભાઈ મકવાણા સામે તડીપારની કાર્યવાહી અમલમાં મૂકવામાં આવી છે. મેટોડા GIDC પોલીસ દ્વારા નાયબ સબ ડિવિઝનલ મેજિસ્ટ્રેટના હુકમ મુજબ આરોપીને શહેર સીમા બહાર હદપાર કરવામાં આવ્યો છે.
મળતી માહિતી મુજબ, આરોપી રમેશ રાણા મૂળ પડધરી તાલુકાના નાની અમરેલી ગામનો વતની છે અને હાલ રાજકોટના કાલાવડ રોડ નજીક નાનામવા વિસ્તારમાં રહેતો હતો. તેના વિરુદ્ધ જમીન કબજા, ધમકી અને ભય ફેલાવવાના અનેક ગુનાઓ નોંધાયેલા છે. અગાઉ તાલુકા પોલીસ મથકમાં તેના અને તેના સાથીદારો સામે ગુજસીટોક હેઠળ પણ કાર્યવાહી થઈ ચૂકી છે. સ્થાનિક સ્વરાજ્યની ચૂંટણીને ધ્યાનમાં રાખીને કાયદો અને વ્યવસ્થા જાળવવા રાજકોટ એસપી વિજયસિંહ ગુર્જરના માર્ગદર્શન હેઠળ સતત ગુનેગાર તત્વો સામે કડક પગલાં લેવામાં આવી રહ્યા છે. તે જ અંતર્ગત ગોંડલ ડિવિઝનના ડીવાયએસપી કે.જી. ઝાલાના માર્ગદર્શન હેઠળ મેટોડા GIDC પીઆઇ એમ.જે. પરમારે આરોપી સામે હદપારીની દરખાસ્ત તૈયાર કરી હતી.
આ દરખાસ્તના આધારે નાયબ સબ ડિવિઝનલ મેજિસ્ટ્રેટ વિમલકિર્તિ ચક્રવર્તીએ આરોપી સામે તડીપારનો હુકમ કર્યો હતો, જેને પોલીસે અમલમાં મૂકી કાર્યવાહી પૂર્ણ કરી છે. પોલીસે જણાવ્યું હતું કે, જાહેર શાંતિ જળવાઈ રહે તે માટે આવી કામગીરી આગળ પણ ચાલુ રહેશે.