સરમાં પ્રથમ વખત નામ ઉમેરાયેલા અનેક યુવાઓ મતદાન કરી શકયા નહી
અગ્ર ગુજરાત, રાજકોટ
સ્થાનિક સ્વરાજ્યની સંસ્થાઓની જે ચૂંટણી સરના કારણે મોડી યોજાઇ તેનો જ પૂરતો ફાયદો મતદાન સમયે મળ્યો ન હતો. ખાસ કરીને 18 વર્ષ પૂર્ણ થઇ ગયા હોય કે પ્રથમ વખત મતદાર બન્યા હોય તેવા સેંકડો મતદારો મતદાન કરી શક્યા ન હતા. તેનું કારણ એ છે કે મતદાન કેન્દ્રની નજીક જે રાજકીય પક્ષોના ટેબલ હતા તેમાં મોટાભાગના સ્થળે નવા ઉમેરાયેલા મતદારોની યાદી ન હતી. તેના કારણે અનેક યુવાઓ યાદીમાં તેમનું નામ ન નિકળતા નિરાશ થઇને પરત ગયા હતા.
18 વર્ષ થઇ ગયા બાદ સરની પ્રક્રિયામાં પોતાના નામ ઉમેરો કરાવી ઉત્સાહભેર પ્રથમ વખત મતદાન કરવા ગયેલા મતદારોના એપિક કાર્ડ તો કેન્દ્રીય ચૂંટણી પંચ પહોંચાડી શક્યું ન હતું પરંતુ રાજ્ય ચૂંટણી પંચે પણ એપિક કાર્ડ નથી તો આવા મતદારોને કોઇ રીતે જાણ થાય તેની દરકાર લીધી ન હતી. તેના કારણે રાજકીય પક્ષોની યાદીમાં નામ શોધ્યા બાદ પણ ન મળતા સેંકડો યુવા મતદારો મતદાન વિના રોષ ઠાલવી ઘરે પરત ગયા હતા. જેઓ મતદાન કેન્દ્રમાં ગયા તેમને પણ થોડી પૂછપરછ બાદ જ તેમના નામ ઉમેરાયેલી યાદીમાં મળતા તેમણે મતદાન કર્યું હતું. તે ઉપરાંત પણ સરની પ્રક્રિયાના કારણે અમદાવાદ શહેરના અનેક વિસ્તારોમાં ખાસ કરીને જેમણે નવી જગ્યાએ નામ અપડેટ કરાવ્યા હોય તે યાદીમાં નામ નહીં હોવાનું પણ બહાર આવ્યું હતું. પશ્વિમ વિસ્તારમાં અનેક મતદાન કેન્દ્રમાં નામ નહીં નિકળતા મતદાન કરવા આવેલા લોકો નિરાશ થયા હતા.
