જખૌના દરિયામાંથી 3૮૦ કરોડના હેરોઇન કેસમાં છ પાકિસ્તાની આરોપીને ૧૦ વર્ષની સજા
૧3 સાક્ષી અને ૨૦3 દસ્તાવેજી પુરાવા રજૂ કરાયા : ભૂજ કોર્ટનો ચૂકાદો
અગ્ર ગુજરાત, કચ્છ
કચ્છના જખૌ દરિયાઈ સીમાડેથી વર્ષો પહેલા ઝડપાયેલા કરોડો રૂપિયાના ડ્રગ્સ કેસમાં ભુજ સેશન્સ કોર્ટે ઐતિહાસિક ચુકાદો આપ્યો છે. સુરક્ષા એજન્સીઓની સતર્કતા અને ન્યાયતંત્રની કડક કાર્યવાહીના પરિણામે 6 પાકિસ્તાની આરોપીઓને જેલના સળિયા પાછળ ધકેલી દેવામાં આવ્યા છે. ગુજરાતનો દરિયાકિનારો જ્યારે નશીલા પદાર્થોની હેરાફેરી માટે નરમ પડતો જાય છે, ત્યારે ન્યાયતંત્રએ ફરી એકવાર સાબિત કર્યું છે કે કાયદાના હાથ લાંબા છે.
કચ્છના જખૌના દરિયામાંથી અગાઉ ‘અલહુશેની’ નામની શંકાસ્પદ બોટમાંથી ઝડપાયેલા 380 કરોડના હેરોઈન કેસમાં ભુજ સેશન્સ કોર્ટે મહત્વનો નિર્ણય સંભળાવ્યો છે. આ કેસમાં પકડાયેલા 6 પાકિસ્તાની નાગરિકોને કોર્ટે તકસીરવાન ઠેરવીને 20 વર્ષની સખત કેદની સજા ફટકારી છે. આ ચુકાદો સરહદી જિલ્લામાં ડ્રગ્સના નેટવર્કને તોડવા માટે અત્યંત મહત્વનો માનવામાં આવી રહ્યો છે.
ઘટનાની વિગત મુજબ, સુરક્ષા એજન્સીઓએ જખૌના મધદરિયે એક ઓપરેશન પાર પાડીને પાકિસ્તાની બોટને આંતરી હતી, જેમાંથી આશરે 76 કિલોગ્રામ જેટલું ઉચ્ચ ગુણવત્તાવાળું હેરોઈન મળી આવ્યું હતું. આ ડ્રગ્સના જથ્થાની આંતરરાષ્ટ્રીય બજારમાં કિંમત અંદાજે 380 કરોડ રૂપિયા આંકવામાં આવી હતી. તપાસ દરમિયાન જાણવા મળ્યું હતું કે આરોપીઓ ભારતીય જળસીમાનો ઉપયોગ કરીને આ ઝેરીલો જથ્થો ઘુસાડવાની પેરવીમાં હતા.
કેસની ગંભીરતાને જોતા સરકારી વકીલ દ્વારા કોર્ટમાં સચોટ દલીલો રજૂ કરવામાં આવી હતી. આ સમગ્ર કેસની ટ્રાયલ દરમિયાન ન્યાયાલય સમક્ષ કુલ 13 મહત્વના સાક્ષીઓની જુબાની લેવામાં આવી હતી અને 203 જેટલા મજબૂત દસ્તાવેજી પુરાવાઓ રજૂ કરાયા હતા. પુરાવાઓની કડીઓ અને સાક્ષીઓના નિવેદનોના આધારે આરોપીઓનો ગુનો સ્પષ્ટપણે સાબિત થયો હતો. કોર્ટે નોંધ્યું હતું કે દેશની સુરક્ષા અને યુવાધનને બરબાદ કરતા આવા કૃત્યોને જરા પણ ચલાવી લેવાય નહીં. અંતે, કોર્ટે તમામ 6 પાકિસ્તાની શખ્સોને 20 વર્ષની સખત કારાવાસની સજા સાથે દંડ પણ ફટકાર્યો છે. આ ચુકાદાથી ડ્રગ્સ સ્મગલરોમાં ફફડાટ વ્યાપી ગયો છે.
